"Ary Anao koa, ry Tompo ô, ny famindrampo, fa Hianao no mamaly ny olona rehetra araka ny asany avy." - Sal. 62:12.
Mofon’aina:
Handre ny vavaka atao amin'ny fo ilay Andriamanitra Tompon'ny Sabata. Hitari-dalana ireo izay mahatsapa ny fiankinany Aminy Izy, ary koa hitari-dalana ireo mpiasany mba ho maro ny fanahy tonga amin'ny fahalalana ny fahamarinana.
Manana hery miasa mangina mahova ny sain'izay mandray azy ny fahamarinana ao amin'i Jesôsy . Aoka tsy hisy hanadino fa tsy irery izay miaraka amin'Andriamanitra, ary azo antoka fa ny fahombiazana no hamarana ny ezaka misionera rehetra. Fantatr'ireo izay manana fifandraisana velona amin'Andriamanitra fa miasa amin'ny alalan'ny olombelona ny lanitra. Ny fanahy rehetra izay miara-miasa amin'Andriamanitra dia hanao ny marina, ho tia famindrampo, ary hiara-mandeha Aminy amim-panetren-tena.
Andriamanitry ny famindrampo ny Tompo, ary mihevitra na dia ny momba ireo biby tsy mahay miteny izay noforoniny aza. Rehefa nanasitrana tamin'ny andro Sabata Izy, ary nampangaina ho nandika ny didin'Andriamanitra, dia izao no nambarany tamin'ireo niampanga Azy: "moa tsy samy mamaha ny ombiny sy ny borikiny hiala amin'ny fihinanam-bilona amin'ny Sabata va hianareo ka mitondra azy hisotro rano? Koa ity vehivavy zanak'i Abrahama ity, izay efa nafatotr’i Satana izao valo ambin'ny folo taona izao, moa tsy tokony hovahana ho afaka amin'izany fatorana izany amin'ny andro Sabata va? Ary raha nilaza izany Izy, dia nangaihay izay rehetra nanohitra Azy; fa ny vahoaka rehetra nifaly noho ny zavatra malaza rehetra nataony." - Lio. 13:15-17.
Mijery ireo voary noforoniny amim-pangorahana ny Tompo, na inona na inona fokom-pirenena misy azy ireo. "Ary ny firenena rehetra avy amin'ny iray ihany dia namponeniny ambonin 'ny tany rehetra, ary efa notendreny ny fotoan'andro sy ny faritry ny fonenany, mba hitady an 'Andriamanitra izy, raha tahiny hahatsapa ka hahita Azy, kanefa tsy mba lavitra antsika rehetra Izy; fa Izy no ivelomantsika sy ihetsehantsika ary iainantsika; araka ny nataon'ny mpanao tonon-kira sasany teo aminareo hoe: Fa terany koa isika." Asa. 17:26-28.
Izao no nolazain'ny Mpamonjy raha niresaka izany tamin'ny mpianany: "(...) ary hianareo rehetra dia mpirahalahy avokoa." - Mat. 23:8. Raintsika rehetra Andriamanitra, ary samy mpitandrina ny rahalahiny avy isika. - RH, 21 Janoary 1896.