Efa nisy nanontany ve ianao ny amin'izay zavatra irinao hatao indrindra any amin'ny mandrakizay? Raha manontany ankizy iray ianao, dia mety hilaza izy hoe: "mitaingina tigra", "migorisa avy eo amin'ny vozon'ny zirafy", na "manidina ho any amin'ny planeta hafa." Raha tanora no anontanianao dia mety hilaza izy hoe: "ny tsy hanao entimody intsony" na "hizaha ny lanitra miaraka amin'ny namana tsy misy maratra." Ary raha olon-dehibe vitsivitsy kosa no anontanianao dia mety hilaza izy ireo hoe: "ny hitoetra ao amin'ny toerana iray tsy misy fanaintainana sy fijaliana, na fahafatesana intsony" na koa ny "ho tafahaona indray amin'ireo hava-malala." Marina sy tsara avokoa ireo valiny ireo, ary be dia be ny zavatra azo andrandraina any amin'ny lanitra vaovao sy ny tany vaovao. Mirehitra ao am-pontsika ny mandrakizay, ary fantatsika ao anatintsika lalina fa mihoatra lavitra noho izay eto sy ny ankehitriny ny fiainana.
Inona koa ireo fitahiana andrandraintsika ho azo any amin'ny mandrakizay? Vakio ny Isa. 25:8; Apôk. 7:17; Apôk . 21:4.
Tsy isalasalana fa ny hahita an'i Jesôsy sy ny hisaotra Azy mivantana noho izay efa nataony ho antsika teto amin'ity tany lavo ity no fitahiana lehibe indrindra any an-danitra. Haniry ny hidera Azy sy hiankohoka Aminy isika noho ny namonjeny antsika tsy ho tratry ny fahafatesana mandrakizay ka niari-pahoriana teo amin'ny hazo fijaliana Izy. "Ny Zanak'ondry, Izay novonoina, dia mendrika handray hery sy harena sy fahendrena sy faherezana sy haja sy voninahitra ary saotra." Apôk. 5:12.
Raha nanondro an'i Jesôsy i Jaona Mpanao batisa, dia "Zanak'ondrin' Andriamanitra" no niantsoany Azy (Jao. 1:36). Nandre izany fanambarana izany ny roa tamin'ireo mpianatr'i Jaona ka nanaraka an'i Jesôsy (Jao. 1:37). Milaza ny Apôk. 14:4 fa tokony hanao toy izany koa isika. "ireo no manaraka ny Zanak'ondry na aiza na aiza no alehany." -Ok. 14:4. Kanefa, raha tiantsika ny hanaraka Azy any an-danitra, dia tsy maintsy manara-dia Azy ety an-tany aloha isika.
I Jesôsy, ilay Zanak'ondry, dia Mpiandry antsika koa, ary Izy no mitarika ny Ialantsika amin'ny fomba tsy azon'iza na iza atao. Toky lehibe ho antsika izany raha eo am-piatrehana ireo zava-tsarotra isika, satria tsy hitsahatra ny hitarika antsika Jesôsy , na dia any an-danitra aza. Hoy ny Apôk. 7:17: "Fa ny Zanak'ondry Izay eo afovoan'ny seza fiandrianana no ho Mpiandry azy ka hitondra azy ho amin'ny loharanon'ny ranon'aina." Amin'ny maha olony sy ondriny antsika, dia hanaraka an'i Jesosy any an-danitra isika, ary haniry ho eo amin'ny fanatrehany mandrakizay. Toetra iray mampiavaka ny vahoakan'Andriamanitra ny hoe: "ary ny anarany dia ho eo amin'ny handriny." - Apôk, 22:4. Izany hoe, hisaintsaina ny momba Azy mandrakariva isika.
Henoy na hirao ny hira faha-457 ao amin'ny fihirana advantista ary ataovy vavaka manokana ho anao ny tonony anio.