Vakio ny Asa. 8:1-4. Tao amin'ny fiantonana voalohany, inona no nahatonga ny fielezan'ireo mpino ka nialany tamin'ny toerana nahazatra sy nampiadana azy?
Tamin'io fotoana io dia mbola teo Jerosalema (teo amin'ny tanin'ny Jiosy sy teo anivon'ny vahoaka Jiosy) no nisy ny fiangonana voalohany ankapobeny. Rehefa tonga ny fanenjehana, niaraka tamin'ny fandraisan'i Paoly anjara mavitrika tao anatin'izany, dia niely hatrany Jodia sy Samaria ny fiangonana tao Jerosalema.
Voalazan'i Jesôsy mialoha hoe: "hianareo (...) ho vavolombeloko any Jerosalema sy erqn'i Jodia sy Samaria". Tanteraka io fanambarana io araka ny hita ao amin'ny Asa. 8:4: "Ary izay niely dia nandeha nitory teny tontolo eny. "
Na efa nanomboka niely ivelan'i Jerosalema aza ny fiangonana dia tany amin'ireo faritra nisy Jiosy na tany amin'ireo tanàna hafa nifanakaiky tamin'ny vahoaka Jiosy no nitoriany ny filazantsara. Hita ao amin'ny Asa. 11:19 fa niely hatrany Foinika.
(Libanona) sy Kyprosy ny fiangonana, kanefa hatreo dia tsy mbola nitory ny hafatra tamin'ny olon-kafa ankoatra ny Jiosy izy ireo. Tsy nihevitra ny Jentilisa ho tonga eo amin'ny Tompo ny mpianatr'i Jesôsy sy ny fiangonana voalohany, fa ny Jiosy ihany. Mbola tery tokoa ny fisainan'izy ireo momba ny iraka natao hotanterahin'ny fiangonana.
I Petera, izay mpianatr'i Jesôsy isan'ny mpitarika ny fiangonana voalohany, dia tsy narisika hitondra ny hafatry ny filazantsara ho an'ny Jentilisa, na dia efa nanomboka izany aza i Paoly. Apôstôlin'ny voafora (izany hoe ny Jiosy) no nahafantarana an'i Petera, ary i Paoly kosa, apôstôlin'ny Jentilisa (Gal. 2:8). Tsy naniry ny ho hita niaraka tamin'ny Jentilisa akory aza i Petera tany am-boalohany (Gal. 2:11,12). Kanefa nesorin'Andriamanitra teo anin'izay nahazatra sy nampiadana ny sainy izy ary novany ny fony. Nanomboka nianatra ny tena votoatin'ny iraky ny filazantsara sy ny tanjon'ny nahafatesan'i Jesôsy ho an'izao tontolo izao izy.
Vakio ny Asa. 10:9-15, 28, 29. Inona nu hafatra nampitain'ny Tompo tamin'i Petera, ary ahoana no tsy maintsy ampiharantsika io foto-kevitra io eo amin'ny asa nanirahana antsika, amin'izao andro sy vanim-potoana misy antsika izao?