Vakio ny Mar. 6:1-6. Rehefa tonga tany amin'ny taniny i Jesôsy, nahoana ny olona tao no nandà Azy?
Mahafaly ny mponina ao amin'ny tanàna kely iray, raha ny ankapobeny, ny fisian'ny olona iray avy ao an-tanànany manjary fanta-daza; manondrotra ny tombambidy omen'ny olona ny tanàna mantsy izany. Tsy mba toy izany kosa i Nazareta. Nanafintohina sy nanaitra azy ireo ny fahombiazan'i Jesôsy amin'ny maha-mpampianatra sy mpanasitrana Azy. Toa sarotra ho azy ireo ny manaiky fa niala tamin'ny maha-mpandrafitra ho amin'ny maha-mpampianatra i Jesôsy. Mety ho feno fangidiana koa izy ireo satria tany Kapernaomy no nanaovanli Jesôsy ny ankamaroan'ny fahagagany (jereo ny Lio. 4:23). Ary ankoatra izany dia efa nisy tsy fifankahazoana teo amin'i Jesôsy sy ny fianakaviany (Mar. 3:31-35).
Vakio ny Mar. 6:7-30. Misy fifanoherana eo amin'ny asa nanirahana ny mpianatra roa ambin'ny folo lahy sy ny nanapahan-doha an'i Jaona mpanao batisa; amin'ny fomba ahoana?
Eto no ahitantsika ny "Sandwich Story" (tantara mifanosona) fahatelo ao amin'ny bokin'i Marka (jereo ny lesona 3). Mifanipaka tanteraka amin'ny nampidirana am-ponja an'i Jaona mpanao batisa sy ny fanginany ny iraka nampanaovina ny mpianatra mba hitondra ny hafatri Jesôsy na aiza na aiza. Tsy nasaina nitondra entana betsaka ny mpianatra nandritra ny diany, ary nasaina niankina tamin'ny fanampian'ny hafa. Izany fomba izany dia mahatonga ireo misiônera hiankina tanteraka amin'ireo olona anaovany asa fanompoana, ka mampifandray ety azy amin'ireo izay mila ny hafatra entiny.
Tsy mba nanana izany fifandraisana ety izany tamin'i Heroda sy ny fianakaviany i Jaona mpanao batisa. Voatantara amin'ny tsipiriany mahatohina ny nahafatesan'i Jaona, rehefa nohararaotin'i Herodiasy ny toetran'i Heroda mpivadibadika sy tia filan'ny nofo. Nanampy tamin'ny fanatanterahana ilay teti-dratsy ny nanaovan'ny zanakavavin'i Herodiasy fangatahana mamohehatra, dia ny hanomezana azy ny lohan'i Jaona mpanao batisa ho eo an-dovia.
Nampanginina ilay feo fampitandreman'i Jaona, kanefa nandritra izany ny apôstôly roa ambin'ny folo lahy dia nitory ny fibebahana, tahaka ny nataon'i Jaona mpanao batisa ihany. Naneho ara-tandindona ny ho fiainan'i Jesôsy ny fahafatesan'i Jaona. Maty i Jaona, nalevina, ary voalaza fa nitsangana tamin'ny maty (Mar. 6:14-16,29), dia tahaka izay nitranga Jesôsy koa taoriana kely (Mar. 15 sy ny 16). Nanondro ny fotoan-tsarotra holalovanl Jesôsy sy ny mpianany izany.
Efa nolavina toa an'i Jesôsy ve ianao, na nandalo fotoan-tsarotra izay tsy takatrao ny antony? Inona ny lesona noraisinao avy tamin'ireny fanandramana ireny izay mety hanampy anao hiatrika ny toy izany amin'ny manaraka?