"Ary aoka ho ao am-ponao izao teny andidiako anao anio izao. Dia ampianaro tsara ny zanakao izany, ary resaho, na mipetraka ao an-tranonao hianao, na mandeha any an-dàlana, na mandry, na mifoha." - Deo. 6:6,7.
Mofon’aina:
Nisy tsy fahombiazana tao amin'ny ankohonanao teo amin'ny fankamamiana ny fahamasinan'ny Sabata sy ny fampianarana ny zanakao ary ny fampitana aminy ny lanj an'ny fitandremana izany araka ny didy. Manjavozavo ny fahatakaranao ary tsy hainao ny manavaka ny fenitra ambony tokony hotratrarina mba hahatonga antsika ho mpitandrina ny didy. Hanampy anao amin'ny ezaka ataonao anefa Andriamanitra rehefa manao ny asa amin'ny fo tokoa ianao. Tokony hanana fifehezan-tena tanteraka ianao, amin'izany no hahombiazanao bebe kokoa amin'ny fifehezana ny zanakao rehefa tsy manaraka ny fitsipika izy ireo.
Asa lehibe no manoloana anao ho fanarenana ireo tsirambina tamin'ny lasa, nefa tsy takina ny hanaovanao izany amin'ny herin'ny tenanao manokana. Hanampy anao (...) ny anjely. Aza avela ny asa ary aza apetraka ny enta-mavesatra, hazony amim-pahavononana izany ary areno ny tsirambina nataonao hatrizay. (...) Tokony hovitaina ao anatin'ny henemana nomen'Andriamanitra anao izay rehetra azo atao mandritra izany.
Aoka ianao tsy hangalatra na dia ora iray aza amin'ny ora masin'Andriamanitra.
Fitahiana lehibe tokoa no ampanan-tenaina an' ireo manome tombambidy ambony ny Sabata sy mahatsapa ny andraikitra apetraka aminy momba ny fitandremana izany. "Raha miaro ny tongotrao amin'ny Sabata ianao ka tsy manao izay tianao amin'ny androko masina, ary manao ny Sabata hoe fahafinaretana, ary ny nohamasinin'i Jehôvah hoe mendrika hohajaina, ka manome voninahitra azy (...) Dia hiravoravo amin'i Jehôvah ianao, ary hasandratro ao amin'ny havoana amin'ny tany ianao, sy hofahanako amin'ny lovan'i Jakôba rainao; fa ny vavan'i Jehovah no efa niteny." - Isa. 58:13,14. (...)
Tsy misy teny na asa tokony hatao amin'ny Sabata raha toa izany ka fanitsakitsahana ny Sabata masina eo imason'Andriamanitra. Tsy ny hitsaharan'ny vatantsika amin'ny asa ihany no ta-kin'Andriamanitra rehefa Sabata fa takiny koa ny hifehezantsika ny saintsika mba tsy hieritreritra afa-tsy izay zava-masina. - TFC, b. 2, tt. 701-703.