Lesona Sekoly Sabata H. lasa

Hodinihina mandritra ny herinandro: Eks. 32:1-6; Sal. 115:4-8; Isa. 44:9,10; Rom. 1:22-27; Eks. 32:7-32; Isa. 53:4.

Tsianjery:

"Ary Mosesy dia niverina ho ao amin'i Jehôvah ka nanao hoe: Indrisy! Efa nanao fahotana lehibe ity firenena ity ka efa nanao andriamani-bolamena ho azy. Ary ankehitriny, enga anie ka hamela ny fahotany Hianao! Fa raha tsy izany, mifona aminao aho, vonoy eo amin'ny bokinao izay nosoratanao ny anarako." - Eks. 32:31,32.

Efapolo andro monja no tsy teo an-tobin'ny Isiraely i Mosesy, dia inona no nitranga? Nivily niala tamin'Andriamanitra ny vahoakany, ka nivavaka tamin'ny sampy namboarin'olombelona, dia ombilahy kely volamena. Ahoana no nahavitan'izy ireo izany zavatra izany, kanefa fahagagana sy famantarana ary fanandramana maro no efa hitany?

Maro no mety ho valin'izany, ary angamba misy fahamarinany ihany. Tsy takatry ny olona ve hoe iza marina Andriamanitra? Sa hadinon'izy ireo ny fanandramana lehibe niainany niaraka Taminy noho ny faniriany feno filan'ny nofo sy feno fahotana? Tsy nankasitraka izay nataon'Andriamanitra ho azy ve izy ireo ka nataony fa efa tokony ho azy rahateo ny fitahiana rehetra? Maizina ve ny fahatakarany, izay simba noho ny fiahiahiany ny fiainany isan'andro sy ny fisainany taloha feno fahotana? Tsy nahay nankasitraka tsotra izao ny asam-pamindram-po nataon'Andriamanitra ho azy ve izy ireo? Hadinon'izy ireo vetivety teo ve ny asa mahery nataon'Andriamanitra (Sal. 106:13, 21-23)? Sa ny tsy fahombiazan'ny fitarihan'i Arona no tokony homen-tsiny amin'izany rehetra izany? "Ary Jehôvah dia tezitra indrindra tamin'i Arona ka saiky nandevona azy." - Deo. 9:20.

Na inona na inona antony nahatonga io fihemorana mahatsiravina io, inona avy ireo lesona azontsika sintonina avy amin'izany, tsy momba ny maha-mpanota ny olombelona ihany, fa momba ny fitiavan'Andriamanitra ny olombelona sy ny fahasoavany, na dia eo aza ny maha-mpanota azy ireo?

*Famerenana ny lesona ny sabata 13 Septambra.

TSY FAHAIZA-MITONDRA

Niantso an'i Mosesy hiaraka Aminy Andriamanitra. Mety ho fotoana fohy ho an'i Mosesy ny efapolo andro sy efapolo alina, saingy toa naharitra ela sy lava loatra izany ho an'ny Isiraelita. Tsy teo ilay mpitarika azy ireo hita maso. Sahiran-tsaina izy ireo, tsy nahandry, natahotra, ary tsy natoky tena. Te hanana andriamanitra hita maso izay hitarika azy izy ireo, dia ireo "andriamanitra" izay efa hitany nandritra ny androm-piainany tany Egypta mpanompo sampy.

Vakio ny Eks. 32:1-6. Ahoana no nahatonga ny fitarihan'i Arona ho tonga amin'ny tsy fahombiazana lehibe toy izany?

Tsy hain'i Arona ny niatrika ilay toe-javatra. Tsy hainy ny nanararaotra izany mba hanaovana ny marina. Raha tokony ho natoky ny Tompo izy, dia nilefitra kosa teo anatrehan'ny maro an'isa. Izay zavatra tsy azony veroka mihitsy nпо nangatahin'ny vahoaka: "Mitsangana, ka anaovy andriamanitra izahay, hitarika antsika eo aloha" - Eks. 32:1, ary dia nanaiky i Arona.

Nanome volamena an-tsitrapo ny olona hanamboarana ilay sampy, ary tsy vitan'ny hoe tsy nanakana azy ireo i Arona, fa nanasa azy ireo mihitsy hanolotra fanomezana. Avy eo dia nandray anjara tamin'ny fanefena io andriamani-tsy izy io izy. Manaraka izany dia hoy ny olona: "lo no andriamanitrao, ry Isiraely, izay nitondra anao niakatra avy tany amin'ny tany Egypta" Eks. 32:4. Akory ny halehiben'ny fahotany, ny ditrany, sy ny tsy fahendreny! Izy ireo izao no vao nanamboatra ilay sampy, kanefa avy eo nolazainy fa io sampy io no nanafaka azy? Mahavariana tokoa ny fanimban'ny faniriana feno fahotana ny fisainantsika sy ny asantsika! Ny zavatra noforonin'ny tanany no hindrahindrain'ny olona, ary manjary mirefarefa ny maha-olombelona sy ny fitondrantenany amin'izany.

"Olona matotra sy manana ny maha-izy azy ary tsy mety kivy fa mahery fo no ilain'ny fotoan-tsarotra toy izay nandalovan'ny Isiraely tamin'izany andro izany. Olona manao ny voninahitr'Andriamanitra ho ambony noho ny ainy mihitsy aza no tadiavina. Tsy nanana izany toe-tsaina izany anefa ilay natao hitarika ny Isiraely. Tsy voafehin'i Arona araka ny tokony ho izy ny vahoaka, ka vao mainka koa nahakirina azy ireo ny tsy fahaizany mitondra. Vetivety foana dia nivadika ho rotaka ny fimonomononana." - PM, ed. 2014, t. 304.

Ahoana no nahatonga an'i Arona halemy toy izany? Tamin'ny fomba ahoana no mety ho niezahan'i Arona nanamarina ny fihetsika mahatsiravina nataony tao am-pony?

NY FANOMPOAN-TSAMPY SY NY FAHARATSIANA

Vakio ny Eks. 32:6. Nitarika azy ireo ho amin'inona sahady ilay fanompoan-tsampiny? (Jereo koa ny Sal. 115:4-8; Sal. 135:15-18: Isa. 44:9.10.)

Mitovy endrika amin'ilay andriamanitra omby egyptianina antsoina hoe Apis, na ilay andriamanitra ombivavy antsoina hoe Hathor, ilay ombilahy kely volamena. Fanitsakitsahana miharihary ny didy voalohany sy faharoa izany (Eks. 20:3-6). Tsy azo avela amin'izao tsy misy famaizana io fandikan-dalana io satria nanapaka mivantana ny fifandraisan'izy ireo tamin'llay Andriamanitra velona izany. Raha tokony ho nivavaka tamin'ny Mpahary azy ny Isiraelita, dia nivavaka tamin'ny zavatra noforonin'ny tanany izy ireo, izay tsy mahita, na mandre, na mahatsapa, na miteny, na mikarakara, na mitia, na mitarika.

Nivadika ny rasa: Raha tokony ho takatr'izy ireo fa voary noforonina araka ny endrik'Andriamanitra izy ireo, dia tsy izany fa namorona andriamanitra izy ireo, izay tsy araka ny endrik'izy ireo akory fa ratsy kokoa noho izany - araka ny endriky ny biby, lo ve no andriamanitra tian'izy ireo hotompoina? Araka izany dia fahotana lehibe teo anatrehan'i Jehôvah no nataon'izy ireo (Isa. 31:7; Isa. 42:17).

Maneho izay voalaza ao amin'ny Rôm. 1:22-27 ilay fihemoran'ny zanak'Isiraely tamin'ny nanamboarany ombilahy kely volamena: amin' ny fomba ahoana?

Ny fanompoan-tsampy dia mandà ilay hevitra teolojika hoe: Andriamanitra dia Andriamanitra ary ny olombelona dia olombelona. Fafan'ny fanompoan-tsampy ny elanelana misy eo amin'Andriamanitra sy ny olona (Mpitt. 5:1) ary tapahiny ny fifandraisana amin'Andriamanitra. Na mibaribary na miafina ao am-po ny fanompoan-tsampy, dia tapahiny faingana ny fifandraisantsika amin'ny Tompo, ary taominy ho amin'ny fitotonganana ara-pitondrantena isika. Tsy mahagaga raha miresaka momba izay nataon'ny Isiraely ny ampitson'iny ny lahatsoratra: rehefa avy nanolotra fanatitra ho an'ny sampy izy ireo, dia nanomboka nanao lanonana, izay lazain'i Ellen G. White hoe: "fetim-pivavahana jentilisa izay hala-tahaka nalaina avy tamin'ny fanompoan-tsampy tany Egypta." - PM, ed. 2014, 1. 307 (np).

Havanana amin'ny fanamboarana ny sampiny ny olombelona. Mamorona andriamanitra ho an'ny tenany izy ireo, ary ratsy noho izany aza, lasa manompo ireo andriamanitra ireo izy. Soloana zavatra ny Mpamorona, ary na ho ela na ho haingana dia hahatonga fahasimbana ara-pitondrantena izany.

Amin'ny fomba ahoana koa no iankohofan'ny olona amin'ny voary ankehitriny fa tsy amin'ny Mpahary?
 

EFA NANAO RATSY NY OLONAO

Vakio ny Eks. 32:7,8. Nahoana no nasain'Andriamanitra niverina ho any an-fobin'ny Isiraely i Mosesy?

Rehefa nitodika tany amin'ny sampy ny Isiraelita, dia tafasaraka tamin'llay tena Andriamanitra, Ilay nanafaka azy ireo tamin'ny fanandevozana tany Egypta. Nanome tsiny mivantana azy ireo ny Tompo nanao hoe: "nanao ratsy ny olonao" - Eks. 32:7 ka tonga hatramin'ny fanomezam-boninahitra sarivongana, toy ny hoe io no namonjy azy tamin'ny fanandevozana tany Egypta. Mifanohitra tanteraka amin'izay nolazain’Andriamanitra tamin'izy ireo izany (Eks. 20:2)! Zava-dratsy tokoa io fandavana ny fanatrehan’Andriamanitra sy ny asa mahery nataony io. Nanjary diso sy simba tanteraka ny fisainany sy ny fihetseham-pony.

Ho an'i Ezekiela mpaminany, ny fanompoan-tsampy no fototry ny fahoriana rehetra nanjo ny vahoakan'Andriamanitra, ary avy amin'izany no nipoiran'ny fahotana hafa rehetra (jereo, ohatra, ny Ezek. 8:1-18, Ezek. 20:1-44, Ezek. 22:1-12). Matetika isika no manontany tena hoe: nahoana ny mpino fahiny no mora ambakaina sy sarotra anarina toy izany ka nivavaka tamin'ny sampy maro nataon'olombelona? Matoky tanteraka isika fa tsy hanao zavatra toy izany mihitsy. Tena afaka amin'ny sampy marina ve anefa isika? Mety ho hafa ny bika aman'endriky ny sampy ankehitriny, nefa lalana mitovy ihany no itaomany ny olona.

Izay rehetra maka ny toeran'Andriamanitra no sampy, ary na fantatsika aza fa tsy mety izany, dia mbola tompointsika ihany, ary ataontsika matetika. Anjakany ny eritreritsika, baboiny ny fitiavantsika, alainy ny fotoantsika, ary ny saintsika afantony aminy mihoatra noho ny amin'Andriamanitra. Mety hanandevo ny fisainantsika mihitsy aza izany. Raha ny marina dia manahaka izay banjinintsika isika, ary tsy hisondrotra mihoatra noho izay "andriamanitra" tompointsika.

Raha tsy ataonao ivon'ny fiainanao Andriamanitra, dia hisy andriamanitra hafa haka ny toerany. Raha tsy misitraka sy mizatra amin'ny fanatrehan'Andriamanitra velona isika, dia hankamamy sy hanokana ny fiainantsika ho an'ny zavatra na olona hafa. Mety hiseho amin'ny endriny samihafa ireo zavatra anoloantsika an'i Kristy; ohatra: avonavona, fitiavan-tena, vola, fahefana, firaisana ara-nofo, sakafo, fahitalavitra, zava-mahadomelina, alkaola, fisainana maloto, sary vetaveta, fahafinaretana, asa, fanatanjahantena, fianakaviana, lalao video, sarimihetsika, fiantsenana, firehan-kevitra, politika, mozika, toerana, anaram-boninahitra, mari-pahaizana, sy ny sisa. Tsy mety tapitra io lisitra io.

Mahay mamorona tokoa isika amin'lzany lafiny izany. Azontsika hovana ho sampy avokoa izay rehetra tsara, kanto, ary manan-danja. Mampidi-doza tokoa ny fanompoan-tsampy satria manova ny toetrantsika, ny fomba fisainantsika, ny fitiavantsika, ary ny fiainantsika ara-piarahamonina. Manova ny maha-isika antsika izany, ary raha tokony hifandray amin'ny hafa amin'ny fo madio isika, dia manjary poakaty sy tsy misy dikany akory ny fifandraisantsika, ary tsy mahavonjy antsika amin'ny farany.

FAHATEZERAN'ANDRIAMANITRA, ARA-DRARINY

Vakio ny Eks. 32:9-29. Inona no nataon'l Mosesy teo anatrehan'ny fikasan' Andriamanitra handringana ny Isiraely?

Raha mbola teo an-tendrombohitra Sinay i Mosesy, dia nilaza Andriamanitra fa handringana ireo mpikomy Izy ary hahatonga an'i Mosesy ho firenena lehibe kosa. Tsy izany anefa no tian'i Mosesy. Nitalaho tamin'i Jehovah izy, nantitranteriny fa tsy vahoakan'i Mosesy ny Isiraelita - fa vahoakan'Andriamanitra. Tsy ny tenany, izany hoe tsy i Mosesy, no nitondra azy ireo nivoaka avy tany Egypta, fa Andriamanitra no nanao izany tamin'ny alalan'ny asa mahery nataony. Dia toy izany no nitalahoan'i Mosesy tamin Andriamanitra, ka nitakiany ireo teny fikasana nataon'Andriamanitra voalohany tamin'ireo razany. Nanao asa fanelanelanana tamin'Andriamanitra sy ny olombelona i Mosesy.

"Ary Jehôvah dia nanenina ny amin'ny loza izay nokasainy hamelezana ny olony"-Eks. 32:14; taorian'izany no niverenan'i Mosesy tany amin'ny vahoaka. Tsy misy filazana fa namirapiratra ny tavany noho ny fanatrehan'ny Tompo - tahaka izay nitranga tao amin'ny Eks. 34:29,30. Azo lazaina fa naneho taratra ny fahatezeran'Andriamanitra ny tavany.

"Ary raha nanakaiky ny toby izy, dia nahita ny ombilahy kely sy ny dihy; ary nirehitra ny fahatezeran'i Mosesy, dia natontany ny vato fisaka teny an-tanany ka novakivakiny teo am-bodin'ny tendrombohitra." - Eks. 32:19. Ny fanapotehana ny vato fisaka nisy ny Didy Folo dia famantarana ivelany ny fahapotehan'ny ao anatiny. Nananatra an'i Mosesy Andriamanitra noho izany, kanefa taty aoriana dia nandidy an'i Mosesy Izy mba hanamboatra vato fisaka roa ho solon "ilay vato fisaka teo, izay novakivakinao" - Deo. 10:2. Andriamanitra mihitsy no naniry hanoratra indray ny didy.

Nananatra mafy an'i Arona i Mosesy noho ny nanekeny ny fitakian'ny vahoaka. "Inona no nataon'ity firenena ity taminao, no nitondranao heloka lehibe taminy?" - Eks. 32:21. Niezaka nanala tsiny ny fandikan-dalàna nataony i Arona tamin'ny (1) fanomezany tsiny ny hafa, sy (2) tamin'ny alalan'ny majika: "(...) natsipiko tao anaty afo izany, ka io ombilahy kely io no nivoaka"! - Eks. 32:24. Ny tena ratsy aza dia ity: nomen'Andriamanitra voninahitra lehibe i Arona, nanana tombontsoa maro izy, anisan'izany ny niakarany teny an-tendrombohitra niaraka tamin'i Mosesy sy ireo loholona 70 (Eks. 24:1).

Mampalahelo tokoa izany! Tamin'ny filazan'i Arona fa nisy fahagagana niseho, dia nantenainy ho voafitaka ny rahalahiny (mariho ny fomba itarihan'ny fahotana iray ho amin'ny fahotana iray hafa; teto amin'ity tranga ity dia nitarika ho amin'ny lainga ny fanompoan-tsampy). Kanefa tsy voafitaka i Mosesy satria hitany ny fihetsiky ny olona, izay tsy voafehiny. Niharihary ny voka-dratsin'izany, ary tsy maintsy nampitsahatra ny fikomiana avy hatrany i Mosesy.

Inona no tokony hampianarin'ity tantara ity antsika momba ny herin'ny vavaka fanelanelanana? Ho an'iza no tokony hivavahanao amin'izao fotoana izao?

VAVAKA FANELANELANANA

Vakio ny Eks. 32:30-32. Tonga hatraiza ny vavaka fanelanelanana nataon'i Mosesy ho an'ny mpanota? 

Noho ny fikomian'izy ireo dia nisy tranga mahatsiravina niseho tao amin'ny tobin'ny Isiraelita, izay nahafatesana olona maro (Eks. 32:28). Ny ampitson'iny dia hoy i Mosesy tamin'ny olona: "Efa nanao fahotana lehibe hianareo; ary ankehitriny, dia hiakatra ho amin'i Jehovah aho, fa angamba hahazo manao fanavotana ny amin'ny fahotanareo." - Eks. 32:30.

"Ary Mosesy dia niverina ho ao amin'l Jehôvah ka nanao hoe: Indrisy! Efa nanao fahotana lehibe ity firenena ity ka efa nanao andriamani-bolamena ho azy. Ary ankehitriny, enga anie ka hamela ny fahotany Hianao! Fa raha tsy izany, mifona aminao aho, vonoy eo amin'ny bokinao izay nosoratanao ny anarako." - Eks. 32:31,32.

Tsy mahagaga raha raisin'ny maro ho tandindon'i Kristy i Mosesy! Noho ny vavaka fanelanelanana nataony ho an'ny mpanota sy ny fahavononany hanolotra ny ainy ho azy ireo, dia tsy isalasalana fa naneho taratra izay tian'i Kristy hatao ho antsika rehetra izy. Endrey ny fangoraham-pony ho an'ny mpandika lalàna! Naneho fanoloran-tena tanteraka ho an'ny Tompo izy, ary fitiavana feno fahafoizan-tena ho an'ny hafa. Tsy voalaza ao amin'ny bokin'ny Eksodosy ny faharetan'ny fotoana niarahan'i Mosesy tamin'i Jehôvah teo an-tendrombohitra tamin'io fotoana manokana io, fa ny bokin'ny Deoteronomia no manambara fa teo an-tendrombohitra Sinay nandritra ny 40 andro izy tamin'izay (jereo ny Deo. 9:18).

Ao amin'ny Eksodosy 32:32, ny teny nadika hoe "hamela" dia avy amin'ny matoanteny izay manana hevitra fototra hoe "mitondra" na "milanja", toy ny ao amin'ny Isa 53:4, izay milaza toy izao (momba an'i Jesôsy ) hoe: "nitondra ny aretintsika tokoa Izy". Matoanteny iray ihany ny hoe "Hamela" ao amin'ny Eks. 32:32, sy ny hoe "nitondra" ao amin'ny Isa. 53:4. Fanambarana mazava momba ny fizotry ny famonjena sy ny famelan-keloka ary ny vidiny tsy maintsy naloan'Andriamanitra ho famonjena antsika izany!

Nangataka an'i Jehôvah tokoa i Mosesy mba "hitondra" ny fahotan'ny olona, ary izany indrindra no nataon'Andriamanitra teo amin'ny hazo fijaliana an'arivony taona taty aoriana. Tsy vitan'ny maneho ny asa fisoloana sy fanavotana fotsiny ny Eks. 32:32, fa maneho koa llay  Mpisolo sy Mpanavotra, dia Andriamanitra mihitsy.

Aseho ao amin'io andininy io ny fomba ahazoana ny famelan-keloka. Andriamanitra ao amin'i Kristy no nitondra ny fahotantsika, izay hany fomba ahazoantsika famelan-keloka. Fanehoana mahery vaika ny drafi-pamonjena izany ary fanaporofoana amintsika sy amin'izao tontolo rehetra izao ny tsy maintsy niaretan'Andriamanitra mba hamonjena antsika.

Andriamanitra mihitsy no nangatahin'i Mosesy mba hitondra ny fahotan'ny olona, ary notanterahin' Andriamanitra tao amin'i Jesôsy tokoa izany. Ahoana no fahatakarantsika io fahamarinana mahatalanjona io? Inona no ambaran'izany amintsika momba ny fitiavan'Andriamanitra antsika olombelona lavo?

FIANARANA FANAMPINY

Vakio "Ny fanompoan-tsampy tao Sinay", PM, tt. 302-314.

Manasongadina ny asan'Andriamanitra ao amin'ny mpino ny lesontsika tamin'ity herinandro ity. "Mahay manao mihoatra noho ny zavatra rehetra, eny, mihoatra lavitra noho izay rehetra angatahintsika na heverintsika aza Andriamanitra, ao amintsika "- Efes. 3:20. Aoka tsy hifantoka amin'ny tenantsika isika ka hanome fahafaham-po ny fanirian'ny tenantsika; mitarika ho amin'ny fanompoan-tsampy mantsy izany. Aoka hifantoka amin'Andriamanitra sy ny heriny kosa ny saintsika. Izy no manome ny hery izay mitondra ho amin'ny fiainana vaovao sy feno fandresena (Fil. 4:13; Joda 1:24,25).

"Mifandanja tsara anefa na ny fitiavana na ny fahamarinana nenti-nanao ny famaizana tao Hôreba. Sady Mpiambina ny olony no Mpanjakany Andriamanitra. Raha nandringana ireo maditra mafy fo Izy, dia nanahy fandrao izy ireny hitarika ny hafa ho any amin'ny fahalevonana. Raha niaro ny ain'i Kaina Andriamanitra, dia ny mba hanehoana ny mety ho vokatry ny heloka votsorana maina, amin izad rehetra ary izao. Avy amin'ny herin'ny fomba fiainany sy ny fampianarana nataony tamin'ny taranany no nipoiran'ny faharatsiam-pitondrantena nahatonga ny fandringanana izao tontolo izao tamin'ny Safodrano. (...) Tsy nampitsahatra ny faharatsiany ny fahari-pon’Andriamanitra; arakaraka ny fahelan'ny andro niainany no nitomboan'ny toetra ratsiny." - PM, tt. 311,312 (пр).

FANONTANIANA hifanakalozan-kevitra

1. Saintsaino ny amin'ilay fanontaniana any amin'ny faran'ny lesona Alatsinainy. Amin'ny fomba ahoana no mety hiankohofantsika amin'ny voary noforonina, fa tsy amin'ny Mpamorona? Ohatra, ahoana no hahaizantsika mitandrina tsara ny tany sy miaro ny tontolo iainana kanefa tsy mivavaka aminy na manao azy ho sampy?

2. Azo fantarina ny haratsin'ny toe-javatra amin'ny alalan'ny voka-dratsy ateraky ny asa iray na amin'ny alalan'ny fihetsika asetrin'ny olona ilay zava-mitranga. Nahoana i Mosesy no nibaiko ny olona mba hamono ireo izay niziriziry nandà tsy hibebaka ka nanohy ny fikomiany tamin’Andriamanitra sy ny fampianarany?

3. Nahoana no tsy misy endrika fanavotana hafa mety hahazoan'ny mpanota famonjena afa-tsy ny fanavotana amin'ny alalan'ny fisoloana? Nahoana ny tsangan-kevitra rehetra momba ny fanavotana, izay mandà na manamaivana ny fanavotana nisoloan'i Jesôsy antsika teo amin'ny hazo fijaliana, izay fototra lorenan'ny filazantsara, no fahadisoana lehibe ara-teolojia? Vakio ny 1 Pet 2:24. Ahoana no anehoan'io andininy io mazava tsara fa nisolo antsika i Jesôsy ?

FAMPIDIRANA 

Hodinihina mandritra ny herinandro:  Eks. 33:7-34:35; Deo. 18:15,18; Jao. 17:3; Rôm. 2:4; Jao. 3:16; 2 Kôr. 3:18.

Tsianjery:

"Ary Jehôvah nandalo teo anatrehany ka niantso hoe: Jehôvah , Jehôvah , Andriamanitra mamindra fo sy miantra, mahari-po sady be famindrampo sy fahamarinana, mitahiry famindrampo ho an'ny olona arivo mandimby, mamela heloka sy fahadisoana ary fahotana, kanefa tsy mety manamarina ny meloka, fa mamaly ny heloky ny ray amin'ny zanaka sy ny zafy hatramin'ny zafiafy sy ny zafindohalika." - Eks. 34:6,7.

Ilaintsika rehetra ny mitombo, eo amin'ny fiarahantsika mandeha amin' Andriamanitra. Raha tsy mitombo mantsy isika dia maty. Hoy ny apostoly Petera: "fa mitomboa amin'ny fahasoavana sy ny fahalalana an'i Jesôsy Kristy, Tompontsika sy Mpamonjy. Ho Azy anie ny voninahitra ankehitriny sy mandrakizay. Amena." - 2 Pet. 3:18. Tokony haniry ny hitombo isika. Mianatra isan'andro ao amin'ny oniversiten'Andriamanitra isika, dia izay tsy misy fanolorana mari-pahaizana fa misy dingam-pianarana maharitra kosa. Eo amin'ny dingam-pitomboana tsirairay, dia azonao atao ny ho tonga tanteraka raha avelanao Andriamanitra hamolavola anao ho tonga araka izay iantsoany anao ao amin'i Kristy.

Eritrereto ny amin'ny sekoly anankiray. Raha mianatra mamaky teny sy manisa hatramin'ny 100 ny mpianatra ao amin'ny kilasy voalohany, dia mahazo naoty hifindrany kilasy satria tanteraka ny fahalalany eo amin'ny dingana sy ny ambaratongam-pitomboana misy azy. Raha izany fari-pahalalana izany ihany anefa no hita ao amin'ny mpianatra iray any amin'ny lisea, dia tsy fahombiazana lehibe eo amin'ny fianarany no tondroin'izany. Tahaka izany koa ny fitomboantsika ao amin'ny fahasoavana sy ny fahalalana an'Andriamanitra. Azontsika atao ny ho tanteraka eo amin'ny tontolontsika, eo amin'ny dingam-pitomboana tsirairay lalovantsika, tahaka an'i Kristy teo amin'ny Azy.

Hianarantsika amin'ity herinandro ity ny formba nitomboan'i Mosesy, tamin'ny alalan'ny fahafantarany sy ny fanarahany ny torolalan'i Jehôvah , teo amin'ny fiarahany nandeha Taminy.

*Famerenana ny lesona ny sabata 20 Septambra.