Vakio ny Gen. 18:1-15. Inona avy ireo toetra maneho havana mampiantrano vahiny hita teo amin'ny fihetsik'i Abrahama tamin'ireo vahininy?
Nafana ny andro, ary nipetraka teo am-baravaran'ny lainy i Abrahama. Tsy mahazatra io fihetsika io. Tamin'izany andro izany, rehefa fotoam-pahavaratra, amin'ny mitataovovonana, dia mitady fialokalofana sy tso-drivotra mangatsiatsiaka ny olona rehetra. Saingy angamba niaritra ny hafanana teo i Abrahama mba hanampy raha sendra misy olona mandalo eo?
Teo no nahitany mpivahiny telo lahy. Toa efa fanaony mihitsy ny mikarakara sy mampiantrano vahiny. Noho izany dia nanao ny dingana voalohany hisian'ny fihaonana i Abrahama. Araka ny voasoratra dia nihazakazaka nitsena ireo mpivahiny avy teo am-baravaran'ny lainy i Abrahama; izy no nanapa-kevitra hanatona azy ireo mialoha ny nanatonan'ireo azy.
"Aoka hangalana rano kely hianareo hanasana ny tongotrareo; ary aoka mba hiala sasatra kely eo am-pototry ny hazo hianareo; dia haka mofo kely aho hataonareo ody am-bavafo; ary rehefa afaka izany, dia handeha ihany hianareo; fa tonga ai57 amin 'ny mpanomponareo hianareo." - Gen. 18:4,5.
Fantar'i Abrahama ny asa nanirahana azy, dia ny hizara amin'ny rehetra ny fahalalana an'Andriamanitra eo anivon'ny tontolo tafalentika lalina tao anatin'ny fanompoan-tsampy isan-karazany.
Ary "efa mihoatra ny arivo ny isan'ny fanahy ao anatin'ny tokantrano lehiben’ i Abrahama. Maro amin'izy ireo no loham-pianakaviana, ary tsy vitsy amin’izy ireo no mpanompo sampy vao niova fo. Raha fampianarana osaosa na tsy miorina tsara dia tsy ho nandaitra velively. (...) Koa dia nahatratra hatrany ivelan'ny tokantranony ny hery miasa mangina avy amin'i Abrahama. Na taiza na taiza no nanorenany ny lainy dia nanorenany alitara koa hanaovana fanatitra sy fanompoam-pivavahana. Rehefa nesorina ny lay dia nitoetra kosa ny alitara; ary maro ny Kananita mandalo, izay nahalala an’Andriamanitra noho ny oha-piainana nasehon'i Abrahama, no nijanona teo amin'izany alitara izany mba hanolotra fanatitra ho an 'i Jehôvah . " — FK, tt. 205,206.
Hatrany am-boalohany dia takatr'ity lehilahy ity fa niantso azy hamita iraka Andriamanitra, ka ny fandehanany ho any amin'ilay Tany nampanantenaina dia tsy ho fialan-tsasatra tsy akory fa ho fitahiana ho an'ireo manodidina azy, ary ho an'izao tontolo izao koa amin'ny alalan'ny taranany.
Inona ireo lesona avy amin'ny ohatra fampiantranoam-bahiny nasehon'i Abrahama, izay azonao ampiharina eo amin'ny fiainanao koa?