JOSOA, ILAY TANDINDONA
Araka ny hitantsika momba ny tandindona ao amin'ny Baiboly, midika inona ny fitoviana maro hita eo amin'ny fiainan'i Mosesy sy ny fiainan'i Josoa? Jereo ny Eks. 3:1,2; Jos. 1:1-3; Nom. 13:1,2; Jos. 2:1: Eks. 3:5; Jos. 5:15.
Araka ny efa hitantsika tamin'ny herinandro voalohany, dia aseho ho Mosesy vaovao i Josoa teo amin'ny fiainan'ilay taranaka faharoa, ary naveriny ireo dingana manan-danja indrindra nandritra ny nialan'ny vahoaka Isiraely avy tany Egypta. Toa an'i Mosesy dia nihaona manokana tamin'ny Tompo izy, ary nomeny iraka hotanterahina. Nanetsika tahotra sy fanajana tao amin'ireo firenena manodidina ny lazan'ny Isiraely na teo ambany fitarihan'i Mosesy na teo ambany fitarihan'i Josoa. I Mosesy no nitarika ny Isiraely tamin'ny fiampitana ny Ranomasina Mena, ary i Josoa kosa no nitarika ny Isiraely tamin'ny fiampitana ny Ony Jordana tamin'ny fomba mahagaga. Samy nampahatsiahy ny ilana ny famorana sy ny maha zava-dehibe ny Paska ireo mpitarika roa ireo. Tamin'ny andron'i Mosesy no nanomboka nilatsaka ny mana, ary tamin'ny andron'i Josoa no nifarana izany. Samy nodidiana hanala ny kapany izy roalahy. Nidika fandresena ho an'ny Isiraely ny fanandratan'izy ireo ny tanany. I Mosesy no nanome toromarika momba ny fizarana ny tany sy ny fanorenana ireo tanana fandosirana. I Josoa kosa no nanatanteraka ireo toromarika ireo. Samy nanao anatra farany ho an'ny Isiraely izy roa lahy tamin'ny fiafaran'ny asa fanompoany, sy nanao antso hanavaozana sy hanamafisan'izy ireo ny fanekeny tamin'Andriamanitra.
Diniho ny Deo. 18:15-19, Deo. 34:10-12, Jao. 1:21, Asa. 3:22-26, ary ny Asa. 7:37. Iza no nahatanteraka ny faminanian'i Mosesy momba ilay mpaminany tahaka azy? Hatraiza no ifanarahan'izany amin'l Josoa?
Ny fiainan'i Josoa dia fahatanterahan'ny ampahany tamin'ny faminaniana nataon'i Mosesy (Deo. 18:15,18). Tsy tanteraka tamin'ny fahafenoany anefa ny hevitry ny faminaniana nataon'i Mosesy. Tsy tanteraka tanteraka amin'ny heviny feno io faminaniana io raha tsy tamin'ny alalan'ny Mesia. Izy no mahalala tsara ny Ray (Jao. 1:14,18); Izy no marina ary nanambara an'Andriamanitra tamim-pahamarinana (Lio. 10:22; Jao. 14:6; Mat. 22:16). Andriamanitra tokoa no nametraka ny Teniny tao am-bavany (Jao. 14:24). Koa ny fiainan'i Mosesy sy ny an'i Josoa dia samy tonga tandindona maneho an'i Jesôsy , Ilay Mesia ho avy.
Eo amin'ny fiarahanao mandeha amin'Andriamanitra, toerana manao ahoana no tanan'i Jesosy? Nahoana no tsy maintsy atao fototra iorenan'ny fiainanao manontolo amin'ny maha kristianina anao i Jesôsy sy izay nataony ho anao?