"Dia tezitra tamin'ilay vehivavy ny dragona ka lasa nandeha hiady tamin'ny zanany sisa, izay mitandrina ny didin'Andriamanitra sy mitana ny filazana an'i Jesôsy ." - Apôk. 12:17.
Mofon'aina:
Vitsy loatra ary tsy mendrika ny hoheverina akory ny fahitan'ny maro ny olontsika, kanefa hisy fiovana hiseho. Misy fihetsehana mitranga eo anivon'ny tontolo kristianina ankehitriny, izay voatery hanasongadina ireo izay mitandrina ny didin'Andriamanitra. — TFC, b. 5, t. 546.
Hampirisihina hankahala ny Advantista mitandrina ny andro fahafito izao tontolo izao, satria tsy hilefitra amin'ny fahefana papaly izy ireo amin'ny fitandremana ny Alahady, izay lalàna napetraky ny fahefan'ny antikristy. Tanjon'i Satana ny hanafoana azy ireo tsy ho eto an-tany, mba tsy ho voasembantsembana ny fanjakany eto amin'izao tontolo izao. — TMGW, t. 37.
Izay hevitra marina rehetra hotanan'ny olontsika dia hotsikerain'ireo matsilo saina indrindra; ho tonga any an-tsofin'ireo olona manana ny maha-izy azy sy ambony indrindra eto an-tany ny fahamarinana. Noho izany, na inona na inona hevitra tanantsika dia hotsikeraina fatratra sy hosedraina amin'ny alalan'ny Soratra Masina. Toa tsy tsikaritry ny olona loatra isika ankehitriny, kanefa tsy ho toy izany mandrakariva tsy akory. Efa eo andalam-panosehana antsika handroso eo aloha ny fizotry ny toe-javatra, ary raha mbola azon'ireo mpahay tantara sy ireo lehibe indrindra eto an-tany atao ny handrasarasa sy hamakafaka ny foto-pampianarantsika mikasika ny fahamarinana, dia hataony izany.
Isika isam-batan'olona no tsy maintsy mahalala manokana ny fahamarinana, ary ho vonona mandrakariva hamaly izay manontany antsika ny amin'ny anton'ny fanantenana ao anatintsika, amin'ny fahalemem-panahy sy ny fanajana fa tsy amim-pireharehana, na fanandratan-tena, na fiavonavonana. Ny toe-tsain'i Kristy no tokony hanaovantsika izany. Efa antomotra ny fotoana izay tsy maintsy hijoroantsika samirery hiaro, ny foto-pinoantsika. — Ev, t. 69.
Amin'ny lafiny rehetra no hamelezana antsika, ary handalo fizahan-toetra mahamay tokoa isika. Tsy ilaintsika ny mitana ny finoana satria hoe nolovaintsika tamin'ireo ray aman-drenintsika fotsiny izany. Tsy haharitra ilay fisedrana mivaivay miandry antsika ny karazam-pinoana toy izany. Ny ilaintsika dia ny mahalala ny antony maha-Advantista mitandrina ny andro fahafito antsika, sy ny tena antony mahatonga antsika hiala amin'izao tontolo izao ka ho vahoaka manokana sy miavaka (...). Hanao izay faraheriny handavoana antsika ny devoly sy ny tafiny; ary izay rehetra tsy miraika, ka nametraka ny fony tamin'ny haren'ny tany, ary tsy mba nihevitra ny hahatakatra ny fifandraisan'Andriamanitra amin'ny olony, dia ho hazany mora foana. Tsy misy hery afaka hampijoro tsara antsika ankoatra ny fahalalana ny fahamarinana tahaka izay isehoany ao amin'i Jesôsy, ary amin'izany dia afaka "hanenjika ny arivo ny irery, ary hampandositra ny iray alina ny roa lahy". — RH, 29 Aprily 1884