Tsy ny olona rehetra antsoina hamita iraka no manaiky mora foana toa an'i Abrahama. Ohatra amin'izany i Jônà (vakio Jona 1-4). Niantso an'i Jona Andriamanitra mba hiantso ny amin'ny hamelezana an' i Ninive, renivohitr' i Asiria. Io tanàna io, izay ao mandraka ankehitriny, dia teo amin'ny 885 kilaometatra teo miala an'i Jerosalema. Tsy vitan'ny nanda tsy handeha i Jona, fa nandositra tany amin'ny lalan-kafa nifanipaka tamin'izany mihitsy aza. Tonga tany Jopa izy ary nandoa vola handehanana sambo ho any Tarsisy, izay any atsimon'ny Espaina ankehitriny. Iray volana eo farafahafakeliny no ho nilaina raha hamakivaky eo amin'ny 3200 kilaometra an-tsambo eo hahatongavana any, arakaraka ny toetr'andro. Tsy te hifanatrika tamin'ny mpanjakan'i Asiria i Jônà ka ny iray volana tokony ho nahatongavany tany Ninive dia nolaniany handosirana azy. Nahoana re izy, izay lehilahin'Andriamanitra, no nanao izany e?
Olona tsy nifaditrovana tokoa ny Ninivita, vahoaka nalaza tamin'ny faharatsiana sy ny halozana ary efa nanafika ny Isiraely sy ny Joda. Na izany aza dia naniraka an'i Jônà ho any Ninive Andriamanitra mba hiantso ny amin'ny hamelezana azy noho ny faharatsiany (Jona 1:2). Misy itoviany betsaka amin'ny tenin'Andriamanitra tamin'i Abrahama momba an'i Sôdôma sy Gômôra ao amin'ny Gen. 18:20,21 ny teny ampiasain'Andriamanitra eto. Kanefa araka ny ho hitantsika dia tsy tahaka an'i Abrahama i Jônà .
Inona ny lesona azontsika tsoahina avy amin'ny fihetsika nasehon'i Jônà , mikasika ireo fialan-tsiny mety' hataontsika hialana amin'ny fanatanterahana ny iraka?