Hodinihina mandritra ny andro: Apôk. 22:11,12; Jer. 30:5-7; Sal. 91:1-11; Jer. 25:33; Apôk. 21:2; Apôk. 20:11-15.
Tsianjery: "Ary nahare feo mahery avy teo amin'ny seza fiandrianana aho nanao hoe: Indro, ny tabemakelin' Andriamanitra dia eo amin'ny olona, ary Izy hitoetra eo aminy, ary ireo ho olony, ary Andriamanitra no hitoetra eo aminy, dia ho Andriamaniny. Ary hofafany ny ranomaso rehetra amin'ny masony; ary tsy hisy fahafatesana intsony, sady tsy hisy alahelo, na fitarainana, na fanaintainana; fa efa lasa ny zavatra taloha."- Apôk. 21:3,4.
Azontsika atao ny miatrika ny hoavy amin'ny fo feno fanantenana. Na dia hisy aza ny fotoan-tsarotra, na inona na inona fahoriana tsy maintsy holalovantsika, na inona na inona zava-tsarotra tsy maintsy hiaretantsika, na inona na inona alahelo tsapantsika, raha manantena isika fa ho avy ny andro tsara kokoa, dia hiaina fiainana misy heviny sy tanjona ary feno fifaliana isika ankehitriny. Filoham-pirenen'i Etazonia nanomboka tamin'ny 1933 haramin'ny 1945 i Franklin D. Roosevelt, anisan'ny vanim-potoana sarotra indrindra teo amin'ny tantaran'i Etazonia izany. Nalemy vokatry ny polio izy ary tsy afaka nandeha raha tsy nisy mpanampy. Izao no nosoratany indray andro: "Isika dia nifikitra mandrakariva tamin'ny fanantenana, sy ny finoana ary ny faharesen-dahatra fa misy tontolo tsara kokoa any ambadiky ny faravodilanitra." I Albert Einstein indray, izay anankiray amin'ireo lehilahy manam-pahaizana indrindra teto an-tany, dia nanoratra hoe: "Mianara amin'ny omaly, iaino ny anio, ary antenao ny ampitso." Izao kosa no nosoratan'ny pôeta anglisy fanta-daza nandritra ny fanjakan'ny mpanjakavavy Victoria, Alfred Lord Tennyson: "Mitsiky eo an-tokonan'ny taona vao mitsidika ny fanantenana, ary mibitsibitsika hoe: 'ho taona sambatra kokoa ity.'"
Ao anatin'ity lesona farany amin'ity telovolana ity no hahitantsika ny fitiavana tsy miova ananan'i Kristy tao anatin'ny fotoana nihotakotaka indrindra teo amin'ny tantaran'izao rehetra izao, ary hahitantsika koa ny fandreseny feno sy tanteraka eo amin'ny fifanandrinana lehibe ifanaovan’ny tsara sy ny ratsy. Ny boky farany ao amin'ny Baiboly, ny Apôkalipsy, dia manome fanantenana ho antsika, anio sy rahampitso ary mandrakizay.