ILAY ANDRIAMANITRA VELONA MPANAO FAHAGAGANA
Vakio ny Jos. 3:6-17. Inona no ambaran'ny fiampitan'ny Isiraely an'i Jordana tamin'ny fomba mahagaga momba ny toetr'ilay Andriamanitra izay tompointsika?
Ny teny hebreo hoe "niphla'ot", "fahagagana, zava-mahatalanjona" no ilazana ny fiampitan'ny Isiraely ny onin'i Jordana ao amin'ny Jos. 3:5, fampiasa matetika izany mba hanondroana ny asa mahagaga sy lehibe ataon'Andriamanitra ary koa maneho ny maha-tsy manan-tsahala Azy (Sal. 72:18; Sal. 86:10). Nisaintsaina ireny asa mahatalanjona ireny ny Isiraelita taty aoriana, ary nidera an'i Jehôvah vokatr'izany (Sal. 9:1) no sady nanambara ny momba Azy tany amin'ny firenena rehetra (Sal. 96:3). Ny loza tany Egypta (Eks. 3:20; Mika 7:15), ny fiampitana ny Ranomasina Mena, ary koa ny fitarihan'Andriamanitra ny Isiraelita tany an'efitra (Sal. 78:12-16) no zava-mahagaga naverina notantaraina indray.
Fantatr'ireo mpanoratra ny Baiboly fa Ilay Andriamanitra izay nahary izao tontolo izao dia tsy mba voafetra na voasakan'ny voariny, ary nijoro ho vavolombelon'izany izy ireo. Tsy misy zavatra tsy hainy atao (Heb. "sarotra loatra ho Azy") (Jer. 32:17). Mahagaga ny anarany sy ny toetrany (Mpits. 13:18), ary tsy mety ho takatry ny fisainantsika ny momba Azy.
Tsy tahaka ireo andriamanitry ny firenen-kafa izay tsy mahavonjy (Sal. 96:5; Isa. 44:8), ny Andriamanitry ny Baiboly dia "Andriamanitra velona" sy miasa ary azon'ny mpanara-dia Azy itokiana noho ny fahafantaran'izy ireo fa hiditra an-tsehatra ho azy Izy.
Nampiasa io teny io koa ny mpaminany Zakaria (avy amin'ny fototeny hoe niphla'ot) raha naminavina ny hoavin'ny Isiraely aorian'ny fahababoan'izy ireo tany Babylona. Azony sary an-tsaina tamin'izany fa ho voaorina tanteraka i Jerosalema ary hipetraka eny an-dalam-ben'ny tanana ireo zokiolona; hitany koa ireo ankizilahy sy ankizivavy milalao eo. Hoy i Zakaria tamin'ireo mponina izay toa tsy nino izany noho ny fahitan'izy ireo ny faharavan'ilay renivohitra: "Izao no lazain'i Jehôvah , Tompon'ny maro: Raha mahagaga izany eo imason'ny sisa amin'ity 'ity firenena ity amin'izany andro izany, moa hahagaga eo imasoko koa va? Hoy Jehôvah , Tompon'ny maro. Izao no lazain'i Jehôvah , Tompon'ny maro: Indro, hamonjy ny oloko avy any amin'ny tany atsinanana sy amin'ny tany andrefana Aho; ary hitondra azy Aho, ka honina any Jerosalema izy." - Zak. 8:6-8a.
Vakio ny Lio. 18:18-27. Ahoana no ampaherezan'ny valintenin'i Jesôsy tamin'ny mpianany anao mba hatoky an'Andriamanitra amin'ny zavatra izay toa tsy azo heverina mihitsy?