Vakio ny 1 Tes. 4:1-8. Inona no ambaran'ireo andalan-teny ireo momba ny fifandraisa n'ny fanamasinana sy ny fifadiana ny fijangajangana?
Na dia olon-kafa aza no nanoratan'i Paoly ireo andalan-teny eo ambony ireo, dia azo ampiharina ho an'ny Kristianina rehetra ny fitsipika voalazany ao.
Eo anatrehan'izany, dia mbola mametra-panontaniana ihany isika hoe: inona no nitranga tany Korinto? Nahoana no nisy ireo olana rehetra ireo?
Nisy tamin'ireo olona tany Korinto no nino fa noho ny fanafahan'ny filazantsara azy ireo, dia azony atao ny zavatra rehetra. Toy izão ny tohan-kevitr'izy ireo tamin'izany: tahaka ny nanaovana ny kibo ho an'ny hanina, dia natao ho an'ny firaisana ara-nofo koa ny tena ary ny firaisana ara-nofo ho an'ny tena (1 Kor. 6:13). Namaly izany i Paoly ka nilaza fa tsoa-kevitra diso mikasika ny fahafahana ananan'ny Kristianina izany. Ny tsy fahitsiana eo amin'ny lafiny firaisana ara-nofo dia tsy mifanaraka amin'ny maha-kristianina, ary fampiasana tsy araka ny tokony ho izy ny fahafahana nomena ny olona tamin'ny alalan'ny filazantsara izany (Rôm. 8:2; Gal. 5:13). Nafahana tamin'ny fahotana isika, fa tsy "nafahana" mba hanota (Rôm. 8:2; Rôm. 6:18, 22). Raha Raha ny marina, "ny tena (...) ho an'ny Tompo, ary ny Tompo ho an'ny tena"- 1 Kor. 6:13. An'i Kristy isika (1 Kor. 6:15), ary ny maha-isika antsika dia tsy maintsy miantraika amin'izay ataontsika. Mifamatotra ary tsy azo sarahina ireo roa ireo. Aseho ao amin'ny 1 Kor. 6 amin'ny fomba 3 samy hafa izany.
1 Voalohany, voalaza fa isika dia voasasa, nohamasinina ary nohamarinina "tamin'ny anaran'i Jesôsy Kristy Tompo sy tamin'ny Fanahin'Andriamanitsika. Kor. 6:11. Tsy manana toerana ao amin'ny fiainan'ireo izay voasasa sy nohamasinina ary nohamarinina ireo fahotana voatanisa ao amin'ny 1 Kor. 6:9, 10, tahaka izany koa ny fijangajangana izay melohin'ny 1 Kor. 6:12-20.
Faharoa, momba ny tenan'i Kristy isika (1 Kor. 6:15). Midika izany fa tsy maintsy miray amin'i Kristy isika (1 Kor. 6:17). Ny fijangajangana dia fanitsakitsahana izany firaisana izany (1 Kor. 6:13, 15). Na iza na iza manao firaisana ara-nofo ivelan'ny fanambadiana dia tonga "tena iray amin'izany olona izany izy (1 Kor. 6:16). Ny firaisana amin'i Kristy amin'ny alalan'ny Fanahy no tokony hamaritra ny fomba itondran'ny Kristianina ny tenany mahakasika ny firaisana ara-nofo.
Fahatelo, ny tenantsika dia "tempolin'ny Fanahy Masina"- 1 Kor. 6:19, 20. Ny hany fomba hananana fiainam-pahamasinana sy fahitsiana eo amin'ny lafiny firaisana ara-nofo dia ny fananana fifandraisana ety amin'i Kristy amin'ny alalan'ny Fanahy Masina. Any amin'ny boky hafa dia miresaka momba ny maha-tempolin'ny Fanahy antsika i Paoly, ambarany amin'izany ny tokony hanolorantsika ny tenantsika ho "fanatitra velona, masina, sitrak'Andriamanitra."- Rôm. 12:1.
Eritrereto ny fahasimbana sy ny loza ateraky ny fahotana mifandraika amin'ny firaisana ara-nofo eo amin'ny zanak'olombelona. Inona no tokony hambaran’izany amintsika momba ny tsy tokony hanamaivamaivanan'ny Kristianina izany toe-javatra Izany?