"Natao tsinontsinona sy nolavin'ny olona Izy; lehilahy ory sady zatra ny fahoriana, ary tahaka izay tsy tian'ny olon-kojerena akory Izy; natao tsinontsinona Izy ka tsy mba nahoantsika." - Isa. 53:3.
Mofon'Aina:
Manao ahoana re ny havitsian'ny olona mahatakatra ny fahoriana mandrotidrotika ny fon' ilay Zanak'Andriamanitra nandritra ireo telopolo taona niainany teto an-tany. Nosaronan'ny alahelo sy ny fahoriana ny lalana avy eo amin'ilay fihinanam-bilona hatreny Kalvary. Lehilahy ory Izy, ary niaina ratram-po izay tsy hain'ny fitenin'olombelona hosoritsoritana. Izao no azo nilazana izany raha ny marina: "Jereo sy izahao raha mba misy fahoriana toy ny fahoriako"- Fit. 1:12. (...) Lehibe tokoa ny fankahalany ny fahotana, kanefa nangoniny tao amin'ny Fanahiny ny fahotan'izao tontolo rehetra izao, raha nanitsaka ny lalana mankeny Kalvary Izy (...). Tsy nanan-keloka Izy kanefa nitondra ny famaizana ny olo-meloka; tsy nanan-tsiny kanefa nanolotra ny Tenany mba hizaka ny famaizana mendrika ny mpandika ny lalan'Andriamanitra. Nentin'ny Zanak'ilay Andriamanitra mandrakizay ny famaizana noho ny otan'ny fanahy rehetra. Nitambesatra tao amin'ny fanahin'ilay Mpanavotra an'izao tontolo izao avy any an-danitra ny fanamelohan'ny fahotana rehetra. Ilay tsy nahalala ota no tonga ota ho antsika mba hampihavanina amin'Andriamanitra ao Aminy isika. Tamin'ny nandraisana ny toetry ny olombelona no nipetrahany teo amin'ny toerana izay nandratràna Azy noho ny fahotantsika sy nanorotoroana Azy noho ny fahamelohantsika, mba hahasitrana antsika ny dian-kapoka taminy.
Fakam-panahy lehibe no nizahan-toetra an'i Kristy tao amin'ny maha-olombelona Azy, hery feno faharetana no nentin'ilay ratsy nizaha toetra azy noho ny maha lehibe lavitra mihoatra ny olona Azy. Fahamarinana feno zava-miafina lalina ny fifamatoran'i Kristy amin'ny taranak'olombelona amin'ny alalan'ny firaisam-po feno fangorahana lehibe indrindra. Namesatra ny fon'Andriamanitra ny asa sy ny fisainana ratsy ary ny teny feno faharatsiana nataon'ny zanakalahy sy sy zanakavavin'i Adama rehetra. Nahatonga famaizana ho an'ny Tenany ny fahotan'olombelona satria tonga Mpisolo ny olona Izy, ary nentiny ny fahotan'izao tontolo izao. (...) "Hataontsika ahoana no fandositra raha tsy mitandrina izao famonjena lehibe izao isika?"- Heb. 2:3. - TMK, t. 66.