"Fa fantatr'Andriamanitra fa amin'izay andro hihinananareo azy dia hahiratra ny masonareo, ka ho tahaka an'Andriamanitra hianareo, hahalala ny tsara sy ny ratsy." — Gen. 3:5.
Ampianarin'ny Soratra Masina antsika mandrakariva fa "Jehôvah Andriamanitrao ihany no Andriamanitra, dia Andriamanitra mahatoky, Izay mitandrina fanekena sy famindrampo amin'izay tia Azy sy mitandrina ny didiny, hatramin'ny taranaka arivo mandimby "- Deo. 7:9. Ny fahafatesan'i Jesôsy teo amin'ny hazo fijaliana no fanehoana faratampony ny fahatsaran’Andriamanitra sy ny fitiavany (jereo ny Rôm. 3:25,26; Rôm. 5:8). Hoy ny Sal. 100:5: "Fa tsara Jehôvah , mandrakizay ny famindrampony, ary mihatra amin'ny taranaka fara mandimby ny fahamarinany." Sal.
Mety "manenina" ve Andriamanitra? Raha eny, inona no hevitr'izany? Efa hitantsika fa tsy miovaova ny toetran'Andriamanitra. Misy andalan-tSoratra Masina sasany anefa milaza fa "manenina" Andriamanitra. Farafahakeliny ho an'ny olombelona, ny fanenenana dia mifono fanekena ny ratsy natao. Ahoana àry no mahatonga ny toko sy andininy sasany ao amin'ny Baiboly hilaza fa "manenina" Andriamanitra?
Vakio ny Eks. 32:14 ary ampitahao amin'ny Jer. 18:4-10. Ahoana no fahatakaranao ny "fanenenan" ‘Andriamanitra araka ireo fanambarana ireo?
Tsy hoe tia ny rariny ary miantso ny olona ho tia sy hampihatra izany fotsiny Andriamanitra fa asehony amin'ny fomba tonga lafatra sy mafy orina mihitsy izany toetra izany. Mampianatra antsika ny Soratra Masina fa feno sy tanteraka ny fahamasinan’Andriamanitra sy ny fahatokiany, ary ny fahamarinany sy ny fitiavany. Miasa araka ny fitiavana sy ny marina ary ny rariny mandrakariva Izy, ary tsy mba manao ratsy na oviana na oviana.
Miara-dalana ny fitiavana sy ny rariny manerana ny Soratra Masina manontolo. Mitaky ny rariny ny tena fitiavana marina, ary tsy misy fomba ahafahana mampanjaka sy mampihatra ny rariny raha tsy amin'ny fitiavana ihany. Tsy mahazatra antsika ny mieritreritra ireo zavatra roa ireo miara-dalana satria nosimban'ny taranak’olombelona ny hevitry ny fitiavana sy ny rariny.
Vakio ny Sal. 33:5; Isa. 61:8; Jer. 9:24; Sal. 85:10 ary ny Sal. 89:14. Ahoana no anampian'ireo andalan-teny ireo antsika hahatakatra fa mihevitra fatratra momba ny rariny Andriamanitra?
"Fa izay te-hirehareha dia aoka hirehareha amin'izao: dia ny fahendreny sy ny fahalalany Ahy ho Jehôvah , Izay manao famindrampo sy fitsarana marina ary fahamarinana ety ambonin'ny tany; fa izany no sitrako, hoy Jehôvah ." - Jer. 9:23.
Na zava-mahatahotra tokoa aza ny fahatezeran'Andriamanitra dia tsy haratsian-toetra na tsy fitiavana izany tsy akory. Ny mifanohitra amin'izany aza no hita ao amin'ny TT sy ny TV; tezitra Andriamanitra noho ny fitiavany. Ny fifanoherana lehibe eo amin'ny faharatsiana mamohehatra sy ny fahatsaran'Andriamanitra madio sy be voninahitra no mahatonga izany.
