Hodinihina mandritra ny herinandro: Eks. 21:1-32, Eks. 22:16-23:33, 2 Mpanj. 19:35, Mat. 5:38-48, Rom. 12:19, Mat. 16:27.
Tsianjery:
"Ary hoy Jehôvah tamin'i Mosesy: Izao no lazaonao amin'ny Zanak'Isiraely: Hianareo efa nahita fa tany an-danitra no nitenenako taminareo. Koa aza manao andriamanitra volafotsy na andriamanitra volamena ho anareo ho fanampiko." - Eks. 20:22,23.
Tian'Andriamanitra ny hiavahan'ny vahoakany amin'ireo firenena manodidina azy. Tiany haorina ho fikambanan'ny mpino feno fanoloran-tena, izay handeha eo ambanin'ny fitarihany sy ny fahefany izy ireo. Hilefitra eo ambanin'ny lalàny ny rehetra. Nisy mpitsara notendrena hiandraikitra ny fampiharana ny lalàna, ary ny mpisorona no hampianatra izany. Nitana anjara toerana lehibe koa ny ray aman-dreny.
Ao amin'ny kolontsaina rehetra, ny lalàna dia manambara ny firehan-kevitra, ny tanjona kendrena, ny fikasan'ilay mpanao lalana, ary ny toetrany. Ohatra, rehefa namoaka didy ny hamonoana ny zazalahy Hebreo rehetra i Farao, dia nampiseho ny toetrany io lalàna io: toetra ratsy. Raha mamoaka lalana kosa ny mpanjaka fa izay olona 18 taona rehetra ao amin'ny fanjakana dia hahazo fanabeazana ambony maimaim-poana, dia maro no handray izany ho porofon'ny fahalalahan-tanan'ny mpanjaka sy ny faniriany hampandroso ny fireneny.
Manambara ny tenany ny lalàn'Andriamanitra, izany hoe, ny fahatsarany, ny fitiavany, ny fahendreny, ny fahamarinany, ary ny fanoherany ny faharatsiana. Satria masina sy marina ny lalana, dia toy izany koa Andriamanitra. Sady mitondra fiainana be dia be ho antsika ny lalàna, no miaro antsika amin'ny loza sy ny fahavoazana. Ny fanajana an'Andriamanitra sy ny hafa ary ireo soatoavina eo amin'ny fiainana no fototry ny lalàn'Andriamanitra.
*Famerenana ny lesona ny sabata 30 Aogositra.