Vakio ny Asa. 17:24-34. Ahoana no nanohizan'i Paoly ny fitoriany?
Mahaliana koa ny mahita fa mindrana teny avy amin'ireo mpanoratra sasantsasany teo amin'ireo olona ireo i Paoly, izay nanoratra hevitra manakaiky ny fahamarinan'ny Baiboly, ka nahitany fomba hahatonga azy ireo hihaino azy maharitra kokoa. Raha lazaina amin'ny teny hafa dia nampiasain'i Paoly ny fahalalany momba ny finoan'izy ireo mba hahitany lafin-javatra itoviana hevitra aminy, hahafahany miroso lavidavitra kokoa. Tsy isalasalana fa amin'ny fiezahana hanatratra ny hafa, dia mety ho fomba fiasa mahery vaika ny fahafantarana tsara momba ny finoany sy ny fitadiavana foto-kevitra iraisana.
Mariho koa fa nampiasain'i Paoly io foto-kevitra iraisana amin'izy ireo io hirosoany amin'izay tiany hahatongavana, dia ny fitsanganan'i Jesosy tamin'ny maty sy ny fanantenana entin'izany ho an'ny rehetra. 17:34). Resahin'i Lioka ny amin'ny fihetsiky ny olona teo am-pihainoana ny teny farany nataon'i Paoly momba ny fitsanganana amin'ny maty. Nihomehy izany ny sasany, ny hafa indray nilaza fa maniry ny hihaino an'i Paoly amin'ny manaraka, ary nisy koa ireo nino. Ny zava-dehibe ao amin'io tantara io, izay tanjontsika, dia ity: nihaino tsara avokoa izy rehetra. Izany no nantenain'i Paoly hatramin'ny voalohany.
Fantatsika fa handà ny filazantsara ny olona sasany saingy mila manao izay rehetra azo atao isika hahazoana antoka fa mialoha ny handavan'izy ireo dia fantatr'izy ireo tsara izay laviny. Tamin'ny alalan'ny fomba fiasany tamin'ireo Atenianina sy ny tetikady nampiasany ny zavatra nianarany sy fantany momba azy ireo, dia nataon'i Paoly izay hahazoany antoka fa nandre tamin'ny saina misokatra izy ireo fa misy Andriamanitra izay tsy fantany kanefa nahary azy. Tia azy ireo io Andriamanitra io ary maniry ny ho fanatr'izy ireo. Namindra fo tamin'izy ireo Izy na dia teo aza ny tsy fahalalany. Tonga anefa ny Andro Fitsarana. Ary raha toa tsy mampino aza izany rehetra izany, dia porofo azo hamarinina ny fitsanganan'i Kristy tamin'ny maty.
Ary satria efa nandre sy nahatakatra ny hafatra izao ny olona, dia tsy maintsy misafidy ho an'ny tenany izy ireo, na handà izany tsotra izao, na handalina kokoa ny momba izany. Dia nandalina izany sasany ka tonga mpanara-dia an'i Jesôsy.
Fanamby: Mivavaha mba hitarihan' Andriamanitra anao amin'ny fomba manokana, hahafantaranao ny fomba tsara indrindra hitoriana ny filazantsara amin'ny olona iray fantatrao.
Manaova fihaikana: Ampiasao ireo fitaovan-tserasera ho toy ny "Areopago" ho anao, hahazoanao mitory ny Filazantsara - amin'ny fomba mazava sy feno fitandremana -tahaka ny nataon'i Paoly tamin'ireo tsy mpino.