Mifanaraka indrindra amin'izay nodinihintsika nandritra ity herinandro ity, momba ireo mpitondra ny hafatr'Andriamanitra ao amin'ny Baiboly, ny fanandramana niainan'i Ellen G. White sy ny asa sorany. Nahazo iraka avy amin'Andriamanitra koa izy hanoratra izay naseho taminy.
Nanoratra toy izao i Ellen G. White tamin'ny taona 1909: "Noho ilay loza izay saika nahafaty ahy dia nanjary narefo ny fahasalamako ka tsy nahavita nanoratra aho. (...) Kanefa indray alina dia tonga teo anilan'ny fandriako ny anjelin'ny Tompo ka niteny tamiko hoe: 'Tsy maintsy soratanao ireo zavatra izay omeko anao.' Hoy aho: 'Tsy mahay manoratra aho.' Dia naverina indray ny baiko hoe: 'Soraty ireo zavatra omeko anao.' Nisaina tato am-poko ny hanandrana hanoratra aho, ka naka takelaka fanoratana teo ambony latabatra, dia nanomboka nanoratra, ary hitako fa nahay nanoratra mora foana ireo teny aho." - GCB, 31 Mey 1909.
Tahaka ireo mpanoratra ny Soratra Masina, dia nanana olona nanampy azy tamin'ny fanoratana koa i Ellen G. White. Ireo sekreterany no nanao ny asan'ny tonian-dahatsoratra, izany hoe manampy ny mpanoratra hampita ny hafany amin'ny fomba mazava nefa tsy manampy ny heviny manokana. Tsy mpanoratra miafina ao ambadik'i Ellen White na mpiara-manoratra aminy izy ireo. Niankina tanteraka tamin'ny hafatra nomen'i Ellen G. White ny asan'izy ireo, na nosoratany tanana izany na nambarany am-bava.
Naka lahatsoratra sy hevitra avy amin'ny boky sy loharanon-kevitra hafa koa i Ellen G. White tao amin'ny asa sorany mba ho tafita tsara kokoa ny hafany. Raha nampirisika ireo mpamaky ny bokiny izy hamaky ny sasany amin'ireo boky izay nampiasainy, dia mazava fa tsy nikasa ny hamitaka na hanao ny tsy rariny tamin'ireo mpanoratra ireo izy. Hitany tao amin'ny fitenin'izy ireo kosa ny fomba fanehoan-kevitra mety indrindra hampitana ireo fahamarinana tiany hambara.
Ahoana indray ny amin'ireo hevitra sasany tsy mitombina na tsy mifanaraka?
Izao no nosoratany: "Tsy mbola nilaza velively aho fa tsy mety diso; Andriamanitra irery ihany no tsy mety diso." - SIM, b. 1, t. 37.
Mety hahita fanambarana sasany ao amin'ny asa sorany isika izay saro-takarina na tsy mifandrindra amin'ny fanambarana hafa. Tsy nofoanana tsy akory ny maha olombelona an'i Ellen G. White noho ny fiantsoana azony avy amin'Andriamanitra. Tahaka antsika rehetra dia nitombo sy nihamatotra izy, ary hita taratra ao amin'ny asa sorany izany fitomboana sy fahamatorana izany.
Araka izay efa voalaza, nefa ilaina averina indray, dia nahitsiny koa ireo olona izay nihevitra fa ny teny rehetra nosoratany dia voarainy mivantana avy any an-danitra. Hoy izy: "Misy fotoana izay tsy maintsy niresahana zavatra tsotra andavanandro sy nieritreretana momba izany; tsy maintsy nisy taratasy tsotra nifampitana hafatra teo amin'ny mpiasa iray mankamin'ny anankiray hafa. Ny teny sy ny fampahafantarana toy izany dia tsy avy amin'ny tsindrimandrin'ny Fanahin'Andriamanitra manokana." - SIM, b. 3, t. 58.