July 2026

Teo amin'ny tantaran'ny fivavahana kristianina, dia samy nandalina ny Testamenta Vaovao na ny teolojianina na ny pasitora na ny laika, mba hamaritana izay tokony ho toetry ny fiangonana. Mahatalanjona antsika, ohatra, ny fiangonana tamin'ny andron'ny Apostoly. Saingy matetika isika no manadino singa iray manan-danja: manana olana ny olona. Azo heverina fa hitantsika ao amin'ny Testamenta Vaovao koa izay lazain'ny Baiboly mikasika ny tsy tokony ho toetry ny fiangonana. Ny epistily nosoratan'i Paoly ho an'ny Korintianina no teboka tsara hanombohana izany.

Hodinihina mandritra ny herinandro: 1 Kor. 5:1-13; 2 Kor 2:5-10; 1 Kor. 6:1-13; 1 Tes. 4:1-8; 1 Kor. 6:19-7:9.

Tsianjery

"Ahoana ary? Moa tsy fantatrareo fa ny tenanareo dia tempolin'ny Fanahy Masina, Izay ao anatinareo sady efa azonareo tamin'Andriamanitra? Ka tsy tompon'ny tenanareo hianareo. Fa olom-boavidy hianareo; ka dia mankalazà an'Andriamanitra amin'ny tenanareo.-1 Kor. 6:19, 20.

VM, toko 2, "Ny fanomanana azy roa ambin'ny folo lahy".

"Ny firaisan-tsaina sy firaisan-kina eo amin'ny vahoakan'Andriamanitra sisa izay mino ny fahamarinana, dia manan-kery mandresy lahatra izao tontolo izao fa manana ny fahamarinana izy ireo, ary vahoaka miavaka, voafidin'Andriamanitra. Mahavery hevitra ny fahavalo io firaisana io, ary vonona izy hanafoana izany. Rehefa inoana ao am-po sy aseho eo amin'ny fiainana ny fahamarinana ankehitriny, dia mampiray ny vahoakan'Andriamanitra sy manome azy hery lehibe." - TFC, b. 1, t. 327.

Ny tsy tokony hisaratsarahantsika mba hanaraka izay mpitarika tiantsika avy dia tsy midika fa tsy tokony hanohana ny mpitarika antsika isika. Tokony hankasitraka sy hanampy ireo mitarika ny asan'ny fiangonana isika. Manendry olona hanao ny asany eto an-tany Andriamanitra. Mendrika ny hohenoina sy harahina ireo mpitondra fivavahana izay mampiseho fomba fiaina feno fanetren-tena, araka izay naseho teo amin'ny hazo fijaliana.

Vakio ny 1 Kor. 4:1,2. Inona no ampianarin'ireo andininy ireo mikasika ny tokony ho fomba fijery hananana momba ny olombelona mpitarika?

Vokatry ny fanomezan-danja be loatra ny olombelona mpitarika ny fitsitokotokoana ankapobeny. Mety hanimba ny firaisana eo anivon'ny fiangonana sy ny fahasalamana ara-panahin'ny mambra izany, satria ny fahadisoan-kevitra momba ny fanompoana kristianina dia mety hahatonga ny fiangonana hanome lanja tafahoatra ny mpitarika sasany, ka hanambany ny hafa. Mampisy rivo-piainana feno fifaninana, izay mety hampisara-bazana ny fiangonana, ny fihetsika toy izany.

Vakio ny 1 Kor. 1:10. Araka ny hevitrao, inona no tian'i Paoly ambara amin'ny hoe: "mba ho tafakambana tsara hianareo hiray saina sy hevitra"?

Mba «tsy hisy fisarahana eo aminareo, fa mba ho tafakambana tsara hianareo hiray saina sy hevitra» - 1 Kor.. 1:10; io antson'io Paoly io no mibahan-toerana ao amin'ireo toko efatra voalohany ao amin'ny 1 Korintiana. Manaiky tokoa ny ankamaroan'ireo mpandinika fa ny firaisana no lohahevitra lehibe mampifamatotra ny fizarana rehetra ao amin'ilay epistily.

Vakio ny 1 Kor. 1:12-17. Ahoana no anampian'ireo andininy Ireo antsika hahatakatra ny tsy mampitombina ny fananganana vondrona kely manodidina Ireo mpitarika eo an-toerana? Inona no vahaolana nomen'i Paoly?