Rehefa nanome ny valinteny marina ilay mpahay lalana dia izao no baiko nomen'i Jesôsy azy: "ataovy izany, dia ho velona hianao." Lio. 10:28, ary nahakasika ny aty fon'ilay lehilahy Izy tamin'izany. Mora ho an'ilay mpahay lalåna ny nanome ny valinteny marina rehetra, saingy sarotra ho azy ny nanatanteraka izany roa arivo taona lasa izay, ary mbola sarotra ho an'ny ankamaroantsika amin'izao andro izao koa. Te hamandrika an'i Jesôsy ilay mpahay lalàna, ary koa te hampiseho ny fahalalana nananany. Mbola nametraka fanontaniana indray izy hoe: "Iza àry no namako?" - and. 29.
Vakio ny Lio. 10:30-37. Ahoana no hamintinanao ny tian'i Jesôsy hambara ao amin'io tantara io?
Moa ve eo amin'ny manodidina antsika misy olona nanaovan'ny hafa fitondrana tsy ara-drariny? Efa nanao izay azo natao mba hanampiana azy ireny ve isika?
Marina tokoa fa tsy manampy ireo mila fanampiana ny pasitora sy ny loholona ary ny mambra indraindray. Misy fotoana, ny olona any amin'ny finoana hafa no tsara fanahy kokoa noho isika eo amin'ny fiarahamonina. Mety miresaka momba ny tokony hanehoana fahatsaram-panahy isika, saingy ny hafa no mety manome izay ilain'ireo olona tsy iresahantsika. Raha misy heviny ny finoantsika dia tsy maintsy manatratra ireo sahirana isika ary manampy azy ireo.
Namarana ny tantaran'ilay Samaritana tsara fanahy i Jesôsy ka nanontany hoe iza tamin'ireo olona telo no naman'ilay olona nila fanampiana.
"Voavaly araka ny marina izany ilay fanontaniana manao hoe: 'Iza no namako?" Nasehon'i Kristy fa ny namantsika dia tsy izay iray fiangonana na iray finoana amintsika ihany. Tsy mikasika firazanana na volon-koditra na saranga izany. Ny namantsika dia ny olona rehetra izay mila ny fanampiantsika. Ny namantsika dia ny fanahy rehetra izay noratraina sy nokapohin'ilay fahavalo. Ny namantsika dia izay rehetra fananan 'Andriamanitra." - IFM, t. 538.
Fanamby: Manomboha mivavaka isan'andro ho an'ny olona iray tsy mitovy aminao, na ho an'ny olona iray mety tsy dia tianao loatra.
Manaova fihaikana: Manaova lisitry ny olom-pantatrao 3 farafahakeliny (tsy Advantista); fantaro ny zavatra ilain'izy ireo (ara-pihetsehampo, ara-batana, ara- piarahamonina) ary eritrereto ny fomba hahafahanao miasa manokana amin'ireo zavatra ilainy ireo.
Inona no azonao atao ho azy ireo amin'io herinandro ho avy io?