Saintsaino bebe kokoa ny fanasongadinan'i Paoly ny firaisana ao amin'ny Fil. 2:2, izay ilazany zavatra iray ihany amin'ny fomba efatra samy hafa. Mariho koa ny fifantohany amin'ny saina sy ny hevitra ary ny fo. Nanana fironana hifantoka tamin'ny fiseho ivelany ireo mpitondra fivavahana, fa i Jesôsy kosa nifantoka tamin'ny fisainan'ny olona sy ny fihetsehampony. Ilay tovotahy mpanapaka, ohatra, dia nilaza fa efa nitandrina ny didy mandrakariva. Kanefa nizaha toetra ny fifikirany tamin'ny zavatry ny tany ny filazan'i Jesôsy taminy mba hivarotra ny fananany rehetra ka hanome izany ho an'ny mahantra ary hanaraka Azy. Nilaza koa i Jesosy fa izay avy amin'ny fo (na avy amin'ny saina) no mahaloto ny olona: "Fa avy amin'ny fo no ivoahan`ny sain-dratsy, dia ny vonoan-olona, ny fakam-badin'olona, ny fijangajangana, ny halatra, ny ampanga lainga, ny fitenenan-dratsy." - Mat. 15:19, ary "avy amin'ny haben'ny ao am-po no itenenan'ny vava." - Mat. 12:34.
Vakio ny Fil. 2:3,4. Inona no fepetra mazava tokony horaisina, araka ny fampirisihan'i Paoly, mba hisian'ny firaisana eo anivon'ny fiangonana?
Maneho sarin'ny fanetren-tena ny tenin'i Paoly eto: fanetren-tena, fanaovana ny namana ho mihoatra noho ny tena, fiheverana ny an'ny hafa fa tsy ny an'ny tena ihany. Mora kokoa ny miteny izany noho ny manatanteraka, sa tsy izany? Kanefa ireo fitsipika ireo dia manan-danja ka tokony hohazonina ao an-tsaina eo amin'ny fifandraisana rehetra ifandraisantsika amin'ny hafa. Mandritra ny fifampiresahana amin'ny hafa, dia matetika isika no manana fironana hifantoka amin'ny valinteny hasetrintsika raha tokony hihaino mba hahatakarana izay lazain'ny ankilany ary koa hiezaka hijery ny toe-javatra araka ny fomba fijeriny. Avy amin'ny tsy fifankahazoan-kevitra matetika no ahaterahan'ny ady, kanefa ny fahaiza-mihaino ihany dia azo nisorohana izany. Mety tsy hiombon-kevitra amin'izao isika, nefa ny fihainoana sy ny fitadiavana hahatakatra ny fomba fijerin'ny ankilany no dingana voalohany mankamin'ny fifandraisana tsara sy ny fifampitokisana.
Miresaka momba "ny firaisana avy amin'ny Fanahy' (Efes. 4:3, izay miteraka ny "fihavanana, izay fatorana mampiray' (Efes. 4:3, DIEM) i Paoly. Raha misy fifandonana ao anatininy fiangonana, dia hain'ny Fanahy Masina ny mampitony ny fisamboaravoara ka mitondra antsika ho amin'ny firaisana izay miteraka firindrana. Ao amin'io toko io ihany no iresahan'i Paoly momba ny "firaisan'ny finoana sy ny fahalalana tsara ny Zanak'Andriamanitra." - Efes. 4:13. Mifandray ireo zavatra roa ireo. Zava-dehibe ho an'ny fisian'ny firaisana eo anivontsika ny fananana finoana iray ihany sy fahatakarana iray ihany ny Soratra Masina izay teraka avy amin'ny fahalalana an'i Kristy sy ny fampianarany.
Fahafatesan'ny "izaho" manao ahoana no hahatonga antsika hanao ny hafa ho mihoatra noho ny tenantsika? Ahoana no hianarantsika hanao izany? Ho samy hafa manao ahoana ny fifandraisantsika amin'ny hafa raha toy izany ny fomba fiainantsika?