«Farany, ry rahalahy, mivavaha ho anay, mba handehanan'ny tenin'ny Tompo faingana ka hankalazaina toy ny eo aminareo.» - 2 Tes. 3:1.
Mofon’aina:
Tokony hisy fotoam-bavaka matetika eo anivon'ny vahoakan'Andriamanitra amin' izao andro izao, dia vavaka mafana vokatry ny fo. Tokony hatao mandrakariva izay hananana toe-tsaim-bavaka. Aoka hitolona amim-bavaka na any an-tokantrano na any am-piangonana, ho an'ireo izay nanokana ny tenany hitory ny Teny filazantsara. Aoka ny mpino hivavaka tahaka ireo mpianatra taorian'ny niakaran'i Kristy ho any an-danitra.
Tokony hisy rojom-bavaky ny mpino, dia vavaka amin-kafanam-po, hanodidina izao tontolo izao. Aoka hivavaka amim-panetren-tena avokoa ny rehetra. Afaka miara-mivory ny mpiray vodirindrina mba hangataka ny Fanahy Masina. Ireo izay tsy afaka mandao ny trano dia aoka hanangona ny zanany, ary hiara-mivavaka. Azon' izy ireo takina ny terry fikasan'ny Mpamonjy hoe: "Fa na aiza na aiza no iangonan'ny roa na telo amin'ny anarako, dia ao afovoany Aho." —Mat. 18:20. — RH, 3 Janoary 1907.
Tokony hanao fivoriam-bavaka isika, hangataka amin'ny Tompo mba hanokatra ny lalana hidiran'ny fahamarinana any amin'ireo toerana mimanda izay nametrahan'i Satana ny seza fiandrianany, sy hampisava ny aizina nandrakofany ny lalan'ireo izay ezahiny fitahina sy aringana. Manana toky isika fa: "Ny fiasan 'ny fivavaky ny marina dia mahery indrindra." — Jak. 5:16. RH, 30 Avrily 1908.
Omena ohatra tonga lafatra ny amin'ny vavaka tokony hatao isika ao amin'ny vavaka nampianarin'ny Tompo. Tsotra tokoa izany, nefa mahafaoka ny lafiny rehetra! Tokony hampianarina ny ankizy io vavaka io. Aoka handinika tsara ny foto-kevitra voarakitra ao anatin'izany ny rehetra. (...) Amin'ny alalan'ny vavaka sy ny fanoloran-tena isan'andro, dia afaka mifandray amin'ny Rainy any an-danitra avokoa ny rehetra, ka afaka mandrotsaka fitahiana manana amby ampy ho azy ireo Izy. (...)
Akory ny fiovana ho hita eo amin' ny fihetsiky ny maro raha toa ka alan' Andriamanitra ny sarona manafina Azy tsy ho hitan'ny masontsika, ka asehony ny Tenany tsy mipetraka mangina eo amin'ny seza fiandrianany eo amin'ny toerana avo sy masina, fa voahodidin'ny anjely alin-kisa masina sy sambatra, miandry hanatanteraka ny baikony! — R1-1, 3 Janoary 1907.