Vakio ny Sal. 77. Inona ny fanandramana lalovan'ny mpanoratra eto?
Manomboka amin'ny antso atao amin'Andriamanitra ho fangatahana ny fanampiany ny Sal. 77, izay feno fitarainana sy fahatsiarovana maharary momba ny lasa (Sal. 77:1-6). Amin'alahelo lehibe no ampitodihan'ny mpanao Salamo ny momba azy rehetra amin'Andriamanitra. Laviny ny handray fampaherezana hafa ankoatra izay avy amin'Andriamanitra.
Toy ny nampitombo ny fahoriany anefa ny fahatsiarovana an'Andriamanitra. "Rehefa mahatsiaro an'Andriamanitra aho, dia misamboaravoara ny ato am-poko" - Sal. 77:3, ESV. Ny teny hebreo hamah, "misamboaravoara" dia matetika hoentina milaza ny feon'ny ranomasina mirohondrohona (Sal. 46:3). Tahaka izany koa, ny momba ilay mpanao Salamo manontolo mihitsy no tsy mahatsapa fitoniana.
Nahoana moa ny fahatsiarovana an'Andriamanitra no miteraka fahatsapana fahoriana? Fanontaniana mampanahy maro no maneho ny anton'ny tebitebiny (Sal. 77:7-9): moa niova ve Andriamanitra? Azo heverina ve ny hivadihany amin'ny Fanekeny?
Mahatonga ilay mpanao Salamo hahatsiaro ho nafoin'Andriamanitra ny fahasamihafana lehibe eo amin'ny asam-pamonjen'Andriamanitra tamin'ny lasa sy ny fanginany ankehitriny. Raha toa ka niova Andriamanitra dia tsy manana fanantenana izany ilay mpanao Salamo; fehin-kevitra tsy tiany hekena izany.
Etsy andaniny dia tsy matory ilay mpanao Salamo satria mampiari-tory azy Andriamanitra (Sal. 77:4). Mampahatsiahy olona hafa ao amin'ny Baiboly izany, izay nampiasan'Andriamanitra ny tsy fahitan-torimaso mba hahatanteraka ny Fikasany (Gen. 41:1-8; Est. 6:1; Dan. 2:1-3). Nahatonga ilay mpanao Salamo hihevitra ny fanafahan'Andriamanitra tamin'ny lasa, saingy miaraka amin'ny fanapahan-kevitra vaovao, ny alina lava tsy nahitany torimaso (Sal. 77:5,10).
Ny toky voarain'ilay mpanao Salamo avy amin'Andriamanitra dia tsy fanazavana mikasika ny toe-javatra iainany manokana fa fanambarana ny fahatokian'Andriamanitra sy ny maha-azo itokiana Azy (tahaka ny tamin'i Jôba). Nampaherezina ilay mpanao Salamo mba hiandry an'i Jehovah amin'ny finoana, satria fantany fa Izy ihany ilay Andriamanitra nanao fahagagana tamin'ny lasan'ny Isiraely (Sal. 77:11-18). Tsapan'ny mpanao Salamo koa fa "tsy fantatra ny dian-tongotrao" - Sal. 77:19; miaiky ny fitarihan'Andriamanitra izy na dia ao anatin'ny toe-javatra izay tsy hahitan'ny olona maso ny fanatrehany aza. Ekeny fa sady manatrika Andriamanitra no miery, ary amin'izany no hanandratany fiderana ho an'i Jehovah noho ny fomba feno zava-miafina sy fahamboniana.
Eritrereto ny fotoana lasa izay niasan'Andriamanitra teo amin'ny fiainanao. Ahoana no hanampian'izany fahamarinana izany anao hiatrika ny toe-javatra lainanao ankehitriny?