"Fa matoky aho fa na fahafatesana, na fiainana, na anjely, na ireo fanapahana, na zavatra ankehitriny, na zavatra ho avy, na hery, na ny ambony, na ny ambany, na inona na inona amin 'izao zavatra ary rehetra izao, dia tsy hahasaraka antsika amin'ny fitiavan'Andriamanitra izay ao amin'i Kristy Jesôsy Tompontsika." - Rôm. 8:38,39.
Mofon’aina:
Azon'i Kristy natao ny nanalavitra antsika noho ny helotsika, saingy tsy izany fa tonga nonina teto amintsika aza Izy, Izay manana ao Aminy ny fahafenoan'Andriamanitra rehetra, mba ho iray amintsika, mba ho tonga amin'ny fahatanterahana isika noho ny fahasoavany. Tamin'ny fahafatesana mahamenatra sy fijaliana no nanavotany ny olombelona. Fitiavana sy fahafoizan-tena re izany! (...) Tsy misy maharefy ny halalin' izany fitiavana izany. (...) Tian'Andriamanitra haneho ny toetrany sy hanao ny asany ny zanany, mba ho voataona hiray saina amin'Andriamanitra koa ny hafa.
Tonga ota ho famonjena ny taranaka lavo i Kristy Mpamonjintsika, Ilay tonga lafatra tanteraka. Tsy nahalala ota Izy satria tsy nanota, kanefa dia nizaka ny vesatra mahatsiravin'ny helok'izao tontolo izao. Natao sorona ho antsika Izy mba ho tonga zanak'Andriamanitra izay rehetra mandray Azy. (...) Nanao izay hitaomana ny olona rehetra hanatona Azy i Kristy tamin'ny alalan'ny hazo fijaliana. Ny fahafatesany no hany fanantenana hahazoana mamonjy ireo izay latsaka anatin'ny fangidiana noho ny fahotana. Natao handray hery vaovao ara-tsaina sy ara-panahy amin'ny alalan'ny Fanahy Masina ny olona, izay raha miara-miasa amin'Andriamanitra dia ho tonga iray amin'Andriamanitra.
Mba handravana ny sakana napetrak'i Satana eo anelanelan' Andriamanitra sy ny olona dia nanao sorona ampy sy tanteraka i Kristy, naneho fandavan-tena tsy misy toy izany. Nampiseho fahagagana tamin' izao tontolo izao Izy, dia Andriamanitra tonga olombelona sy nanao sorona ny tenany ho famonjena ny olona lavo. Fitiavana mahatalanjona re izany! Mitomany aho eo am-pieritreretana fa maro tokoa ireo izay milaza ho mino ny fahamarinana no milona ao anatin'ny fitiavan-tena (...).
Gaga aho mahita ireo izay mitonona ho Kristianina kanefa tsy manararaotra ny fanomezan'ny lanitra, sy tsy mahita mazava fa ny hazo fijaliana no mitondra famelan-keloka sy mampifandray mivantana ny fo (...) amin'ny Fanahy Masina. UL, t.191.
"Ary ho rakitra soa ho Ahy ireny amin'ny andro izay hotendreko, hoy Jehôvah , Tompon'ny maro, ary ho antra azy Aho toy ny olona antra ny zanani-lahy izay manompo azy." - Mal. 3:17.
Mofon’aina:
Vatosoa sarobidin'i Kristy ny Kristianina, novidiny tamin'ny vidiny tsy manam-petra. Natao hamirapiratra ho Azy izy ireo, hampiely ny fahazavan'ny fahatsarany. Ary tsy azony hadinoina fa ny famirapiratana rehetra eo amin'ny toetra kristianina dia noraisiny avy amin'Ilay Masoandron'ny fahamarinana.
Miankina amin'ny fanefena azy ny famirapiratan'ny vatosoan' i Kristy. Tsy manery antsika hotefena Andriamanitra. Anjarantsika ny mifidy na hotefena isika na tsia. Kanefa tsy maintsy manaiky hotefena izay rehetra omena toerana ao amin'ny tempoly. Tsy maintsy ekeny ny hanesorana izay rehetra maranidranitra eo amin'ny toetrany mba ho kanto sy tsara izy, ho afaka haneho ny fahatanterahan-toetran'i Kristy. (...)
Tsy mandany andro amin'ny akora tsy misy vidiny Ilay Andriamanitra Mpanefy. Ny vato sarobidy ihany no tefeny hifanaraka amin'ny lapa. (...) Tsy mora izany tefena izany, mandona ny hambom-pon'ny olombelona. Kapain'i Kristy hiala ny fanandramana izay noheverin'ny olona fa tsara tao anatin'ny avonavony. Esoriny izay rehetra mety ho fanandratan-tena. Kantsanany izay mihoatra rehetra, ary ampandaloviny milina fandamana ilay "vato" ka tomoriny akaiky mba ho afaka avokoa ny marokoroko rehetra. Avy eo dia tarafin'ny Tompo amin'ny hazavana ilay vatosoa ka hitany ao ny endriny. Amin'izay vao hambara ho mendrika hanana toerana ao amin'ny tempoly izany vatosoa izany.
Tsara re izany fanandramana izany! Na sarotra aza izany dia manome tombam-bidy vaovao ho an'ilay vato, ka mahatonga azy hazava sy hamiratra! (...)
Manana mpiasa izay nantsoiny avy tao amin'ny fahantrana sy ny fahamaizinana ny Tompo. Milofo amin'ny raharahany andavanandro izy ireo, tsy dia miakanjo tsara, ary tsy misy vidiny eo imason'ny olombelona. I Kristy kosa mahita zava-tsoa tsy hita fetra ao amin'izy ireo; raha eo an-tanany mantsy ireo dia ho tonga vatosoa sarobidy izay hamirapiratra aoka izany ao amin'ny fanjakan'Andriamanitra. "Ary ho rakitra soa ho Ahy ireny amin'ny andro izay hotendreko" hoy Izy. (...)
Hain'Andriamanitra ny fomba itondrana ny fanahy tsirairay. Tsy mitsara tahaka ny fomba fitsaran'olombelona Izy. — UL, t. 372.
"Mba hankalazaina ao aminareo ny anaran'i Jesosy Tompontsika, aryhia nareo ao aminy kosa, araka ny fahasoavan'Andriamanitsika sy Jesosy Kristy Tompo." - 2 Tes. 1:12.
Mofon'aina:
Adidintsika .ny ho sarotiny rlfatratra ny amin'ny voninahitr'Andriamanitra, ka hisoroka izay rehetra mety hanamaloka izany, toy ny endrika misy soritr'alahelo na teny tsy voalanjalanja, izay toa milaza fa manohintohina ny fahafahantsika ny zava-takin' Andriamanitra. Ny maha olona antsika manontolo dia manana tombontsoa ho vavolombelona manambara mazava, amill'ny lafiny rehetra — eo amin'ny endrika, ny toe-po, ny teny, ary ny toetrantsika - fa tsara ny fanompoana ny Tompo. (...)
Tian'Andriamanitra ny vahoakany mitandrina ny didiny, satria amin'ny alalan'ny fankatoavana no anomezan'izy ireo voninahitra ny Anarany masina, sy hanaporofoany ny fitiavany an'Andriamanitra. (...) Tokony hifanaraka amin'ny fahazavana lehibe izay manazava ny lalantsika ny finoana sy ny zotom-pontsika. Ny finoana manetry tena sy mitoky amin'Andriamanitra —ao an-tokantranontsika, eo amin'ny mpiara-belona amintsika, ao amin'ny fiangonantsika — dia ho hita tsy mila aseho. Ny fiasan'ny Fanahy Masina dia tsy ho voasakana, ary tsy azo sakanana. Mahafaly an'Andriamanitra ny maneho ny Tenany amin'ny vahoakany amin'ny maha-Ray Azy, amin'ny maha-Andriamanitra Izay azon'izy ireo itokiana tanteraka. (...)
Rehefa to hampiseho na hanasongadina ny vokatry ny asany ny tantsaha, dia tsy ny ratsy no ataony santionany fa ny tsara indrindra. Mailaka ny vehivavy mitondra ny diberany mavo tsara efa nataony tao anaty lasitra, voafono tsara sy nasiana marika kanto. Ny lehilahy kosa mitondra ny vokatra tsara indrindra amin'ny legioma isan-karazany. Voninahitra sy vavolombelon'ny fahaizan'ny mpiasa ireo voankazo maha-te hihinana sy manintona indrindra ny fisehony. (...) Tsy hisy olona hitondra ny efa simbasimba, fa izay voafantina indrindra azon'ny tany vokarina no hoentiny.
Ary nahoana moa ny Kristianina miaina amin'izao andro farany izao no tsy haneho ny voa manintona indrindra amin'ny alalan'ny asa tsy misy fitiavan-tena? Nahoana moa ny voa entin'ny vahoakan'Andriamanitra mitandrina ny didiny no tsy hiseho amin'ny alalan'ny asa tsara indrindra? Ny teniny, ny fitondrantenany, ny fitafiany, dia tokony hanana ny kalitao ambony indrindra. Ny voany, hoy i Kristy, no hamantaranareo azy. (...) Aoka ny mambran'ny fiangonana hanana ireo toetra sarobidy mampiavaka an'i Kristy. – Ms, 70, 1897.
Misy akony betsaka amin'ny fomba fanazavantsika ny Soratra Masina ireo hevitra mibahana mialoha ao an-tsaintsika. Ireo izay mihevitra ny Baiboly ho fitambarana antontan-taratasy tranainy fotsiny dia tsy mahita ny fifandraisana sy ny firindrana misy eo amin'ireo boky samihafa ao aminy. Fa raha raisintsika ho fitsipika fototra ny hoe: "Izay soratra rehetra nomen'ny tsindrimandrin'Andriamanitra dia mahasoa"- 2 Tim. 3:16, dia ho takatsika ny firaisan'ireo hafatra ao aminy ary ny Baiboly no havelantsika hanazava ny tenany.
Vakio ny Mat. 5:17-48. Ahoana no nanazavan'i Jesôsy ireo fampianarana ao amin'ny TT voaresaka ao amin'ireo andininy ireo?
Ny famakiana maimaika ny Mat. 5:17-48 dia mety hahatonga ny olona hihevitra fa nosoloan'i Jesosy fampianarana vaovao ny fampianaran'ny TT. Kanefa, raha vakina amim-pitandremana kokoa izany, dia hita mazava fa nasehon'i Jesosy ny hevitra lalina sy ara-panahin'ireo fampianarana ao amin'ny TT. Amin'io heviny io dia tanterahiny ilay teny fikasana ao amin'ny Jer. 31:31-33, fa ao amin'ny fanekena vaovao dia hataon'Andriamanitra ao an-tsain'ny olony ny lalàny ary hosoratany ao am-pony (ampitahao amin'ny Heb. 8:8-10 sy ny Heb. 10:16).
Indraindray ny fanazavana ny andalan-teny iray dia hita ao anatin'ilay boky misy azy ihany. Ohatra, ao amin'ny Daniela toko faha-2 dia aseho aloha ny fanoritsoritana momba ny nofy saro-pantarin'i Nebokadnezara mpanjaka (Dan. 2:31-35), ary avy eo dia omena ny hevitr'ilay nofy (Dan. 2:36-45). Toy izany koa ao amin'ny Mat. 13; hitantsika ny fanoharana momba ilay mpamafy (Mat. 13:1-9), ary avy eo dia omen'i Jesôsy ny fanazavana azy (Mat. 13:18-23).
Indraindray koa, mpaminany tatỳ aoriana no manazava ny hafatra iray. Ohatra, ny 2 Tant. 36:21,22 dia manamafy ny fahatanterahan'ilay faminaniana momba ny fitopolo taona, izay efa nambaran'i Jeremia ao amin'ny Jer. 25:11,12 sy ny Jer. 29:10. Ankoatra izany, maro amin'ireo tandindona sy aloka ao amin'ny TT no tanteraka tao amin'i Kristy, ary maro amin'ireo andalan-teny ao amin'ny TT no hazavaina ao amin'ny TV.
Hoy i Ellen G. White: "Filazantsara aseho amin'ny alalan'ny tandindona sy ny aloka ny TT. Ny TV kosa no fahatanterahan'izany. Samy ilaina avokoa izy roa tonta." — SIM, b. 2, t. 104. Eny tokoa, ny TV no tsindrimandry avy amin'Andriamanitra manazava ny TT.
Nahoana no mila mitandrina ny amin'ireo hevitra mibahana mialoha ao an-tsaintsika isika rehefa mandinika ny Baiboly? Izao kosa no zava-dehibe tokony ho ao an-tsaintsika: matoky aho fa tenin'Andriamanitra ny Baiboly, ary izy no tokony hanitsy ahy fa tsy izaho no hanitsy azy. Nahoana?