Hodinihina mandritra ny herinandro: Eks. 18:3,4; Eks. 3:1-22; Gen. 22:11,15-18; Eks. 6:3; Joe. 3:5; Eks. 4:1-31; Gen. 17:10,11.
Tsianjery: " Ary hoy Jehôvah : Efa hitako tokoa ny fahorian’ny oloko izay any Egypta, ary efa reko ny fitarainany noho ny ataon’ny mpampiasa azy; eny, fantatro ny alahelony; dia efa nidina Aho izao hamonjy azy amin’ny tànan’ny Egyptiana ka hitondra azy hiakatra hiala amin’izany tany izany ho any amin’izay tany soa sy malalaka, dia any amin’izay tany tondra-dronono sy tantely, any amin’ny tanin'ny Kananita sy ny Hetita sy ny Amodia sy ny Perizita sy ny Hivita ary ny Jebosita. " – Eks. 3:7,8.
FAMPIDIRANA
Matetika manova ny lalam-piainantsika ny fiantsoan’Andriamanitra antsika. Kanefa, raha manaraka izany antso izany isika, dia hahita fa ny lalan’Andriamanitra no lalana tsara indrindra ho antsika. Na izany aza, indraindray — amin’ny voalohany — dia tsy mora ny manaiky ny antso avy amin’Andriamanitra.
Izany no nahazo an’i Mosesy rehefa nantsoin’Andriamanitra izy, izay nanomboka tamin’ny fihaonany manokana tamin’ny Tompo teo amin’ilay roimemy nirehitra. Na fantatr’i Mosesy na tsia ny lalàna momba ny fandoroana, dia fantany kosa fa zava-mahagaga no natrehin’ny masony, ary nahasarika ny sainy tokoa izany. Tsy isalasalana fa niantso azy hanao asa manokana ny Tompo. Ny fanontaniana mipetraka dia: hamaly ny antso ve izy, na inona na inona fiovana goavana entin’izany eo amin’ny fiainany? Tsy dia narisika loatra izy tamin’ny voalohany.
Angamba tsaroanao ny fotoana nanananao tanjona manokana hotra- trarina, saingy nanova izany drafitra izany Andriamanitra. Marina fa azon’Andriamanitra ampiasaina amin’ny fomba maro isika, saingy ny fanekena ny antson’Andriamanitra eo amin’ny fiainantsika, sy ny fanatanterahana izay asainy ataontsika, no azo antoka fa lalana mankany amin’ny fiainana mahafa-po indrindra. Mety tsy ho mora mandrakariva izany, ary tsy mora tamin’i Mosesy izany, saingy hadalana tokoa ny mizotra any amin’izay tiantsika raha toa ka efa miantso antsika Andriamanitra hizotra amin’ny lalana hafa.