Tian'i Jaona apostôly homarihina mazava ao amin'ny Jao. 6:4,5 fa akaikin'ny fotoan'ny Paska no namahanana ireo olona tokony ho dimy arivo. Natao hahatsiarovana ny fanafahana ny Isiraely avy tao Egipta ny Paska. Ny zanak'ondrin'ny Paska no maty nisolo toerana ireo lahimatoan'ny Jiosy. Maneho ny nahafatesan'i Jesôsy ho antsika io sorona io. Teo amin'ny hazo fijaliana no nizakan'i Jesôsy ny famaizana mendrika antsika noho ny fahotantsika. Voavono tokoa i Kristy, Paska ho antsika (1 Kôr. 5:7).
"Nizaka ny heloky ny fandikan-dalàna Izy, sy niaritra ny nanafenan'ny Rainy ny tavany taminy, mandra-pahavaky ny fony sy nahafaka ny ainy. Izany sorona rehetra izany no natao dia ny mba hahazoana manavotra ny mpanota." - HM, t. 562.
Vakio ny Jao. 6:1-14. Inona no itovian'i Jesôsy sy i Mosesy eto? Izany hoe, inona no nataon'i Jesôsy teto izay tokony ho nampahatsiahy ny olona ny fanafahana izay noraisin'ny razany tamin'ny alalan’ny asan'i Mosesy?
Tsipiriany maro ao amin'io tantara io no mampitaha an'i Jesôsy amin'i Mosesy araka ny ao amin'ny Eksodosy. Manondro ilay fanafahana lehibe tamin'ny tany Egipta ny fotoan'ny Paska (Jao. 6:4). Niakatra tao an-tendrombohitra i Jesôsy (Jao. 6:3), tahaka an'i Mosesy niakatra tao an-tendrombohitra Sinay. Nizaha toetra an'i Filipo Izy (Jao. 6:5,6), tahaka ny nizahan-toetra ny Isiraelita tany an'efitra. Ny fampitomboana ny mofo (Jao. 6:11) dia mampahatsiahy ny mana. Mampahatsiaro ny nanangonan'ny Isiraelita ny mana ny nanangonana ny sakafo sisa tsy lany (Jao. 6:12). Nahafeno harona roa ambin'ny folo ny sisan-tsakafo voangona (Jao. 6:13), izay mitovy isa amin'ny foko roa ambin'ny folon'ny Isiraely. Ary ny resaky ny olona nilaza an'i Jesôsy ho mpaminany tonga amin'izao tontolo izao dia mifanindran-dalana amin'ilay "mpaminany tahaka an'i Mosesy" voalaza mialoha ao amin'ny Deo. 18:15. Ireo rehetra ireo dia manondro an'i Jesôsy ho ilay Mosesy vaovao, Izay tonga hanafaka ny olony. Araka izany, tsy i Jesôsy manao famantarana sy fahagagana fotsiny no asehon'i Jaona, fa Izy manao famantarana sy fahagagana izay nisy heviny manokana ho an'ny vahoaka Jiosy, tao anatin'ny tontolon-kevitra nisy azy ireo. Ny tena tian'i Jesôsy naseho tamin'izy ireo dia ny maha-Andriamanitra Azy.
Vakio ny Isa. 53:4-6 sy ny 1 Pet. 2:24. Inona ny fahamarinana lehibe ampianarin'ireo andininy ireo momba an'i Jesôsy amin'ny maha-Zanak'ondrin'Andriamanitra Azy? Ahoana no ifandraisan'ny maha-Andriamanitra Azy amin'io fahamarinana io, ary nahoana no io fahamarinana io no manan-danja indrindra fantatsika?