Vakio ny "Vahoaka tandindomin-doza" (toko 64), "Ny tempoly nodiovina indray" (toko 65) ary ny "Adihevitra" (toko 66) ao amin'ny IFM.
"Ny nataon'i Kristy tamin'ny nanozonany ilay hazo izay noforonin'izy tenany tamin'ny heriny, dia mijoro ho fampitandremana ny fiangonana rehetra sy ny kristiana rehetra. Betsaka anefa no tsy mivelona amin'ny fiainan'i Kristy feno famindrampo sy tsy mihevitra ny tenany. Misy mihevitra ny tenany ho kristiana tsara indrindra ka tsy mahalala izay raiketin'ny fanompoana an'Andriamanitra. Manao drafitra izy sy mandinika izay hahafaly ny tenany ihany. Araka ny izaho ihany no zavatra ataony. Tsy misy vidiny aminy ny fotoana raha tsy hanangonany ho an'ny tenany. Izany no zava-kendreny eo amin'ny raharaha rehetra eo amin'ny fiainana. Tsy ho an'ny hafa fa ho an'ny tenany ihany no hanaovany fanompoana. Namorona azy Andriamanitra mba hivelona eo amin'izao tontolo izao izay tsy maintsy hanatanterahana fanompoana tsy misy fitiavan-tena. Notendreny izy hanampy ny mpiara-belona aminy amin'ny fomba rehetra. Nefa midadasika loatra ny `izaho' ka tsy afaka mahita zavatra hafa izy. Tsy nifandray tamin'ny olombelona izy. izay mivelona toy izany ho an'ny tenany dia tahaka ilay aviavy, izay nihambo ny zavatra rehetra, nefa tsy nisy voany. Manaraka ny fomba fanompoam-pivavahana izy, nefa tsy misy fibebahana na finoana. Araka ny fanekem-pinoana, dia manaja ny lalàn’Andriamanitra izy, nefa tsy misy ny fankatoavana. Miteny izy, nefa tsy manao. Ny didim-pitsarana natao tamin'ilay aviavy dia nampisehoan'i Kristy fa maharikoriko eo imasony fo fihatsaram-belatsihy tsy misy antony io. Ambarany fa ny mpanota ampahibemaso dia tsy meloka noho izay milaza fa manompo an'Andriamanitra, nefa tsy mitondra voany ho voninahiny." - IFM, tt. 623-624.
FANONTANIANA hifanakalozan-kevitra
1. Saintsaino ny hevitry ny fanadiovan’i Kristy ny tempoly. Ahoana no mety hampiharana izany fitsipika izany eo amin'ny fiangonantsika ankehitriny? Ahoana no tokony hisehoan'izany fanadiovana izany?
2. Manerana ny filazantsara, imbetsaka i Jesôsy no nampitodika ny olona ho amin'ny Soratra Masina sy ny fomba tsy maintsy hahatanterahan'izany. Inona no ambaran'izany amintsika momba ny maha-zava-dehibe ireny ho an'ny fiainam-pinoana? Nahoana isika no tokony handà amin'ny fomba hentitra ny fiezahana rehetra hampihena ny fahefan'ny Soratra Masina, indrindra ny filazana fa ny Soratra Masina dia fiheveran'olombelona momba an'Andriamanitra fotsiny ihany sy ny toetrany ary ny fomba fiasany?
3. Aiza ny tsipika manasaraka ny fiangonana sy ny fitondram-panjakana? Ahoana no itarihan'ny fampianaran'i Jesôsy ao amin'ny Mar. 12:13-17 izany fifanakalozan-kevitra izany?
4. Jereo ireo andalan-teny miresaka momba ny fitsanganana amin'ny maty. Nahoana izany fampianarana izany no zava-dehibe ho an'ny finoantsika, indrindra rehefa mihevitra momba ny toetry ny maty isika? • • • •