NY TONTOLON-KEVITRA ARA-TANTARA
Antsoina hoe shemot ny Eksodosy amin'ny teny Hebreo, izay midika ara-bakiteny hoe "anarana", araka ny teny fanombohana ao amin'io lahatsoratra fahiny io, manao hoe: "Ary izao no anaran'ny (...)". Voatanisa eo am-piandohana ny anaran'ny fianakavian'i Jakoba patriarika.
Vakio ny Eks. 1:1-7. Inona no fahamarinana manan-danja hita eto?
Manomboka amin'ny fampahatsiahivana ny fitahian'Andriamanitra ny bokin' ny Eksodosy. Rehefa nanorim-ponenana tany Egypta i Jakoba patriarika sy ny fianakaviany, dia olona 70 monja izy ireo (Gen. 46:27; Eks. 1:5). Kanefa "ny Zanak'Isiraely niteraka ka nitombo betsaka sy nihamaro ary nihahery dia nihahery indrindra, ka dia henika azy ny tany." - Eks. 1:7. Ary tamin'ny fotoana nanafahana azy ireo tamin'ny fanandevozan'ny Egyptianina, dia "lehilahy mahalia lalana tokony ho enina hetsy, afa-tsy ny zaza amim-behivavy" izy ireo. - Eks. 12:37.
Vakio ny Eks. 1:8-11. Nanao ahoana ny toe-javatra niainan'ny Isiraelita tamin'ny fotoana nanafahana azy ireo tamin'ny fanandevozana?
Nanjombona ny tantaran'ny zanak'Isiraely tao Egypta raha ny fanoritso-ritan'ny Soratra Masina azy. Manomboka amin'ny fanandevozan'ireo mpampiasa Egyptianina ny vahoaka hebreo, sy ny fampahoriana azy amin'ny asa an-terivozona, ny bokin'ny Eksodosy. Kanefa mifarana amin'ny fanatrehan Andriamanitra mitondra fiadanana sy faherezana, ao amin'ny tabernakely izay eo afovoan'ny tobin'ny Isiraelita (jereo ny Eks. 40), kosa izany. Aseho eo anelanelan'ireo tendro roa mifanohitra ireo ny fandresen'Andriamanitra. Niseho ny fandresen'Andriamanitra mahatalanjona ny herin'ny ratsy ratsy tamin'ny t nanafahany ny vahoakany tamin'ny fanandevozana, tamin'ny nampisarahany ny Ranomasina Mena, ary tamin'ny nandreseny ny tafika matanjaka indrindra tamin'izany fotoana izany.
Voalaza mazava ao amin'ny tantara fa "araka ny nampahoriany azy no vao mainka nihamaroany sy nitomboany kosa." Eks. 1:12. Izany hoe, na inona na inona tetika ataon'ny olombelona, dia mbola Andriamanitra no manana ny fahefana faratampony ary hamonjy ny vahoakany, na dia toa tsy misy azo antenaina aza ny zava-misy, fara fahakeliny araka ny fijerin'ny olombelona.
"Nisy mpanjaka vaovao nanjaka tany Egypta, izay tsy nahalala an'i Josefa." - and. 8. Araka ity fitantarana ity, nahoana no tsy tokony hahatafandry mandry antsika ny toe-java-misy, na tsara toy inona aza ny fisehony?