Hodinihina mandritra ny herinandro: Sal. 27:14; Rém. 8:18-25; Sal. 131; Mat. 18:3; Sal. 126; Sal. 92; Mar. 16:1-8; 2 Pet. 1:19,
Tsianjery: “Miandrasa an’i Jehovah hianao; matokia, ary aoka hahery ny fonao; eny, miandrasa an’i Jehovah.” - Sal. 27:14.
Tonga eo amin'ny herinandro farany amin'ny fandalinana momba ny Salamo nandritra ity telovolana ity isika. Izany dia lavitra ara-panahy izany dia nitondra antsika namakivaky fanandramana mahatalanjona manoloana llay Mpamorona lehibe sy Mpanjaka ary Mpitsara. Nandalovantsika ny fifaliana vokatry ny fanafahan’Andriamanitra sy ny famelany heloka ary ny famonjena. Nandalovantsika ireo fotoana nahatsapana ho nafoy tao anatin’ny alahelo sy ny fitarainana; ary hitantsika ireo teny fikasana be voninahitra momba ny fanatrehan’Andriamanitra mandrakizay sy ny firesahana sahady ny amin'ny fiankohofan'ny voary manontolo amin’Andriamanitra mandrakizay. Mitohy ny dia, miaina ao anatin’ny fanantenana ny fiavian'ny Tompo isika, ary ho tonga amin'ny fahatanterahana ny faniriantsika fatratra an’Andriamanitra. Raha misy tsoa-kevitra azontsika tsoahina avy amin’ny Salamo, dia izao izany: “Miandrasa an'i Jehovah.”
Tsy fitomotomoeram-poana sy fitoerana anatin'ny fahakiviana tsy akory ny fiandrasana an‘i Jehdvah. Tsy izany, fa asam-pitokiana sy asam-pinoana izany, fitokiana sy finoana izay aseho amin'ny asa. Manova ny takarivantsika matroka ho fiandrandrana ny maraina mamiratra ny fiandrasana an‘i Jehovah (Sal. 30:5; Sal. 143:8). Mampahatanjaka ny fontsika amin’ny fanantenana vaovao sy fiadanana izany. Mandrisika antsika hiasa bebe kokoa izany, mba hitondrantsika ny amboaran'ny fijinjana be avy amin'ny saha fiasan’Andriamanitra (Sal. 126:6; Mat. 9:36-38). Tsy hitondra fahafaham-baraka ho antsika na oviana na oviana ny fiandrasana an'i Jehovah fa hitondra valisoa lehibe, satria mahatoky amin'ny teny fikasany rehetra Andriamanitra (Sal. 37:11, 18, 34; Sal. 71:1; Sal. 119:137, 138).