NY HIRAN'I MOSESY SY I MIRIAMA
Natelin'ny rano avokoa ireo miaramila egyptianina; tsy nisy velona izy ireo na dia iray aza, anisan'izany i Farao (jereo ny Sal. 136:15). Faharesena nahagaga ho an'ireo Egyptianina izany, ary fandresena tanteraka ho an'ireo vahoakan'Andriamanitra. Tsy mahagaga raha namerina nitantara izany teo amin'ny tantaran'izy ireo ny Jiosy, eny hatramin'izao fotoana izao aza. Egyptian
Vakio ny Eks. 15:1-21. Inona no ambaran'ny tononkiran'i Mosesy?
Midera an'i Jehovah io hira io noho ny maha-mpiady mahery Azy, izay nandresy ireo fahavalon'ny olony. Novelabelarin'i Mosesy manokana io lohahevitra io ka nasongadiny fa i Jehovah, ilay Andriamaniny, no tanjany sy hirany ary famonjena azy. Tsy misy tahaka an'i Jehovah, izay "ankalazaina amin'ny fahamasinana, deraina amin'ny fahatahorana, Mpanao fahagagana." - Eks. 15:11.
Momba an'Andriamanitra manontolo, ny Toetrany sy ny Asany ny hiran'i Mosesy. Asandratra ny Tompo, ary deraina sy ankalaizana noho ny asa mahagaga nataony ho an'ny olony. Tsy terena fa mandeha ho azy ny fankasitrahana sy ny fiankohofana manoloana ny fahatsaran'Andriamanitra amintsika. Ny fankasitrahana ny fitiavany no fepetra iankinan'ny fiainana ara-panahy velona tsara. Asongadina sy omem-boninahitra manokana ny fitiavan'Andriamanitra mandrakizay satria hitarika ny vahoaka izay efa navotany Izy ary hitondra azy ireo ho any amin'ny fitoerana masina. Nambaran'i Mosesy mialoha fa hanorina ny fitoerana masina any an-tendrombohitr'ireo lovany i Jehovah (Eks. 15:17); nanondro mialoha an'i Ziona sy ny tempoly tany Jerosalema izany.
Voalazan'ny Apôk . 15:2-4 fa mihira ny hiran'i Mosesy sy ny hiran'ny Zanak'ondry ireo voavotra. Azonao an-tsaina ve ny feo ho re any an-danitra, izany fiderana an'Andriamanitra izany noho ny asa lehibe sy mahatalanjona nataony, ny fiderana an'Andriamanitra noho ny fitsarana marina sy ara-drariny ataony, ary ny fiderana Azy noho ny fahamarinany sy ny fahamasinany?
Mariho ny andalana farany amin'ilay hira: "ary ny firenena rehetra ho avy hiankohoka eo anatrehanao; fa efa naharihary ny fitsarana marina nataonao. Izany hoe, rehefa haharihary ny fitsarana rehetra ataon'Andriamanitra-indrindra ny fitsarany ny faharatsiana sy ny fampahoriana tsy nahazo famaizana nandritra ny arivo taona maro - dia hidera Azy noho izany fitsarana izany ny voavotra avy amin'ny firenena rehetra.
Nambaran' i Emmanuel Kant fa raha marina Andriamanitra, dia azo antoka izany ny fisian'ny fiainana aorian'ny fahafatesana. Nahoana no marina izany fanambarana izany, ary Inona ny lesona azontsika sintonina amin'izany mba hananana toky fa ho avy ny rariny sy ny fahamarinana izay tsy nisy nandritra ny fotoana ela, indray andro any? Ahoana no handraisanao fampaherezana avy amin'izany fanantenana izany?