SABATA HARIVA 13 Avrily
Hodinihina mandritra ny herinandro : Jao. 8:44; Ohab. 23:23; Asa. 20:2732; 2 Tes. 2:7-12; Sal. 119:105,116,130,133,160; Ohab. 16:25; 2 Kôr. 4:3-6.
Tsianjery: "Dia hoy Jesôsy taminy: Mbola kely ihany ny hitoeran'ny mazava aminareo. Mandehana, raha mbola manana ny mazava hianareo, mba tsy hahatratra anareo ny maizina; fa izay mandeha amin'ny maizina dia tsy mahalala izay alehany." — Jao. 12:35.
Ao amin'ny Apôkalipsy, boky farany ao amin'ny Baiboly, dia aseho ho toy ny dragona sy menarana ny devoly (Apôk . 12:9). Dragona izy satria maniry handringana ny vahoakan'Andriamanitra ary menarana satria mampiasa ireo lainga sy hafetsena rehetra mba hamitahana. Tamin'ireo taona nanaraka ny nahafatesan'i Kristy dia olona an'arivony no nampijalina, natsipy hoviravirain'ny Iiona ary nodoran'ny fanjakan'i Rôma teo amin'ny antontan-kitay noho ny nandavany tsy hiankohoka amin'ny "andriamaniny". Na teo anatrehan'izany famaizana mahatsiravina izany aza anefa dia maro no nitoetra ho mahatoky; niely hatrany ny Filazantsara ary nitombo ny fiangonana.
Noho izany dia nanova ny paikadiny i Satana. Mpanompo sampy maro no natao batisa kanefa tsy nahazo fampianarana mafy orina ny amin'ny fahamarinan'ny Baiboly. Nahenika ny fiangonana ny fahadisoana rehefa nampifangaro ny fahamarinan'ny Soratra Masina tamin'ny fomba amam-panaon'ny maro ireo mpitarika. Ny taonjato fahefatra sy fahadimy dia vanim-potoan'ny marimaritra iraisana izay nampifangaroan'ireo mpitarika tao amin'ny fiangonana ny fanao jentilisa tamin'ny fampianarana kristianina.
Na tao anatin'ireo fotoan-tsarotra indrindra teo amin'ny fiainana aza dia niaraka tamin'ny olony mandrakariva Andriamanitra. Nahita an'i Jesôsy, Ilay "lalana sy fahamarinana ary fiainana" izy ireo; ary noho ny herin'ny Fanahy Masina dia tafajoro izy ireo na dia niatrika fanerena mafy aza mba handao ny faharesen-dahatra tao anatiny. Nitoetra ho mahatoky tamin'ny sitrapon'Andriamanitra voambara ao amin'ny Soratra Masina izy ireo, ka niaro ny fahamarinan'ny Teniny tamin-kerim-po na teo aza ny fanerena natao taminy mivantana na ankolaka.