Fanehoana mahagaga ny fitiavana sy ny fahasoavan'Andriamanitra ny fanandraman'i Jônà tao an-kibon'ny hazandrano (jereo Jônà 2), ary ny vavaka nataon'i Jônà dia manambara fa voarainy tsara ny hafa-pitiavana avy amin'Andriamanitra. Kanefa ny fomba tsy mampino nihaonany tamin'Andriamanitra dia tsy midika fa hiova mora foana ny fomba fisainany sy ny toetra nahazatra azy fahiny, na dia nankany Ninive ihany aza izy nony farany.
Vakio ny Jônà 3. Inona no nasetrin'ny vahoaka ny fitoriana nataon'i Jônà? Inona no lesona ho antsika eto mikasika ny asa fitoriana?
Na inona na inona tsy fitiavan'i Jônà ireo Ninivita dia nitory tamin'izy ireo izay nasain'Andriamanitra notoriny ihany izy, ary nanaitra tokoa ny vokatr'izany. Voataona hibebaka ny Ninivita! Zava-tsarotra maro no nandalovan'i Jônà mba hahatanteraka ity zavatra tsy tiany natao ity, fa rehefa vitany kosa izany, dia nomem-boninahitra Andriamanitra. Araka izany dia tanterahina amin'ny alalan'ireo olona manana fahafoizan-tena ny asan'Andriamanitra, na dia be fisalasalana ary izy ireo. Manana ny fihevitsika isika, saingy tsy maintsy ampileferintsika amin'ny laharam-pahamehan'Andriamanitra izany, dia ny famonjena ny very. Indraindray isika manana hevitra mibahana mialoha, tahaka an'i Jônà, izay manakana antsika tsy hanatona olona na vondron'olona iray.
Mitaky fanetren-tena ny fialana amin'ireny hevitra mibahana mialoha ao antsaintsika ireny. Mitaky fotoana sy tanjaka ara-pihetseham-po koa ny famitana iraka. Mety hahasasatra tokoa ny manolo-tena ho an'ny hafa sy mikarakara azy reny marina. Amin'ny fotoana izay mahasahiran-tsaina antsika amin'ny fiainana sy ny olantsika, dia toa mahahavalaka tokoa ny fanohanana ny hafa ara-pihetseham-po.
Ary farany, ny fanatanterahana iraka dia matetika mitaky ny fanovana ny fomba fijerintsika momba ny vola sy ny fampiasantsika azy. Misy vola lany mandrakariva amin'ny famitana iraka, na fikarakarana olona izany, na fanomezana boky na fitaovana hafa fanaovana fitoriana, na fanampiana na fiatoana amin'ny asa mba hahazoana fotoana hanaovana asa misiônera. Na manao ahoana na manao ahoana endrika isehoan'ny asa misiônera dia mitaky fahafoizana izany.
Ny vaovao mahafaly dia izao: na teo aza ny tsy fahatanterahan'i Jônà dia niasa mahery Andriamanitra tamin'ny fitaomana ny Ninivita ho amin'ny fibebahana. Indrisy fa tsy mba niombom-pifaliana tamin'ny lanitra i Jônà tamin'izany.
Inona no asain'Andriamanitra afoinao, na tiany hafoinao, mba hahazoanao mizara ny fitiavany amin'ny olona hafa? Tana matoky Azy ve ianao fa ho tanterahiny tokoa ny teny fikasana hampanankarena ny fiainanao noho hy fahafoizanao?