Manerana ny filazantsaran'i Jaona, dia lazalazain'ilay Apôstôly ny fanaovan'i Jesôsy, ilay Zanaka, ny asa izay manondro ny Ray. Hazavain'i Jesôsy hoe iza ny Ray ary asehony ny Fifandraisany amin'ny tontolo misy antsika. Mifanaraka amin'ny Jao. 1:18 izany rehetra izany, izay milaza fa mampahafantatra ny Ray Izy (Grika exegeomai: manazava, maneho). Imbetsaka i Jesôsy no manao izany. In-136 no ahitana ny teny hoe Ray (pater) ao amin'ny filazantsaran'i Jaona, ary in-18 kosa ao amin'ny 1 Jaona hatramin'ny 3 Jaona. Maherin'ny iray ampahatelon'ny fampiasana io teny io ao amin'ny TV izany. Ny lahateny ho fanaovam-beloma izay nataon'i Jesôsy no anankiray amin'ny toerana ampahafantarany ny Ray ao amin'ny Filazantsara.
Solontenan'ny Ray teto an-tany i Jesôsy, ary tonga nofo mba haneho ny sitrapon'ny Ray. Raha ny marina, dia nambarany fa ny hanao ny sitrapon'ny Ray, fa tsy ny Azy, no notadiaviny amin'ny zavatra rehetra (Jao. 5:30). Toa fanambarana manaitra no fahitana izany raha atao indray mijery, kanefa maneho izany fa nilefitra tanteraka tamin'ny Ray i Jesôsy amin'ny maha-Olona Azy.
Nolazainy koa fa nirahin'ny Ray Izy mba hamita ny Asany - ny famonjena ny taranak'olombelona - ary manambara ny Asany ny Ray (Jao. 5:36-38).
Nambaran'i Jesôsy fa naniraka Azy ny Ray mba hanaovany fanompoana ka amin'ny alalany irery ihany no hahafahan'ny taranak'olombelona manatona ny Ray (Jao. 6:40,44). Irin'ny Ray ny hananan'ny olona ny fiainana mandrakizay izay ao amin'i Jesôsy, Izy izay nampanantena fa hanangana azy ireo amin'ny fananganana amin'ny maty.
Inona ny lesona omen'ireto toko sy andininy manaraka ireto antsika momba ny fifandraisan'i Jesôsy amin'ny Ray? Jao. 7:16: Jao. 8:38; Jao. 14:10,23; Jao. 15:1,9,10; Jao. 16:27,28; Jao. 17:3.
Mahatalanjona ny fanambaran'i Jesôsy mikasika ny fifandraisany amin'ny Ray. Ambarany fa ny fampianarany rehetra dia fampianaran'ny Ray, ary izay lazainy rehetra dia reny avy tamin'ny Ray; izay mino Azy dia toy ny mino ny Ray ihany; ny Teniny sy ny Asany dia samy an'ny Ray; Izy sy ny Ray dia iray ihany ao amin'ny fitiavana ny taranak'olombelona sy ny famonjena azy ireo. Fanambarana miezinezina manao ahoana re izany momba ny firaisana ety ananan'i Jesôsy amin'ilay Rainy izay any an-danitra!
Hiova manao ahoana ny fiainanao raha toa ny fisainanao sy ny asanao maneho amin'ny fahafenoany ny sitrapon'Andriamanitra ho an'izany fiainanao izany? Izany hoe, ahoana no anehoantsika misimisy kokoa fa ny zavatra fantatsika avy amin' i Jesôsy dia sitrapon'Andriamanitra ho an'ny fiainantsika?