Vakio ny Apôk. 6:12-17. Diniho amin'ny tsipiriany ny fihetsik'ireo olona eo am-piatrehana ireo tranga amin'ny andro farany. Inona no voamarikao?
Mahaliana ny mahita eto fa ireo very dia tsy miantsoantso hoe: "Inona izao zava-mitranga izao?" na hoe "Iza no ao ambadik'izao?". Toa takatr'izy ireo tsara ny zava-mitranga. "Zanak'ondry" no iantsoany an'i Jesôsy , koa tsy maintsy mahafanta-javatra momba ny tantaran'i Kristy izy. Toa tsapan'izy ireo koa fa "tonga ny andro lehiben'ny fahatezerany" ka dia tsy misy azo antenaina intsony ny aminy: "ka iza no mahajanona?",
Hotorina amin'ny firenena rehetra eto ambonin'ny tany ny filazantsara mialoha ny farany (Mat. 24:14), ary ho fantatry ny tany manontolo ny hafatry ny anjely telo. Na izany aza dia mbola hisy olona ihany ho tratra tsy niambina - tsy noho ny tsy nahafantarany, fa noho ny fandavany tsy hino sy tsy hankato. Izany no antony hahavery ny olona toy izany any am-parany.
Vakio ny Mat. 24:36-44. Araka ny ambaran'i Jesôsy eto, inona ireo lesona tokony horaisintsika avy amin'ny tantaran'i Noa?
Nampahatsiahy ny tantaran'ny Safodrano i Jesôsy ho fampitandremana antsika fa hanampoka ny maro ny fiaviany. Tsy noho ny tsy fahafantarana no nahatonga ny Safodrano ho tampoka ho an'izao tontolo izao, tahaka izay hiseho amin'ny fiavian'i Kristy fanindroany koa. Nitory tamin'izao tontolo izao nandritra ny 120 taona i Noa, fa tsy nety nino izy ireo. Nambara tamin'izy ireo izay hitranga, saingy tsy nino izy ireo.
Maro koa no mihevitra fa ny fahelan'ny fotoana dia midika fa tsy marina ny faminaniana. Hoy i Petera ao anatin'ny tontolon-kevitry ny Safodrano: "fa fantatrareo voalohany indrindra fa amin'ny andro farany dia hisy mpaniratsira avy haniratsira, mandeha araka ny filany ka manao hoe: Aiza ny teny fikasana ny amin'ny fihaviany? Fa hatrizay nodian'ny razana mandry dia maharitra tsy miova ny zavatra rehetra; eny, hatramin'ny nanaovana izao tontolo izao aza." Hihamafy orina izany fiheverana izany arakaraka ny androsoan'ny fotoana.
Eo amin'ny fiainan'ny tsirairay, ny fiavian'i Jesôsy fanindroany (na fanintelony ho an'ny sasany) dia tsy lavitra fa aorian'ny fahafatesana, ary fantatsika tsara fa mandalo sy mi serana ihany ny fiainana. Ahoana no anampian'izany fomba fijery izany antsika hahay hiatrika izany "fahelan'ny fotoana" izany?