Mitana anjara toerana lehibe ny Soratra Masina ao amin'ny filazantsara manontolo, amin'ny fanambarana amintsika momba llay lalana sy fahamarinana ary fiainana. Manana anjara lehibe amin'ny fanambarana ny fahamarinana ny Baiboly, ny TV sy ny TT, ny Soratra Masina. Mitombina tokoa izany, indrindra rehefa miresaka momba ny fampianarana hoe: Iza i Jesôsy? Hanao inona no nahatongavany?
Vakio ny Jao. 5:38-40. Inona no lazain' i Jesôsy eto momba ny Soratra Masina?
Imbetsaka i Jesôsy sy ny mpianany no manondro ny Soratra Masina mba hanamarinana fa Izy no Mesia. Hoy i Kristy: "Fa raha nino an'i Mosesy hianareo, dia hino Ahy, satria nanoratra nilaza Ahy izy. Fa raha tsy mino izay nosoratany hianareo, hataonareo ahoana no fino ny teniko?" - Jao. 5:46,47.
Vakio ny Lio. 24:27. Nahoana no zava-dehibe tokoa ny nampiasan'i Jesôsy ny Soratra Masina mba hanambarana ny hevitry ny asany?
Any amin'ny andininy hafa dia naka andalan-teny avy ao amin'ny Eksôdôsy i Kristy ka nilaza hoe: "moa tsy mbola novakinareo va ny teny nataon'Andriamanitra taminareo (...)?" - Mat. 22:31. Nilaza ny amin'ireo teny fikasan'Andriamanitra koa i Zakaria fa Andriamanitra nampilaza ny mpaminaniny masina hatramin'ny fahagola (Lio. 1:70). Ary tao anatin'ny toriteniny tamin'ny Pentekôsta dia hoy i Petera: "Ry rahalahy, tsy maintsy notanterahina ilay tenin'ny Soratra Masina nampilazain'ny Fanahy Masina rahateo an'i Davida ny amin'i Jodasy, izay tonga mpitarika ny olona nisambotra an'i Jesôsy ." - Asa. 1:16.
Tsy lahatsoratra momba ny siansa tsy akory ny Baiboly. Tsy manazava ny fomba fizarazarana ny atoma izy na ny fandidiana atidoha. Zava-manan-danja mihoatra lavitra noho izany no ataony. Ao ny tontolon-kevitra mampisy heviny ny tontolo misy antsika. Izy no fanalahidy mamoha ny varavarana, fahazavana mahatonga ny maso hahita. Raha tsy nisy azy dia ho nitoetra tao anatin'ny haizina isika ka tsy ho nahalala akory ny fisian'Andriamanitra, na ny anjara asany eto amin'izao tontolo izao, na ny niandohantsika, na ny hevitry ny fiainana, na ny hoavy.
Inona avy ireo fahamarinana sasany ao amin'ny Baiboly izay tsy hain'ny siansa velively ampianarina antsika, na amin'ny alalan'ny tsangan-kevitra aza?