HEVI-DEHIBE: Hanehoana ny fomba isan-karazany nanambaran'Andriamanitra ny drafi-pamonjeny, an-jato taona maro talohan'ny hazo fijaliana.
Vantany vao nanolotra vahaolana ho an'ny zava-misy mahafaty sy ny herin'ny fahotana ny Tompo, dia nanambara ilay vaovao mahafaly tamin'ny olombelona lavo Izy. (Ny misiônera voalohany teto amin'ny tantaran'izao tontolo izao dia tsy ny voaforona, fa ny Tenan'ny Mpamorona mihitsy!). Nampanantenain'ny Tompo ihany koa fa io fampanantenana io – dia ny fanavotana izany – dia vaovao mandrakariva ary velona ao an-tsain'ny olombelona, satria tian'ny Tompo ho vonona ny olony rehefa ho tanteraka amin'ny alalan'ny Tenan'i Jesôsy io fampanantenana io. Manerana ny tantaran'ny olony ao amin'ny TT, Andriamanitra dia namorona fitsipika sy lalàna izay mifandray mivantana amin'ny drafi-pamonjeny ka manazava ny fiasan'izy io. Tamin'ny alalan'ny fanaovana fanatitra, ny asa fisoronana, eny fa na dia ny mpanjaka aza (ny tenany no mariky ny Mesia), dia efa nampiomana mialoha ny amin'llay fanatitra ambony indrindra, dia ny fiavian'llay Tena Mpisoronabe, sy ny fanjakan'ilay Mesia Andriana, ka amin'ny alalany no hanatanterahana ny drafi-pamonjen'Andriamanitra.
Vakio ny Gen. 3:1-15, ary diniho manokana ny and. 15. Inona no voalaza ao amin'ny and. 15, ary Inona no fampanantenana hita ho antsika ao?
Ny Kristianina dia mahita tsara ny faminaniana mahakasika ny Mesia ao amin'ny Gen. 3:15.
Voalohany, ny resaka ao amin'ny Gen. 3:15 dia manondro fa ny menarana dia fitaovana ampiasaina ho amin'ny ratsy sy ny fikomiana amin'Andriamanitra (Apôk. 12:9). Tao an-jaridainan'i Edena io hery ratsy io no nandresy an'i Adama sy i Eva ka nanitatra ny fahefany tamin'ireo taranak'ilay vehivavy.
Faharoa, ny Gen, 3:15 dia milaza ny namotehan'ny taranak'ilay vehivavy an'ilay menarana. Izy "hanorotoro" ny ombelahitongotry ny taranaka, fa ny taranaka kosa "hanorotoro" ny lohan'ny menarana. Ny teny hebreo hoe ..... (mamotika, mamely, manorotoro) dia mitovy eto, izay maneho fa ny tena izy amin'ilay fifamelezana dia miankina amin'ilay faritry ny vatana izay voavely. Ilay famelezana ny taranaka (teo a!-nin'ny ombelahitongotra) dia tsy nahafaty;fa ny taranaka kosa dia hamely ny lohan'ilay menarana, izay maneho ny fahapotehany tanteraka.
Fahatelo, ilay teny hebreo hoe "zera" ("taranaka") matetika dia manondro ny "taranaka, faramandimby" izay manana ny heviny hoe taranaka maromaro iray tarika. Izy io ihany koa anefa dia mety haneho taranaka iray ihany (ohatra: 2 Sam. 7:12,13). Hitantsika ao amin'ny Gen. 3:15 ny fampiasana azy roa ireo. Hitantsika ao ireo taranaky ny vehivavy (ilay fiangonana mahatoky) sy ny menarana/Satana (mpanara-dia azy); kanefa hitantsika ao ihany koa ny lehilahy tokana taranaky ny vehivavy ("izy") izay "hanorotoro ny lohanao (loha iray)", izany hoe ny lohan'ilay menarana. Isaky ny manambara taranaka manokana ny teny hoe "taranaka", dia olon-tokana hatrany no ambarany. I Jesôsy no "taranaky" ny vehivavy.
Ny tian'ny Gen. 3:15 bambara dia ny hoe: vantany vao tonga teto amin'izao tontolo izao ny fahotana, dia efa nanomboka nisy vokany ny drafipamonjena mandrakizay tamin'ny alalan'i Kristy, izay nomanin'Andriamanitra. Tsy nihatra tamin'i Adama sy i Eva ny fahafatesana mandrakizay satria raha araka ny fandaminana ambony indrindra, dia i Kristy no ilay Zanak'Ondry " izay voavono talohan'ny nanorenana izao tontolo izao - - Apôk 13:8. Niala avy ao an-jaridainan'i Edena i Adama sy i Eva, niandrandra ny fahatanterahan'ilay fampanantenana mahafinaritry ny famonjena.
Hatrany am-piandohana, ny drafitr'Andriamanitra dia ny hanafaka antsika ary hamotika an'i Satana. Inona no ataonao isan'andro mba handraisanao tombontsoa amin'izany vatsy mahafinaritra izany, amin'izay rehefa mifarana ny zava-drehetra dia anisan'ireo olona afaka ianao fa tsy anisan'ireo hopotehina? (Tadidio fa amin'ny farany ianao dia na amin'ilay voalohany na amin'ilay faharoa)
Vak. Gen. 22:1-12. Karazana fitsapana manao ahoana no nampiatrehana an'i Abrahàma? Nahoana ny Tompo no nangataka an'i Abrahàma hanao izany? Inona no olana lalina mampitahotra eto?
Ny Gen. 22 dia tsy milaza amintsika ny antony tena nilàna ilay fitsapana, kanefa ny antony dia toa mifandray amin'ilay fifanekena nataon'Andriamanitra tamin'i Abrahàma. Ao amin'ilay fifanekena ara-piarahana ny Tompo dia nanantena ity Patriarika ity "handeha tsy misy tsiny eo anatrehany "-Gen. 17:1, fomba fiaina izay tsy mba tratran'i Abrahàma hatrany (Gen. 16: 1– 4, 20:1-10).
I Isàka no ilay zanaky ny teny fikasana, ilay tokana izay hahatonga an'i Abrahàma ho fitahiana ho an'izao tontolo izao; noho izany, raha tsy misy io zanaka lahy io, dia tsy tanteraka ny fampanantenana izay nataon'Andriamanitra tamin'ilay patriarika. Izany hoe, tamin'ny alalan'ny nangatahana an'i Abrahàma hanao fanatitra azy, no nilazan'Andriamanitra tamin'i Abrahàma fa mifarana hatreo ilay teny fikasana, ary mijanona hatreo ilay fampanantenana manokana izay nomena azy. I Abrahàma izany dia tsy ho fitaovana avy amin'Andriamanitra indray, ho fitahiana ny firenena rehetra eto an-tany (Gen. 12:3). Naneho ny finoany sy ny fanoloran-tenany ho an'ny Tompo anefa i Abrahàma, indrindra teo amin'ny finiavany hamerina ilay zanakalahy fanomezana, ho an'ny Tompo, ka nahatoky tanteraka ny famindrampony sy ny fahasoavany (Heb 11:19).
Inona indray no nanavao ilay fifanekena? Gen. 22:13-18.
Tamin'ny alalan'ny nangatahana an'i Abrahàma hanao sorona ny zanany, no nilazan'Andriamanitra teny izay manindrona azy, ary mamarana ny antompisiany manokana. Izany rehetra izany anefa dia niova tamin'ny fomba lehibe tokoa, rehefa nisy ondry natolotra ho solon'i lsàka. Nomen'Andriamanitra izay tena nilain'i Abrahàma, dia biby atao fanatitra izay afaka misolo ny toeran'ny zanany lahy, mba hahafahan'ny Tompo manavao indray ny fifanekena aminy. Ilay olombelona fanatitra (izany hoe, ny fahafatesan'ny mpanota)- dia nosoloina ilay fanatitra avy amin'ny Tompo, fa tsy avy amin'i Abrahàma. Hitan'i Abrahàma izany ny misiterin'ny filazantsara, dia ilay fanavotana izay misy mpisolo toerana satria amin'ny alalan'i Jesosy no hanolorana izany ( ilay fanatitra fisoronana)" (Gen.22:14)
Mangozohozo ny eritreritsika eo anatrehan'ny finoan'i Abrahàma.Inona no zavatra asaina ataonao fanatitra amim-pinoana eo anatrehan'ny Tompo? Inona no zavatra - raha misy - mety ilainao hatolotra, mba hahatonga ilay fifanekem-pitahiana hitoetra ho anao?
Inona no n asetrin'Andriamanitra ilay fanompoan-tsampy nataon'ny vahoaka israelita tany an-tendrombohitra Sinay? Nahoana ilay izy no nahery valka toy izany? Eks. 32:7-10.
Io fanompoan-tsampy io dia hetsika fikomiana hanoherana an'Andriamanitra, fandikana ny fifanekena izay vao nataon'Andharnanitra tamin'izy ireo. Tahaka an'i Adama sy i Eva, ny Israelita dia tafasaraka ary navela ho faty izy ireo raha tsy nanao asa fanelanelanana ho azy i Mosesy (Eks. 32:11-14).
Inona no nolazain'i Mosesy tamin'Andriamanitra taorian'io zava-nitranga io? Eks. 32:30-32. Manao ahoana no fijery ny fampanantenan'ny filazantsara eto?
Tsy nanome rariny ny vahoaka i Mosesy; nohazavainy tsara tamin'izy ireo fa nanota tamin'Andriamanitra izy. Nambarany azy ireo ihany koa fa hanatona ny Tompo izy ary hangataka famelan-keloka ho azy ireo any Aminy. Fantatr'i Mosesy fa vidina lafo ny famelan-keloka, ka tsy tokony hafangaro amin'ny tsy firaharahana fahotana (manaporofo izany ny nasetrin'ny Tompo ny fanompoan-tsampin'izy ireo!) Ny tenan'i Mosesy mihitsy no lasa mpanelanelana ny olona, dia mpitondra tenin'izy ireo eo anatrehan'ny Tompo, mikatsaka fanafahana azy ireo amin'ny fahotany. Nanana zavatra tsy hay novinavinaina izany izy: natolony ho an'ny Tompo ny tenany, ho fitaovana ho amin'ny fanavotana! Tsy nampaninona azy na voafafa ao amin'ny bokin'ny fiainana aza ny anarany (Eks. 32:32; jereo ihany koa ny Sal. 69:28, Fil. 4:3), raha toa ka izany no hahatanteraka indray ny famerenana ny fifandraisan'ny olona amin'ny Tompo.
Mazava ho azy fa ny Tompo dia tsy hanaiky izany tolotra tsy miharo tsy fitiavan-tena izany. Ny fiainan'i Mosesy dia tsy afaka manafaka amin'ny fahotana.
Ahoana ihany no namahan'ny Tompo ny olana? Eks. 34:6-10.
Nasehon'ny Tompo tamin'i Mosesy ny Tenany, izay Andriamanitra mpamela heloka. Feno tanteraka io famelan-keloka io: "famelana ny faharatsiana sy ny fikomiana ary ny fahotana." (and. 7). Ny teny hebreo hoe "famelana" dia midika ara-bakiteny hoe: "fitondrana", Ny fomba iheveran'Andriamanitra ny fahotantsika dia amin'ny alalan'ny fanesorany izany amintsika, ka entin'ny Tenany mihitsy izany. Tsy afaka nanao izany i Mosesy; efa nanapa-kevitra Andriamanitra fa hanao izany amin'ny alalan'ny Mpanompony. Andriamanitra no nanome izay rehetra nilain'i Mosesy sy ny zanak'Isiraely.
Andriamanitra dia vonona hanadio azy ireo hiala tamin'ny fanompoantsampiny! Inona no ambaran'izany amintsika momba ny fahitan'Andriamanitra ny fahotana? Inona no ambaran'izany amintsika momba ny tsy maintsy hanesorantsika ny fahotana hiala amin'ny fiainantsika?
Vak. Isa. 52:13-53:12. Inona no fampanantenana lehibe sy teny fikasana izay hita eto, ho antsika?
Ireo and. ireo dia maneho ny andalana anisan'ny mahafinaritra indrindra ao amin'ny TT. Hita ao anatin'io andalana io, na dia tsy tonga dia voambara mivantana aza, ny fetra sy ny tsy fahatomombanan'ny fomba fanaovan'ny Israelita fanatitra ho fanafahana (fanesorany ny sakana manelanelana an'Andriamanitra sy ny olona). Tena goavana tokoa ny olan'ny fahotana ka ilay Mpanompon'Andriamanitra ihany no afaka mamaha izany. Io andalana io dia milaza ny fanandraman'ireo vahoaka sy ilay Mpanompo.
Ny vahoaka: nandalo fanandramana roa ny vahoaka, ny iray dia tsy finoana sy fitsaratsarana fahatany; ary ny iray dia fiaikena sy fibebahana. Toa tsy nahasarika no fijery ilay Mpanompo hatrany am-piandohana, toa tahaka ny boka (Isa. 52:14), ary olona izay "nokapohina sy nampahoriana" (Isa. 53:4). Koa satria toa nandà Azy no fijery an'Andriamanitra, dia mba avy ihany koa ny vahoàka nanao tsinontsinona sy nandà Azy (and. 3). Rehefa izany dia tsapan'izy ireo fa nisy drafitra ambony indrindra tao amin'ny fanandraman'Ilay Mpanompo, satria nentiny teo amin'ny Tenany ny fahorian'izy ireo sy ny fahalemeny (and, 4). Nentiny ny fahotan'izy ireo, ary amin'ny maha-mpisolo toerana Azy, dia maty ho azy ireo Izy. Teo amin'ny hazavan'ny fisoronana nataon'ilay Mpanompo, no nahitan'izy ireo ny tenany amin'ny maha-izy azy: "Isika rehetra dia samy efa nania tahaka ny ondry, samy efa nivily ho amin'ny làlantsika avy isika rehetra; ary nataon'i Jehovah nihatra taminy avokoany helotsika rehetra." (and. 6). Amin'ny alalan'ny fijerena ny hazo fijaliana ihany no ahitantsika ny famotehan'ny fahotana eo amin'ny fiainantsika.
Ilay Mpanompo: naharary tokoa ny fanandramana nandalovan'ilay Mpanompo. Irery Izy, nihodinan'ny rehetra (and. 3), novesaram-pahoriana sy fijaliana, nampahoriana (and, 7), "nofongarana niala tamin'ny tanin'ny velona", (and. 8) mihitsy aza. Tsy nisy nanamarinana ny fomba nitondrana Azy anefa satria "tsy nanao ratsy Izy sady tsy nisy fitaka teo am-bavanv - (and. 9) Fa nahoana io olona tsy manan-tsiny io no nijaly? Satria ny Tompo dia naneho ny fiainan'ilay Mpanompo, ho tahaka n" fanati-panonerana" (and. 10). Nentiny ny heloky ny olona, ka maty teo amin'ny toeran'izy ireo Izy, mba hilazana azy ireo ho marina sy tsy manan-tsiny (and. 11,12). Taorian'ilay fahafatesana fisoronana anefa dia mbola nahita hazavana indray Izy (and. 1.1) ary nasandratra avo (Isa. 52:13).
Io fanazavana ara-paminaniana momba ny fahafatesana fisoronana nataon'i Kristy io dia nataon'i Isaià, ary io ihany no hany fomba mahomby ahafahany amin'ny fahotana. Lasa tonga toa antsika i Kristy, mba hiverenan'ny fiarahantsika amin'Andriamanitra indray.
Vak. indray Isa. 52:13-53:12, ary jereo manokana ny zava-drehetra nataon'i Jesôsy ho antsika teo an-kazo fijaliana. Inona no fanantenana hitanao eo, ho an'ny tenanao?
Vak. Dan. 9:7-11. Ahoana no namaritan'i Daniela ny toerana nisy ny olona tao anatin'ny vavaka nataony?
Mba hahafahantsika mandalo fanasitranana avy any ambony sy fanafahana avy amin'ny fahotana, dia tokony hiaiky ny maha-mpanota antsika aloha isika, sady mpandika ny sitrapon'Andriamanitra izay efa naseho antsika. Anisan'ny fototry ny olana eo amin'ny olombelona ny tsy finiavantsika hiaiky fa misy zavatra tena tsy mety eo amintsika, noho izany dia tena mila famelan-keloka sy fampihavanana amin'ilay Mpahary antsika isika. Na dia ny mpanota efa voavela heloka aza dia mila manohy manaiky hatrany - tahaka ny nataon'i Daniela – fa isan'andro isika dia mila ny fahasoavan' Andriamanitra mamela heloka.
Inona no fangatahana manokana nataon'i Daniela tamin'ny Tompo? Inona no fototra nametrahan'i Daniela io fangatahany io? Dan. 9:16-19.
Vantany vao miaiky ny toerana misy antsika amin'ny maha-mpanota antsika isika, dia anisan'ny zava-dehibe azontsika atao mahakasika ny fifandraisantsika amin'Andriamanitra, ary izay ihany no zavatra tsy maintsy ataontsika hahazoana famelan-keloka, ny mangataka izany. Niantehitra tanteraka tamin'ny famindrampon'Andriamanitra i Daniela, tamin'ny fahasoavany mahafinaritra, izay hany lalan-tokana ahafahany miala amin'ny maha-mpanota azy.
Ao amin'io toko io ihany koa no ahitantsika ny faminaniana izay nanehoan'Andriamanitra - tsy ny fomba hiheverany ny olana nateraky ny fahotana ihany, fa ny fandaharam-potoana izay hitrangan'izany ihany koa, izany hoe rahoviana (jereo Dan. 9:24-27), Ilay fomba dia amin'ny alalan'Ilay Tokana Voahosotra, ny Mesia, ilay Mpanjaka izay avy amin'ny alalany no hanendrena ny mpanjakan'ny Isiraely rehetra. Ny fotoana ho an'ny fahafatesana fisoronana ataony sy ny fanombohan'ny asa fisoronana ataony (fanosorana ny fitoerana masina) dia nambara fa 70 herinandro (490 taona). Ilay vanim-potoana ara-paminaniana izany dia nanomboka tamin'ny taona 457 TLK hatramin'ny taona 34 TRK. Nantenain'Andri aman itra fa ho vonona ho amin'ny fiavian'ny Mesia ny olona. Ny zavatra asehon'io faminaniana lehibe io amin'ny fomba tena mazava, dia ny hoe tsy vitan'ny hoe mifehy tanteraka ny tsipirian'ny asam-pamonjena ataony Andriamanitra, fa manome antoka ihany koa Izy fa izy io dia hahavita ny tanjona niheverana azy ho mandrakizay.
Ahoana ny maha-zava-dehibe ho anao ny fahafantarana fa na dia efa nanaiky an'i Jesôsy ho Mpamonjy anao aza ianao, dia mbola mila hatrany ny fahasoavany mamela? Moa ve izany fampitahorana eo amin'ny antom-pamonjena ho anao, sa fomba hanamafisana izany antoka izany? Manomeza anton'ny valin-teny nomenao.
FIANARANA FANAMPINY:
Mpisolovaika eo no ho eo: "Nanaiky ny fakampanahy nataon'i Satana ny olona, ary nanao ny zavatra izay nambaran'Andriarnanitra fa tsy tokony ho nataony; i Kristy ilay Zanak'Andriamanitra dia mitsangana manelanelana ny velona sy ny maty ka milaza hoe: "Aoka hianjera Amiko ny sazy. Hijoro eo amin'ny toeran'ny olona Aho. Ho afaka indray izy." — SDABC, b. 1, t. 1085.
Isika natao sorona: "Ny sorona nangatahana tamin'i Abrahàma dia tsy ho tombony ho azy ihany, na ho an'ireo taranaka mifandimby, fa natao ihany koa ho fampianarana ireo tsy manam-pahotana any an-danitra sy ny tontolo hafa ihany koa. Ny sehatry ny fifanandrinana teo amin'i Kristy sy Satana, izay sehatra namolavolana ny drafi-pamonjena, no kahien-deson'izao tontolo. izao. Koa satria î Abrahàma dia naneho tsy fahampiam-pinoana teo amin'ny teny fikasan'Andriamanitra, dia nampangain'i satana teo anatrehan'ny anjely sy Andriamanitra izy, ho ilay tsy nahavita nanaiky ny fepetra teo amin'ny fifanekana, ka tsy mendrika ny fitahiana avy amin'izany akory, Tian'Andriamanitra hoporofoina manoloana ny lanitra iray manontolo ny fanarahan-dalàna nataon'ny Mpanompony, ho fanehoana fa tsy misy afa-tsy ny fankatoavana tanteraka no azo ekena, ka hanokafana amin'ny fahafenoany eo anatrehan'izy ireo ny drafi-pamonjena." — PP, tt. 154, 155.
Ny maha-zava-dehibe ny Isa. 53: "Tokony halalinina io toko io. Izy io dia maneho an'i Kristy Ilay Zanak'Ondrin'Andriamanitra. Ireo izay hasandratra noho ny fieboeboana, ka heniky ny fireharehana ny fanahiny, dia tokony hibanjina ny sarin'ilay Mpanafaka azy, ka hanetry tena hihosim-bovoka. Tokony hotsaroana hatrany io toko iray manontolo io. Ny fiantraikan'izy io dia hanitsy sy hanetry ny fanahy izay mbola heni-pahotana sy voasandratry ny fanandratan-tena, " — SDABC, b. 4, t. 1147
FANONTANIANA HIFANAKALOZAN-KEVITRA
-Ivereno jerena ny lesona tamin'ity herinandro ity. Raiso avokoa ny zavatra nampianarina isan'andro ary manaova famintinana momba ny zavatra rehetra azontsika hianarana momba ny drafi-pamonjena, avy amin'ny alalan'ireny zavatra nasehon'Andriamanitra tamin'ny fitantarana nasehony ao amin'ny TT ireny. Ento izay nianaranao ary zarao ao amin'ny kilasy misy anao.
- Vakio ilay tenin'i EGW voalohany etsy ambony, Inona no ambaran'izany amintsika momba ny toetran'Andriamanitra? Inona no hevitry ny hoe "afaka indray"?
- Ivereno jerenareo iray kilasy ny tantaran'i Abrahàma teo an-tendrombohitra Moria. Inona no lesona hafa azontsika raisina avy amin'izany, momba ny hevitry ny hoe miaina amim-pinoana?
FAMINTINANA
Zato taona maro talohan'ny naha-teto an-tany an'i Kristy, dia efa nampanantena famonjena ho antsika ny Tompo. Tanteraka araka ny tokony ho izy mihitsy ireny fampanantenana ireny. Mbola mipetraka ny fanontaniana: ahoana no tokony hasetrintsika ny fahatokiana sy ny fahamendrehan'ny Tompo, araka ny nasehon'ny fahatanterahan'ireny fampanantenana ireny?
FILETEHAN'NY MASOANDRO (Antananarivo)