"Lehibe Jehôvah ka tokony hoderaina indrindra; ary tsy takatry ny saina ny fahalehibiazany." - Sal. 145:3.
Mofon’aina:
Misy ireo mpandinika momba ny haibolantany tsy mpino an'Andriamanitra izay milaza fa mihoatra lavitra noho izay tantarain'ny Baiboly ny fahelan'ny tany. Lavin'izy ireo ny fanambaran'ny Tenin'Andriamanitra noho ireo porofo izay heveriny fa maneho ny fisian'ny tany efa an-tapitrisa taona maro. Ary maro amin'ireo izay milaza fa mino ny Baiboly no tsy mahay manazava ireo zava-mahatalanjona hita eto ambonin'ny tany raha toa ka fito andro ara-bakiteny monja ny faharetan'ny famoronana ary enina arivo taona monja no nisian'ny tany. Mba hisorohana ny olana amin'ireo mpahay haibolantany tsy mpino, dia eken'ireny olona ireny fa fotoana enina naharitra sy tsy voafaritra ny henemana nanaovana ny Famoronana ary koa ny andro fitsaharan'Andriamanitra dia fotoana iray hafa izay tsy voafaritra koa. Mahatonga ny didy fahefatry ny lalàna masin'Andriamanitra tsy hanana ny dikany izany. (...)
Misy taolam-biby sy taolan'olona hita tao ambanin'ny tany, tany an-tendrombohitra sy tany an-dohasaha, izay maneho fa fahiny dia nisy biby sy olona lehibe kokoa noho izay misy amin'izao andro izao. Matetika koa no ahitana fitaovam-piadiana sy hazo nanjary vato. Noho ireo (...) no mahatonga ny olona sasany hanatsoaka hevitra fa efa ela talohan'ny tantaran'ny Famoronana no nonenan'ny taranaka lehibe sy vaventy noho ny amin'izao teto an-tany. Voafetra ihany ny fihevitr'ireo izay misaina toy izany momba ny haben'ny olona sy ny biby ary ny hazo talohan'ny Safodrano ary koa ny fiovana lehibe niseho teto an-tany taorian' izany.
Tsy afa-manaporofo na inona na inona ny haibolantany raha tsy eo ny tantaran'ny Baiboly(...). Eoambonin'ny ranomasimben'ny fisalasalana sy ny fahaverezan-kevitra ny olona rehefa miala amin'ny Tenin'Andriamanitra ka mitady hanazava ny asa famoronana amin'ny alalan'ny zavaboary. Tsy mbola nampahafantarin'Andriamanitra ny olona mety maty mihitsy ny fomba nanatontosany ny asa famoronana tao anatin'ny enina andro ara-bakiteny. Tsy takatry ny saina tahaka ny fisiany ihany ny asa famoronana nataony. - ST, 20 Marsa 1879.