" Izay mino anatra dia ho tonga eo amin’ny làlan’ny fiainana; fa mivily izay mandà anatra. "Ohab. 10:17.
Mofon’aina:
Maro no manala tsiny ny fahalemeny ara-panahy sy ny firehetam-pony mivaivay ary ny tsy fahavitany maneho fitiavana amin’ny rahalahiny sy ny anabaviny ao amin’ny Tompo. Mahatsiaro ho lavitra an’Andriamanitra izy ireo ary koa andevozin’ny tenany sy ny fahotana. Ny faniriany hanao ny asan’Andriamanitra anefa dia miainga amin’ny fironana mandeha ho azy ao aminy fa tsy avy amin’ny faharesen-dahatra lalina avy amin’ny Fanahy Masina. Mihevitra izy fa tsy azo ialana ny lalàn’Andriamanitra nefa tsy mba amin’ny fieritreretana momba ny fanahy tsy maintsy handalo fitsarana no ampitahany ny asany amin’izany lalàna izany. Miaiky izy fa tokony hiankohofana sy hotiavina amin’ny fo rehetra Andriamanitra nefa tsy mba Izy akory no ivon’ny eritreriny rehetra. Mino izy fa tokony hotandremana ny fitsipika mampirisika antsika hitia ny hafa, nefa amin’avonavona mangatsiaka, ary indraindray aza tsy ara-drariny velively no itondrany ny mpiara-miasa aminy. (...)
Ezaka maro mielanelana no natao mba hisian’ny fanavaozana, nefa ireo izay manao izany ezaka izany dia tsy mba manombo ny izahony. Tsy manolo-tena tanteraka ho eo an-tanan’i Kristy izy mba hahazo hery hanatanterahana ny sitrapony. Tsy vonona ny hovolavolaina hitovy amin’Andriamanitra izy. Miaiky ny tsy fahatanterahany izy (...), saingy misy fahotana manokana tsy tiany hafoy. (...)
Tena tian’ny fahavalo tokoa ny hahatanterahan’ireo ezaka mitsitapatapaka ireo, satria tsy mba vonona ny hanohitra ny faharatsiana izay manao izany. Misy fehy fanamaivamaivanana napetraka teo amin’ny sainy, ka amin’ny fitokian-tena no hitadiavany hanao fiaingana vaovao indray hanao ny sitrapon’Andriamanitra.
Tsy mba mitondra fanavaozana anefa ny faharesen-dahatra ny amin’ny ota ankapobeny fotsiny. Mety hanana fahatsapana manjavozavo sy mahatsiravina ny amin’ny tsy fahatanterahantsika isika, saingy tsy hitondra na inona na inona ho antsika izany raha tsy manao ezaka matotra isika handresena ny fahotana. Raha tiantsika ny hiara-miasa amin’i Kristy, ny handresy tahaka ny nandreseny, dia amin’ny alalan’ny heriny no tsy maintsy hanoherantsika mafy indrindra ny izaho sy ny fitiavan-tena. – ST, 11 Marsa 1897.