Lesona sekoly sabata

Vakio ny Jao. 4:1-40, ny fihaonan'i Kristy tamin'ilay vehivavy. Tamin'ny fomba ahoana no nampifandraisan'i Jesôsy ny fiainan'ilay vehivavy andavanandro sy ny toe-javatra nisy teo aminy tamin'ny fahamarinana ara-panahy tiany hozaraina? Izany hoe ahoana no nahafahany nampita izay zavatra nilainy ara-panahy?

Faly dia faly tokoa ilay vehivavy noho ny zavatra efa hitany sy reny, hany ka niverina tany an-tanànany izy sady navelany hatramin'ny sininy (Jao. 4:26). Efa nifanena tamin'ny Mesia izy, ary tsy maintsy nizara ny vaovao tamin'ny hafa.

Ny fitaomany azy ireo ho tafahaona amin'llay Lehilahy nahafantatra ny tantaram-piainany no ampahany voalohany tamin'ny fanambarany (and. 29). Hitantsika eto ny fahamarinana tsotra saingy tsy tontan'ny ela mikasika ny fijoroana ho vavolombelona. Tsy ny hanova ny fon'ny olona no asa nanirahana antsika. Ny asantsika dia ny mamafy voa sy ny mitondra ny olona ho eo amin'i Jesôsy. Eo kosa ny Fanahy Masina no mandray an-tanana ny fibebahany.                                            
Rehefa nahatsapa izany ny olona avy eo nony tafahaona tamin'i Jesôsy dia nilaza hoe: "Tsy noho ny filazanao ihany no inoanay, fa ny tenanay no mandre. ka fantatray fa Izy tokoa no Mpamonjy izao tontolo izao. " (Jao. 4:42).

Fanontaniana kosa ny ampahany faharoa tamin'ny fanambarany - "Izao angaha no Kristy? " (and. 29). Ny fomba nandrafetana io fanontaniana io tamin'ny fiteny grika dia maneho fa noraisiny sahady ho tsia ny valin'ny fanontaniany. Toy izao àry izany fanontaniany izany raha ara-bakiteny: "Dia ho ity ve no Mesia, sa ahoana?" na "Tsy io kosa no Kristy ka, sa izy ve io?"

Na dia tsy mbola resy lahatra zato isan-jato ny amin'ny maha-Mesia an'i Jesôsy aza ilay vehivavy dia nolazainy tamin'ny olona tamin-kalemem-panahy ihany izany, na dia mety ho tezitra aminy noho izany fanambarana izany aza ny olona.

Betsaka ny lesona azo tsoahina avy amin'io tantara io saingy ity no lehibe indrindra: tamin'ny nanaovan'i Jesôsy izany no nandrodanany mazava tsara ny fomba amam-panao tamin'ny fotoan'androny, tsy vitan'ny hoe vehivavy ihany mantsy no nanaovany fanambarana fa mbola vehivavy samaritana indray koa, kanefa dia. nampiasainy izy mba ho mpitondra hafatra sy evanjelistry ny filazantsara.

Vehivavy samaritana no nampiasain'i Jesôsy, sady antsan'ireo izay tsy dia nanan-daza firy loatra teo amin'ny fitondran-tenany, mba ho vavolombelona ho Azy. Toy ny hoe niniany natao mihitsy ny nandika ireo fadin-drazana sy ireo hevttra efa napetraka rehetra tamin'izany fotoana izany. Inona no lesona tokony hotsoahintsika avy amin'io mikasika izay natao hiasa sy tsy natao hiasa ho an'ny Tompo?