Ao anatin'ny fotoan-tsarotra ho avy izay mahakasika ny fiankohofana, dia tsy hanaiky ho resin'ny fanerena ataon'izao tontolo izao ireo vahoakan'Andriamanitra mahatoky (Apôk. 14:12). Ny Fanahy Masina no nanisy tombokase azy ireo (Efes. 4:30), ary tsy ho voahozongozona izy. Tamin'ny andro fahiny, ny tombokase dia nanamafy ny fahamarinan'ny antontan-taratasy Ofisialy iray. Marika miavaka sy an'ny tompony manokana izany. Koa satria ny fiankohofana sy ny fahefan'Andriamanitra araka izay ambaran'ny Lalàny no ivon'ny fifanandrinana farany, dia heverintsika fa voarakitra ao amin'ny Lalàn'Andriamanitra ny tombokaseny (ampitahao amin'ny Isa. 8:16).
Vakio ny Eks. 20:8-11. Singa inona ao amin'ny tombokase no hita ao amin'ny didy mikasika ny Sabata?
Indreto misy singa telo hita ao amin'ny tombokase anankiray: (1) ny anaran'ny tompon'ilay tombokase, "Jehôvah Andriamanitrao." (2) ny toerana tanany, Ilay "nanao..." - ny Mpamorona. (3) Ny fari-piadidiany, "ny lanitra sy ny tany sy ny ranomasina mbamin'izay rehetra ao aminy." Matetika no iantsoana ny tombokase hoe famantarana ao amin'ny Baiboly (Rôm. 4:11). Azo ampifandimbiasana ny fampiasana ireo teny ireo. Famantarana na tombokase ao amin'ny fon'ny Lalàn'Andriamanitra ny Sabata, ary izany no ivon'ny fifanandrinana farany mahakasika ny fiankohofana (Ezek. 20:12,20; 12:17). Ampitahao amin'ny Apôk. 13:16, 17 ny Apôk. 7:1,2 sy ny Apôk. 14:1. Aiza no andraisana ny tombokasen'Andriamanitra sy ny mariky ny bibidia? Araka ny hevitrao, nahoana no misy fahasamihafana eo amin'ny fandraisana izany?
Eo amin'ny handrina no apetraka ny tombokasen'Andriamanitra. Sary maneho ny fisainana sy ny fanapahan-kevitra vokatry ny fieritreretana ny handrina. Ny mariky ny bibidia indray dia raisina eo amin'ny handrina na ny tanana, izay manondro fa resy lahatra ny sain'ny olona ary vokatry ny safidiny manokana no anekeny ireo laingan'i Satana, raha tsy izany indray dia manaraka ny fiankohofana sandoka izy ireo mba tsy hovonoina.
Halan'ny devoly ny olona mankato an'Andriamanitra. Tonga amin'ny fara tampony ny fifanandrinana lehibe rehefa injay i Satana miady amin'ireo mpino sisa izay "mitandrina ny didin'Andriamanitra sy ny finoana an'i Jesôsy - Apôk. 14:12. Mitoetra mafy ao amin'ny fahatokiany amin'i Kristy izy ireo.
Ny fahatokiana amin’Andriamanitra isan’andro isan'andro no tsiambaratelon'ny fahavononana ho amin'ny fotoan-tsarotra farany, nahoana?