FAMPIDIRANA
Hodinihina mandritra ny herinandro: Gen. 15:16; Lev. 18:24-30; 2 Tim. 4:1,8; Eks. 23:28-30; Deo. 20:10, 15-18; Isa. 9:6.
Tsianjery:
"Ary ireo mpanjaka rehetra ireo sy ny taniny dia azon'i Josoa indray mandeha, satria Jehôvah, Andriamanitry ny Isiraely, no niady ho an'ny Isiraely."- Jos. 10:42
Ahitana toe-javatra vitsivitsy manahiran-tsaina ao amin'ny bokin'i Josoa. Miteraka fanontaniana manan-danja ny hevitra mahakasika ny ady masina, izay ahitana vondron'olona nomen'Andriamanitra baiko mba handringana vondron'olona iray hafa.
Saro-takarina ny momba ny ady masina ao amin'ny TT. Ny fahitana an'Andriamanitra ao mantsy dia Tompo sy Mpanjakan'izao rehetra izao, ka ny zavatra rehetra izay mitranga, araka izany, dia heverina fa araka ny Sitrapony mivantana na tsia. Noho izany, dia manjary tsy azo ihodivirana ny fanontaniana manao hoe: "Nahoana moa no avelan'Andriamanitra hiseho ny zavatra tahaka izany?" Hitantsika tamin'ny herinandro lasa fa Andriamanitra mihitsy no mandray anjara ao anatin'ny ady anankiray izay lehibe lavitra noho ny ady rehetra mety atrehina eo amin'ny tantaran'ny olombelona, ady izay mahakasika ny lafim-piainantsika tsirairay izany. Hitantsika koa fa miorina amin'ny fahatakarana io fifanandrinana io ny fahatakarana amin'ny fahafenoany ireo toe-javatra niseho tao amin'ny Baiboly sy eo amin'ny tantaran'izao tontolo izao.
Hotohizantsika amin'ity herinandro, ity ny fandinihana lalindalina kokoa momba ny ady izay ankasitrahan'Andriamanitra, ny fetran'izany ady masina izany sy ny fepetra mikasika azy, ny fahitana hitan'ireo mpaminanin'ny TT momba ny fiadanana amin'ny hoavy ary ny tsoa-kevitra ara-panahy azo raisina avy amin'ireny ady ireny.
*Famerenana ny lesona ny sabata 01 Novambra.