"Ary toy izany koa, ny Fanahy no mamonjy ny fahalementsika: fa tsy fantatsika izay vavaka tokony hataontsika; fa ny Fanahy no mifona amin'ny fitarainana tsy azo tononina." Rôm. 8:26.
Mofon’aina:
Tsy ankasitrahan'Andriamanitra ny vavaka raha tsy atao amim- panetren-tena sy amin'ny fo torotoro amin'ny anaran'i Kristy. Mahalala ireo izay mivavaka amin'ny fo manetry tena Ilay mpihaino sy mpamaly ny vavaka. Tsy mangataka na inona na inona afa-tsy amin'ny anaran'i Kristy ny tena Kristianina marina, ary tsy manantena na inona na inona raha tsy noho ny fanelanelanana ataony. I Kristy no tian'izy ireo homem-boninahitra amin'ny fitondrana ny vavaka ataony ho eo anatrehan'ny Ray, ary faniriany ny handray fitahiana avy amin'Andriamanitra amin'ny alalan ' i Kristy.
Manana anjara asa lehibe ny Fanahy Masina mba hahatonga ny vavaka hankasitrahan'Andriamanitra. Manalefaka ny fo Izy, manazava ny saina ka mahatonga azy hahay hamantatra ny tena ilainy; velominy ny faniriantsika ka manjary noana sy mangetaheta ny fahamarinana isika, ary manao fanelanelanana ho an'ny mpivavaka amin'ny fo marina Izy.
Tsy maintsy manatona an' Andriamanitra ny olombelona ka hahatsapa fa mila fanampiana izy, izay Andriamanitra irery no afaka manome azy. (...)
Ny vavaka amim-pinoana no fanalahidy mamoha ny trano firaketan'ny lanitra. Aoka hotsaroantsika fa rehefa manankina ny fanahintsika amin'Andriamanitra isika, dia raisiny ho andraikitra ny mihaino sy mamaly ny fivavahantsika. Manasa antsika Izy hanatona Azy, ary izay tsara sy sarobidy indrindra no omeny antsika — dia izay tena ilaintsika indrindra. Tiany ny manampy antsika. Aoka isika hatoky ny fahendreny sy ny heriny. Oh, mila manam-pinoana manao ahoana isika! Fiadanana sy fiononana manao ahoana no tokony hananantsika! Sokafy hidiran'ny Fanahin'Andriamanitra ny fonao, dia hiasa amin'ny alalanao sy hitahy ny asanao ny Tompo.
Tsy tokony hanetry tena eo anatrehan'Andriamanitra ve isika mba hivavaka ho an'ireo izay marefo ny aim-panahiny? Mila manokana fotoana tsy miovaova hivavahana ho azy ireny isika. Tsy tokony hivavaka isan'andro ho an'ireo maty ao anatin'ny helony sy ny fahotany ve isika? Eo am-pitalahoantsika amin'Andriamanitra mba hanorotoroany ireny fo vato ireny, dia ny fontsika no manjary mihamalefaka. Ho hitantsika malaky kokoa ny fahotan'ny tenantsika. – MR, b. 8, t. 197.