"Fa efa maty hianareo, ary ny fiainanareo miara-miafina amin'i Kristy ao amin'Andriarnanitra. Raha hiseho Kristy fiainantsika, dia hiara-miseho aminy koa amin'ny voninahitra hianareo." - Kôl. 3:3,4
Mofon'aina:
Aoka hamirapiratra amin'ny asa tsara ny fahazavanao. "Hianareo no fanasin'ny tany; fa raha ny fanasina no tonga matsatso, inona indray no hahasira azy? Tsy misy heriny hanaovana na inona na inona intsony izy, fa hariana any ivelany ka hohitsahin'ny olona." -Mat. 5:13. Manahy aho fa maro no ao anatin'izany. Tsy mitovy ny asa tokony hataon'ny rehetra; toe-javatra sy talenta samy hafa no mamaritra ny tsirairay ho amin'ny sokajin'asa samy hafa ao amin'ny tanimboaloboky ny Tompo. Misy ireo izay manana andraikitra lehibe kokoa noho ny hafa kanefa samy nomena ny asany avy ny tsirairay, ary raha manao ny asany amim-pahatokiana sy amim-pahazotoana izy dia mpitantam-pananana mahatokin'ny fahasoavan'Andriamanitra.
Tsy ny hamirapiratan'ny fahazavanao mba hideran'ny olombelona anao noho ny teny na ny asa soa ataonao no fikasan'Andriamanitra, fa ny hanomezam-boninahitra sy hanandratana ilay Mpanao ny soa rehetra. Nanome môdelin-toetra tokony harahin'ny olombelona i Jesôsy teo amin'ny fiainany. Hoy Izy: "Ny haniko dia ny manao ny sitrapon'izay naniraka Ahy sy ny mahavita ny asany." - Jao. 4:34. Raha manana izany fanoloran-tena ho amin'ny asan'Andriamanitra izany isika ka tsy mikendry afa-tsy ny hahazoany voninahitra, dia ho azontsika atao ny hiara-miteny amin'i Kristy hoe: "Izaho tsy mitady ny voninahitro" - Jao. 8:50. (...) Ireo izay maneho ny taratry ny fahazavan'Andriamanitra dia hikolokolo toetra be fitiavana. (...) Ho mora fo izy ireo ary hahafoy tena, hiasa amin'ny fitiavana mivaivay ho famonjena fanahy maro. (...)
Ireo mpitondra fahazavana marina dia hanazava ny lalan'ny hafa. Aoka ireo izay miantso ny anaran'i Kristy hiala amin'ny faharatsiana rehetra. Raha manao araka izay takin'Andriamanitra ianao ary manaiky handray ny fitiavany sy ho fenon'ny fahatanterahany, dia hijery anao ny ankizy sy ny tanora (...) ka hahita ny fampiharana ny toe-panahy araka an'Andriamanitra; ary amin'izany no hahatonga anao ho fitaovana hitarika azy ireo ho amin'ny lalan'ny fankatoavana an'Andriamanitra. Hery miasa mangina izay voazahan'Andriamanitra toetra no hampiasainao amin'izany (...). - RC, t. 41.