Tezitra amin'ny ratsy Andriamanitra satria fitiavana Izy. Be fiantrana sy be fahasoavana tokoa Andriamanitra, ary nisy mpaminany iray aza ao amin'ny Baiboly, nanome tsiny an'Andriamanitra satria mahari-po sy be famindrampo loatra Izy!
Jereo ny tantaran'i Jônà ao amin'ny Jônà 4:1-4, ka diniho ny fihetsiny manoloana ny fiantran'Andriamanitra ny Ninivita ka namelany ny helok'izy ireo. Inona no ambaran'izany amintsika mikasika an'i Jônà sy mikasika an'Andriamanitra? (jereo koa ny Mat. 10:8.)
Mifamatotra ny fitiavana sy ny fahamarinana, araka ny Baiboly. Manambara zavatra roa lehibe ny fihetsik'i Jônà teo anatrehan'ny famindrampon'Andriamanitra. Voalohany indrindra, maneho ny hamafin'ny fon'i Jônȧ izany. Halany loatra ny Asirianina noho ny nataony tamin'ny Isiraely hany ka tsy tiany ny hamindran'Andriamantra fo amin'izy ireo.
Lesona lehibe ho antsika izany! Mila mitandrina isika tsy hanana toetra tahaka ny an'i Jônà, na mitombina toy inona aza izany. Ireo izay efa nandray fahasoavana avy amin'Andriamanitra no tokony hahatsapa, mihoatra noho ny hafa rehetra, fa atolotra an'izay tsy mendrika izany velively ny fahasoavana, koa tokony ho vonona hizara fahasoavana amin'ny hafa izy ireo.
Faharoa manaraka izany, ny fihetsik'i Jônà dia manamafy fa toetra fototra ananan’Andriamanitra ny famindrampo sy ny fahasoavana. Diso fantatr'i Jônà loatra ny famindrampon’Andriamanitra - satria, araka ny tsindriany manokana, Andriamanitra dia "mamindra fo sy miantra, mahari-po sady be famindrampo" - Jônà 4:2 - ary fantatr'i Jônà fa hanenina ny amin'ny loza nokasainy hahatra amin'i Ninive Izy.
Azo adika ara-bakiteny hoe "lava orona" ny teny hebreo nadika hoe "malain-ko tezitra" na "mahari-po". Araka ny fomba fiteny hebreo dia ampifandraisina ara- panoharana amin'ny orona ny fahatezerana, ka ny halavan'ny orona no anehoana ny faharetan'ny olona manindry fo mandra-pahatezitra azy.
Koa maneho ny fahari-pon'Andriamanitra sy ny famindrampony ny filazana Azy ho "lava orona". Mora tezitra ny olombelona, Andriamanitra kosa feno faharetana sy fahari- po, ary mandrotsaka maimaimpoana ny fahasoavany manana amby ampy; saingy tsy manamarina ny fahotana na manampi-maso manoloana ny tsy fahamarinana Izy. Andriamanitra mihitsy no nahafoy ny ainy sy nisolo antsika teo amin'ny hazo fijaliana ho fanavotana antsika, mba ho marina sady mpanamarina ireo izay mino Azy Izy (Rôm. 3:25,26).
Ela nataonao ve izany hoe tsy mamindra fo na miantra ny olona nanisy ratsy anao izany? Ahoana ny fomba tsy hanadinoanao izay nataon'Andriamanitra ho anao mba hahatonga anao ho tsara fanahy kokoa amin'ny hafa, noho ny fahatsapanao ny fahasoavana ma nana amby ampy narotsak’Andriamanitra taminao? Ary ahoana no ahaizantsika mamindra fo sy miantra kanefa koa tsy manome vahana ny fahotana na ny fanararaotana na ny fampahoriana?