Ao amin'ny Lio. 18:8 dia nametraka ity fanontaniana ity i Jesôsy tany amin'ny faran'ny fanoharana iray nataony: "raha avy ny Zanak 'olona, moa hahita finoana ety ambonin'ny tany va Izy?" Amin'ny maha-mpianatr'i Kristy antsika ankehitriny dia ilaintsika ny mahatakatra izay tadiavin'i Jesosy. Hitantsika ao amin'io tantara io fa finoana mamirapiratra na dia ao anatin'ny haizina aza no tadiavin'i Jesôsy.
Vakio ny Mat. 8:10,13; Mat. 9:2; Mat. 20:29-34; Mar. 2:5; Mar. 10:46-52; sy ny Lio. 18:35-43. Ao amin'ireo andininy ireo, iza no lazain'i Jesôsy fa manam-pinoana?
Tafiditra ao anatin'io lisitra io ireo izay nanana finoana namirapiratra na dia tao amin'ny tanana feno haizina aza. Olona maro nanam-pinoana no nasongadin'i Jesôsy tao Kapernaomy. Hitantsika ao amin'ny Mat. 8:10,13 ny kapiteny jentilisa iray niova fo izay nanana finoana lehibe. Hitantsika ireo mpinamana efatra vontom- pinoana izay nanongotra ny tafon-trano mba hitondrany ny namany mararin'ny paralisisa ho eo amin'i Jesosy (Mat. 9:2; Mar. 2:5). Hitantsika ao amin'ny Mar. 10 i Bartimeo, ilay lehilahy jamba taloha, izay nanana finoana namirapiratra tao Jerikó,
Ary mety manantena isika fa manana finoana lehibe ny vahoakan' Andriamanitra. Saingy na tao Nazareta tanána nahaterahan'i Jesôsy aza dia nametra ny asa fanompoana nataon'i Kristy ny fahakelezan'ny finoana - mba tsy hilazana hoe ny tsy fisiam-pinoana tao. Raha teo anivon'ny mpianany i Jesosy dia imbetsaka no nilaza momba ny Isiraely hoe: "ry kely finoana!" (Mat. 6:30; Mat. 8:26; Mat. 14:31; Mat. 16:8). Ary izao no lazain'i Jesôsy ao amin'ny Mat. 17:17: "Ry taranaka tsy mino sady efa nivadika!"
Inty misy lesona iray azontsika ampiharina ankehitriny: any amin'ny toerana tsy ampoizina no ahitana finoana, any amin'ireo tanan-dehiben'ny hafa firenena, any amin'ny mpanompo sampy, any amin'ireo antokom-pivavahana hafa. Tsy maintsy mandeha amim-panetren-tena any amin'ireo tanan-dehibe tahaka an'i Jesosy isika mba hitady ireo izay hanam-pinoana mahavonjy rehefa torina aminy ny fahamarinana, dia finoana an'i Jesosy. Ary ho hitantsika ao tokoa izy ireo.
Fanamby: Ao anatin'ny fitolomana amim-bavaka dia sokafy ny fonao mba hanana finoana lehibe kokoa hahazoanao mizara fitiavana amin'ny hafa, na akaiky na lavitra anao.
Manaova fihaikana: Ahoana no nahafantaranao an'i Jesôsy sy ireo hafatra sarobidin'ny anjely telo? Mitanisà fitahiana telo ara-panahy izay azonao avy amin'i Jesôsy teo amin'ny fiainanao manokana. Miomána hizara izany fanandramana izany ao amin'ny kilasin'ny Sekoly Sabata.