Imbetsaka i Jaona no nitantara mikasika ny fiezahan'ireo mpitondra fivavahana hisambotra an'i Jesôsy sy hitondra Azy hotsaraina, ary ny hanameloka Azy ho faty. Lohahevitra iray ao amin'ny filazantsaran'i Jaona ny filazan'i Jesôsy matetika fa tsy mbola tonga ny fotoany, izany hoe ny fotoana hanomboana Azy amin'ny hazo fijaliana (Jao. 2:4; Jao. 7:6,8,30; Jao. 12:7,23,27; Jao. 13:1; Jao. 17:1).
Efa tonga ny fotoana ankehitriny. Nosamborina tao an-tsahan'i Getsemane i Jesôsy , ary nentina teo amin'i Anasy, avy eo tany amin'ny Kaiafa mpisoronabe, ary nentina indroa teo amin'i Pilato.
Vavolombelona maro avy amin'ny saranga rehetra no nantsoin'i Jaona mba hanambara ny maha-Kristy an'i Jesôsy. I Pilato, ilay governora izay nitsara an'i Jesôsy izao no antsoiny. Fijoroana ho vavolombelona manan-danja tokoa izany satria Rômanina i Pilato, ary koa governora no sady mpitsara; Jiosy sy olon-tsotra mantsy ny ankamaroan'ireo vavolombelona hafa.
Ahoana no ifandraisan'ny valim-pitsaran' i Pilato amin'ny lohahevitry ny filazantsaran'i Jaona? Jao. 18:38; Jao. 19:4-22.
Ny Zoma maraina be no nentina teo amin'i Pilato i Jesôsy (Jao. 18:28, DIEM). Ny handefa ity mpifatotra ity haingana ho amin'izay tokony hiafarany no drafitr'i Pilato; nanintona ny sainy anefa ny fihetsika nasehon'i Jesõsy. Nanadina an'i Jesôsy akaiky ity governora ity ary nandre avy tamin'ny molony hoe: "Izao no nahaterahako, ary izao no nihaviako amin'izao tontolo izao, dia ny hanambara ny marina. Izay rehetra avy amin'ny marina dia mihaino ny feoko." - Jao. 18:37.
Na dia nanameloka an'i Jesôsy ho faty aza ity governora ity tamin'ny farany, dia nambarany intelo ny maha-tsy manan-tsiny Azy (Jao. 18:38; Jao. 19:4,6). Ary nosoratany teo ambony hazo fijaliana izao soratra izao: "Jesôsy avy any Nazareta, Mpanjakan'ny Jiosy." - Jao. 19:19; izany no namaranany ny fijoroany ho vavolombelona momba an'i Jesôsy sy ny maha-lzy Azy. Na dia teo aza anefa ny fanambarany fa tsy olo-meloka i Jesôsy dia nanameloka Azy ho faty ihany izy.
Ilay Fahamarinana mihitsy no nijoro teo anatrehan'i Pilato saingy noho ny fihainoany ny fandrahonan'ny vahoaka dia nomelohiny ho faty ihany i Jesôsy! Ohatra mahonena manao ahoana re izany, momba ny tsy fanarahana izay asain'ny feon'ny fieritreretana sy ny fo hatao araka ny tokony ho izy!
Inona ny lesona azontsika tsoahina avy amin'i Pilato momba ny loza mananontanona amin'ny famelana ny fihetseham-pon'ny besinimaro, ny tsindry avy aminy, hisakana antsika tsy hanao ny zavatra inoantsika fa tokony hatao?