"Nitodika aho, ka nampiasaiko ny foko hahalala sy handinika ary hitady fahendrena sy izay anton-javatra ary hahafantatra ny faharatsiana ho fahadalana, ary ny fahadalana ho fahaverezan-tsaina." Mpitt. 7:25.
Mofon’aina:
Naseho ahy fa maro amin' ireo izay milaza ho manam-pahalalana momba ny fahamarinana ankehitriny no tsy mahalala akory izay inoany. Tsy takany ireo porofon'ny finoany. Tsy ankasitrahany ny asa atao ho an'ny ankehitriny. Rehefa ho avy ny fotoan'ny fizahan-toetra, dia misy olona izay mitory amin'ny hafa amin'izao fotoana izao, rehefa mandinika ny toerana misy azy, hahita fa tsy fantany mazava izay antony itoriany. Tsy fantany ny tsy fahalalany raha tsy teo izany fizahan-toetra izany. (...)
Rehefa tafasaraka amin'ireo izay miray finoana aminy izy ka voatery hijoro irery hanazava ny finoany dia ho gaga fa mikorontana ny heviny mikasika izay nekeny ho fahamarinana. Tsy isalasalana fa nanalavitra an'Andriamanitra velona isika ary nitodika tany amin'ny mety maty, ka fahendren' olombelona no natakalontsika ny fahendren' Andriamanitra.
Hamoha ny vahoakany Andriamanitra. (...) Miantso ireo rehetra mino ny teniny Andriamanitra mba hifoha amin'ny torimasony. Tonga ny fahazavana sarobidy, mifanaraka indrindra amin'izao andro izao. Fahamarinana ara-Baiboly izany, izay mampiseho ireo loza mananontanona antsika. Tokony hitarika antsika ho amin'ny fianarana amim-pahazotoana ny Soratra Masina sy ny fandinihana akaiky sy lalina ny foto-kevitra tanantsika, io fahazavana io. Tian'Andriamanitra ny handalinantsika amim-paharetana ireo foto-kevi-dehibe tsirairain' ny fahamarinana, amim-bavaka sy amim-pifadian-kanina. Tsy tokony hianina amin'ny fanombantombanana sy ny hevitra tsy marim-pototra mikasika ny atao hoe fahamarinana ny mpino. Tokony hiorina mafy amin'ny tenin'Andriamanitra ny finoany, ka raha ho avy ny fotoam-pizahan-toetra ka hoentina eo anatrehan'ny filan-kevitra izy ireo hamaly ny amin'ny finoany, dia afaka hanome ny anton'ny fanantenana ao anatiny amin'ny fahalemem-panahy sy fanajana. (...)
Ireo izay nanazatra ny tenany ho havanana amin'ny fandaharan-kevitra dia ahina mafy tsy hihazona ny Tenin'Andriamanitra amim-pahitsiana. Eo anatrehan'ireo izay tsy mitovy hevitra amintsika dia tokony hanao ezaka matotra isika mba haneho ireo lohahevitra amin'ny fomba mampifoha ny faharesen-dahatra ao an-tsainy, fa tsy ny hitady izay hahazoan' ilay mpino toky fotsiny. - TFC, b. 5, tt. 707,708.