"Ary misasatra miasa amin'ny tànanay izahay; raha tevatevaina izahay, dia misaotra; raha enjehina, dia miaritra." — 1 Kôr. 4:12.
Mofon’aina:
Tamin'ny famoronana dia natao ho fitahiana ny asa. Nitondra fandrosoana, hery, sy fahasambarana izany. Ny fiovan-toetran'ny tany noho ny ozon'ny ota dia nitondra fiovana teo amin'ny toetran'ny asa. Na dia arahina tebiteby sy havizanana ary fanaintainana aza izany ankehitriny dia mbola loharanom-pahasambarana sy fandrosoana hatrany. Fiarovana amin'ny fakam-panahy koa izany. Ny fepetra takiny dia mampihena ny hakamoana, ary mahatonga fahazotoana, fahatokiana, ary fahamatorana kosa. Araka izany dia manjary tafiditra ao anatin'ilay drafitra lehibe nataon'Andriamanitra hanarenana antsika avy amin'ny Fahalavoana izany.
Tokony hampiana ny tanora [sy ny hafa] hahita ny tena mahatsara ny asa. Asehoy azy ireo fa Andriamanitra dia miasa mandrakariva. Ny zava-drehetra ao amin'ny natiora dia samy manao ny asa nampiandraiketina azy avokoa. Fiainan'ny zavaboary manontolo ny asa, ary mba hahavitantsika ny iraka nampanaovina antsika dia mita miasa koa isika.
(...) Asehoy fa rehefa namorona sy niahy ny zavatra rehetra Andriamanitra dia nanome antsika fahefana iza tsy lavitra ny Azy. Nomeny antsika ny fifehezana ny herin'ny natiora amin'ny lafiny sasantsasany. Tahaka ny nanamboaran'Andriamanitra tany tsara tarehy avy amin-javatra tsy misy endrika, isika koa dia afaka manamboatra ny fikorontanana ho filaminana sy hatsarana. Ary na dia simba noho ny faharatsiana avokoa aza ny zava-drehetra ankehitriny dia mbola mahatsapa fifaliana ihany isika rehefa nahavita ny asantsika; toa Azy koa, rehefa nandinika ny tany vao avy noforoniny Izy dia nanao hoe "Tsara indrindra izany."
Ny fanaovana asa ilaina no hahazoan'ny tanora tombontsoa be indrindra ankapobeny. Ny lalao indray dia sady mampiala voly ny ankizikely no mampitombo azy; ary ny fanatanjahan-tena tokony hataony dia tsy izay mampandroso azy ara-batana fotsiny fa ara-tsaina ary ara-panahy koa. Rehefa mandroso tanjaka sy fahaizana izy dia ny fampanaovana azy ezaka ara-batana mahasoa no fakan-drivotra mety indrindra ho azy. Izay manazatra ny tanan'ny tanora hanampy sy mampianatra azy hizaka ny anjara entany eo amin'ny fiainana no mahomby indrindra amin'ny fampivoarana ny saina sy ny toetra. - Fk, tt. 239, 240, np.