"Manisy soa izao tontolo izao Jehôvah; ary ny fiantremy dia eny amin'ny asany rehetra. Jehôvah midera Anao ny asanao rehetra; ary ny olonao masina misaotra Anao." – Sal. 145:9,10.
Mofon’aina:
Tiantsika ny mandinika ny toetran'Andriamanitra sy ny fitiavany eo amin'ireo voary noforoniny. Akory re ny hamaroan'ny porofo nomeny ny zanak'olombelona momba ny Heriny sy ny Fitiavany amin'ny maha Raintsika Azy! Nohain-goiny ny habakabaka ary nataony kanto sy mahafinaritra ny tany. "Jehovah, Tomponay ô, endrey ny voninahitry ny anaranao amin'ny tany rehetra! (...) Raha jereko ny lanitrao, izay asan 'ny rantsan-kinanao, sy ny volana aman-kintana, izay noforoninao, Inona moa ny olona, no ahatsiarovanao azy? Ary ny zanak 'olombelona, no amagianao azy?" - Sal. 8:1, 3, 4. (...) Raha noforonina hitovy tantana izao tontolo izao dia ho nandreraka ny maso sy nanasatra ireo retsi-pandrentsika ny fitovian'ny zavatra rehetra.
Noravahan'Andriamanitra tamin'ny tendrombohitra lehibe sy ny havoana ary koa ny lohasaha (...) ny tany. Ny tendrombohitra rakotra vatomainty maraorao sy ireo izay voaravaka zava-maitso sy hazo paina ary ireo lohasaha maro feno hatsaran-tarehy mirindra dia mahatonga an'izao tontolo izao ho toy ny fitaratra maneho endrika kanto. Hita hatraiza hatraiza ny fahatsaran'Andriamanitra sy ny fahendreny ary ny heriny. (...) Tsy mahatsiaro ho irery mihitsy aho rehefa mijery ny hakanton'ny zavaboary. Nandritra ny dia nitetezana ireo lemaka sy tendrombohitra, dia fanajana sy fahatahorana lalina indrindra no tsapako teo am-pahitana ny hantsana mahatahotra sy ireo tampon-tendrombohitra rakotra ranomandry. Tokony ho sekoly hianarantsika momba ny toetran'Andriamanitra (...) ny tendrombohitra sy ny havoana ary ireo lohasaha. Ny asan'Andriamanitra izay hitantsika eo amin'ireo zavaboary samy manana ny endriny – (...) eny amin'ny hazo sy ny kirihitra ary ny voninkazo, eo amin'ny raving tsirairay sy ny ahitra — dia tokony handraisantsika lesona ny amin'ny fahaiza-manao ananan'Andriamanitra sy ny fitiavany ary ny heriny tsy misy fetra.
Tsy mba hanirery mihitsy ireo izay mandinika ny zavaboary. Tiany ny ora mangina hitokanana, satria amin'izany no ahatsapany fa manakaiky an' Andriamanitra Izy eo am-pandinihana ny Heriny eo amin'ireo voary noforoniny. – L 43, 1875.