Vakio Gen. 12:1-3. Ahoana no mahatonga ny toro-marika nomen'Andriamanitra an'i Abrama ho antso ho amin’ny iraka?
Nasain’Andriamanitra niala tamin’ny taniny sy ny havany i Abrama (izay niova ho Abrahama taty aoriana) mba ho any an-tany hafa. Tao anatin’ny drafitr’Andriamanitra tokoa ny nampiasa an’i Abrahama ho fitaovana hanatanterahany ny fikasany eto ambonin’ny tany. Dia nandeha i Abrahama, araka ny tenin’i Jehôvah. Raha manana drafitra ho anao Andriamanitra dia mety ho antso hialanao amin’ny fianakavianao sy ny iray firenena aminao izany, mba ho any amin’ny toerana izay sokafany ho anao hanompoanao azy, mba hahatonga anao ho fitahiana ho an’ny hafa.
Vakio ireto toko sy andininy ireto. Inona no ambaran’ny tsirairay avy amin’ireo momba ny faneken'Andriamanitra, ny teny fikasany ho antsika?
Gen. 3:15______________________
Gen. 17:19_____________________
Nom. 24:17_____________________
Isa. 9:6 ________________________
Dan. 9:24-27 ___________________
Mat. 1:21 _____________________
Hita mazava, araka ireo toko sy andininy ireo, fa teo an-dalam-panatanterahana ilay teny fikasana natao tao Edena Andriamanitra, dia ny hahatongavan’ny Olona iray hamaha ny olan’ny fahotana. Natao hipoitra avy amin’ny taranak’i Abrahama sy Isaka (amin’ny alalan’i Saraha) io vahaolana io, dia i Jesôsy Kristy. Araka ny voambara ao amin’ny Heb. 11:9, Isaka sy Jakôba dia mpandova ny teny fikasana nataon’Andriamanitra tamin’i Abrahama, izay mampanantena fitahiana.
Tsy fantatsika mazava hoe hatraiza ny fahatakaran’i Abrahama ny fomba hipoiran’Ilay Zanaky ny teny fikasana avy aminy, saingy nandroso tamim-pinoana hatrany izy. “Finoana no naneken’i Abrahama, rehefa nantsoina, hiainga hankany amin‘izay tany ho azony ho lova; ka dia niainga izy, nefa tsy fantany izay halehany." — Heb. 11:8.
Ohatra tsara ho antsika tokoa izany!
Andeha hatao hoe antsoin'Andriamanitra ianao handeha any amin’ny toerana “tsy fantatrao”; ahoana no ho fihetsikao? nahoana?